لەیلای ئێمە لە پێناو بەرز راگرتنی (ئاڵا)، بە چڕینی سروودی دوژمن تاسێنی (ئەی رەقیب)، بەرز هەڵکشا تا ئەو ئاستەی کەوشەکانی چوونە سەر سەری جەلادەکانی خاوەن پەتی سێدارە.
ئاڵای ئەوانیش لە خۆشی داگرتن و ژێرپێ خستنی (ئاڵا) لە بەغدای پایتەختی عرووبە کەوتبووە هەلەکەسەمای سیاسی و گەڕان بە دوای دۆزینەوەی کەوشە بە غەنیمەت گیراوەکانی.
ئەم دوو هەڵوێستە جیاوازە، هەڵوێستی بڕوا بوونی لەیلای ئێمە بە کوردستانی بوون و بڕوا بوونی ئاڵای ئەوان بە عێراقچێتی، بڕوا بوونی لەیلای ئێمە بە سەربەخۆیی کوردستان و بڕوا بوونی ئاڵای ئەوان بە ژێدەستە بوونی کوردستان، رەنگدانەوەی ئەو قوتابخانانەن کە لێیان پەروەردە کراون.
هەرچی لەیلای ئێمەیە لە قوتابخانەیەک پەروەردە کراوە کە دەسنوێژی کوردایەتی بە خوێن هەڵگرتووە و لەناو سەنگەردا رووە و کەرکوک نوێژی سەربەخۆیی دابەستووە، هەرچی ئاڵای ئەوانیشە لە قوتابخانەیەک پەروەردە کراوە کە دەستنوێژی عرووبەی بە ئەنفال و کیمیاباران هەڵگرتووە و رووە و بەغدا نوێژی پاراستنی یەک پارچەیی خاکی عێراقی دابەستووە.
لەیلای ئێمە وا فێر بوو واش فێر کرابوو، ناو قژ و پرچە بێ رەنگ و بۆیەکانی بکاتە حەشارگەی گواستنەوەی نامە نهێنیەکانی شۆڕش، ئاڵای ئەوانیش وا فێر بوو واش فێر کرابوو، هەرچی نهێنی کورد و حکومەتی هەرێم هەیە بە جانتای پارێزمەندی پەرلەمانتاری بەرە و سەر مێزی عەبادی بەرێ.