فه‌رموو ئه‌وه كردار...
سووره مه‌رگه‌یی
یه‌كه‌میان:ـ نه‌وشیروان مسته‌فا به بیانووی نه‌بوونی كردار نه‌ك ده‌یه‌وێ خۆی له پرسێكی نه‌ته‌وه‌یی وا گرنگ بدزێته‌وه، به‌ڵكو ده‌یه‌وێ له سه‌روبه‌ندی گشتپرسیه‌كه‌دا ئاژاوه‌گێڕیه‌كی تریش ساز بكات و دوا كارتی خۆی بۆ رشتنی كۆنه‌قین به‌رامبه‌ر به خانه‌واده‌ی بارزانی نه‌مر فڕێ بدات ئه‌گه‌ر به رێگری كردن بێ له درووست بوونی ده‌وڵه‌تی كوردیش.
دووه‌میشیان: پابه‌ند بوونه به‌رامه‌به‌ر به‌و ریككه‌ونته نهێنی و پیلان ئامێزه‌ی بۆ ریگری كردن له درووست بوونی ده‌وڵه‌تی كوردی و به‌ربه‌ست درووست كردن له به‌رده‌م هه‌نگاوه نه‌ته‌وه‌ییه‌كانی سه‌رۆك بارزانی، كه پێشتر نه‌وشیروان مسته‌فا له‌گه‌ڵ وڵاتێكی هه‌رێمی كردوویه‌تی، ورووژاندنی نه‌بوونی كرداریش پاساو و خۆڵ كردنه چاوی خه‌ڵك و به‌رده‌وام بوونیه‌تی له‌سه‌ر سیاسه‌تی گه‌وجاندن.
لێره‌دا روو له نه‌وشیروان مسته‌فا ده‌كه‌م و ده‌ڵێم: ئه‌گه‌ر ئه‌وه‌نده دژه درووشم و كرداردۆستی فه‌رموو.. ئه‌وه سه‌رۆك بارزانی دوای دوو رۆژ له چه‌واشه‌كاریه‌كه‌ی تۆ و درووست له 23ی حوزه‌یران و هاوكات له‌گه‌ڵ تێپه‌ڕبوونی ساڵێك به‌سه‌ر كوده‌تاكه‌ی ناو په‌رله‌مانی كوردستان، بۆ كۆبوونه‌وه و یه‌كخستنی هه‌ڵوێست و بڕیاردان له‌سه‌ر پرۆسه‌ی گشتپرسی و راگه‌یاندنی سه‌ربه‌خۆیی و دامه‌زراندنی ده‌وڵه‌تی كوردی، به كردار بانگهێشتی هه‌موو لایه‌نه‌كانی كردووه، جا ئه‌گه‌ر به‌ڕاستی له خه‌می كورد و خوێنی شه‌هیدان و رابردوو و ئێستا و داهاتووی خه‌ڵكی كوردستان دای! رووی شاندی ئاماده كراوی به‌غدا وه‌رگێڕه و رووی پێ له هه‌ولێر بكه، له‌باتی ئه‌وه‌ی به به‌غدای به‌عس و داعش و حه‌شدی شه‌عبی بڵێی: رێككه‌وتنه‌كه‌مان له گه‌ڵ یه‌كێتی دژێ عرووبه و یه‌ك پارچه‌یی خاكی عێراق نییه، به گه‌رمیانی زامدار و هه‌ڵه‌بجه‌ی خنكاو، به خوێنی شه‌هیدان و ره‌نج و قوربانیدانی شۆڕشگێڕان، به زامی قووڵی (182000) ئه‌نفالكراو و عومه‌ری خاوه‌ری ناسنامه‌ی (5000) خنكاوی ناو غوباری كیمیا و (8000) بارزانی ونكراو بڵێ: رێككه‌وتنه‌كه‌مان بۆ كۆتایی هێنانه به زوڵم و سته‌می نه‌ته‌وه‌یی و بۆ سه‌ربه‌خۆیی كوردستانه.
