بوونی گەندەڵی لە نەبوونی دەستوورەوە سەرچاوەی گرتووە و محاڵە بەبێ بوونی دەستووریش سنوور بۆ گەندەڵی دابنرێ و شەڕی گەندەڵکاران بکری، پرۆژەی دەستوور لە پەرلەمان بەدەنگی (٩٧) پەرلەمانتار پەسند کرا و تەنها ئەوە مابوو بخرێتە راپرسی و خەلک بڕیار لە رەتکردنەوەی یان پەسند کردنی بدات، ئەوەی جیگای پرسیارە هەموو ئەو حزبانەی زۆرترین موزایەدەیان بوونی گەندەڵییەوە دەکرد، گێچەڵیان بەو پرۆژەیە کرد و بە تەوافوقی حزبییان سپارد و لە تەوافوقەکەش نەگەیشتنە تەوافق و پەکیان خست، تاکە حزبێک کە پێی وابوو پرۆژەی دەستوور پرسێکی نیشتیمانییە و دەبێ لە دەستی حزب دەربهینرێ و بگەڕێتەوە بۆ خەڵک و بخریتە دەنگدانەوە پارتی بوو، بەڵام حزبەکانی تر بە ئۆپۆزسیۆن و دەسەڵاتیشەوە جگە لە پارتی ئەو پرسەشیان وەک هەموو پرسە نیشتیمانیەکانی تر بە حزبی کرد، بەوەش دەرکەوت کە ئەو حزبانە ئەوەندەی لە خەمی موزایەدەی سیاسیی دان، ئەوەندە لە خەمی بە دامەزراوە کردنی وڵات و شەڕی گەندەڵیدا نین.
بوونی گەندەڵی حزبەکانی بەسەر دوو بەرەدا دابەش کردبوو، بەرەیەکیان ئەگەرچی موزایەدەی سیاسی بە بوونی گەندەڵیەوە دەکرد، بەڵام خۆشیان بەری نەبوون لە گەندەڵی و شەڕیان بۆ ئەوە دەکرد کە زیاتر ریگەی گەندەڵیان بدری، بەرەکەی تریش هاوکات کە موزایەدەی بە بوونی گەندەڵیەوە دەکرد، تا بناگوێی لە گەندەڵیدا غەرق ببوو، بەڵام خۆی وا پیشان دەدا کە خۆی گەندەڵ نییە و تاکە حزبیش بوو کە رێگری لە تێپەڕاندنی پرۆژەی چاکسازی و بەگژدا چوونەوەی گەندەڵی دەکرد.
ئێستاش ئەو حزبانە لەسەر بوونی گەندەڵی و چاکسازی کردن هەرچی بڵێن زیادەیە و لە موزایەدە زیاتر شتێکی تر نییە، چونکە تاکە رێگە کە شەڕی گەندەڵی و گەندەڵکارانی پێبکرێ بوونی دەستوورێکە کە گەل بڕیاری لەسەر بدات و دوور بێ لە تەوافوق و ریککەوتنی حزبی.