ئەو بارودۆخەی ماوەی زیاتر لە 40 رۆژە لەشاری سلێمانی و هەندێك لەقەزاو ناحیەكانی ئەو ناوچەیە درێژەی هەیە، بارودۆخێكە هەرچۆنێك دروست بووبێت پێویستی بەچارەسەركردن و وەڵامدانەوەی خۆپیشاندەران هەیە و ئەركی هەردوو لایەنی حزبە حكومڕانەكان (پارتی و یەكێتی)و لایەنەكانی ئۆپۆزسیۆن (كۆمەڵ و یەكگرتوو و گۆڕانە) كەهەوڵبدرێت لەو بازنەیەی ئێستا خۆپیشاندانەكان گرتوویەتیەوە چارەسەر بكرێت و هەوڵبدرێت بارودۆخەكە هێور بكرێتەوە، كەواتە لێرەوە ئەركی هێوركردنەوەی بارودۆخی سلێمانی و چەند ناوچەیەكی دەوروبەری تەنیا ئەركی پارتی و یەكێتی نییە هەوڵ بۆ هێوركردنەوەی بدات، بەڵكو ئەركێكی هەمەلایەنەیە و پێویستە لایەنەكانی ئۆپۆزسیۆن لەم قەیرانەدا هاریكار و هەماهەنگی پارتی و یەكێتی بن بۆ ئەوەی كێشەكە لەو سنوورە چارەسەر بكرێت كە ئێستا خۆپیشاندانی لێ هەیە، نەك هەوڵبدرێت هەموو كوردستان بگرێتەوە یان هەوڵبدرێت بەزمانی زبر بارودۆخەكە ئاڵۆزبكرێت و لەپێناوی چەند دەسكەوتێكی حزبیدا یاری بەهەموو دەسكەوتەكان بكرێت، یان چارەنووسی هەرێمی كوردستان بخرێتە مەترسییەوە. ئەمەش لەبەر ئەوەیە باری سیاسیی ئەمڕۆی كوردستان پێویستی بەخوێندنەوەیەكی واقیعیانە هەیە و دەبێت لەنێو واقیعەوە چارەسەر بۆ كێشەكان بدۆزرێتەوە نەوەك هەوڵبدرێت چەند تێرمێكی تیۆری یان روانگەی لایەنێكی سیاسیی دیاریكراو، ئەوجا كەمینە بێت یان زۆرینە فەرز بكرێت، یان لەمەش خراپتر هەڕەشەی لەباربردنی هەموو دەسكەوتەكانی پێ بكرێت، ئەمجۆرە سیاسەتكردنە كە لە بنەڕەتدا لایەنی كۆمپرۆمایز و نەرمی نواندن و گەیشتن بە چارەسەری مامناوەندی لە میتۆدی سیاسەت وەردەگرێتەوە، لەهەمانكاتدا بەشێوەیەك لەشێوەكان ئاڕاستەی دیموكراتی و یەكتری قبوڵكردن و پێكەوە كاركردن دەگۆڕێت بۆ یەكتری ڕەتكردنەوەو بەدوژمن ناساندنی بەرامبەر و بەرهەمهێنانی توندوتیژی، بۆیە لەم حاڵەتەدا هێندەی دەرگای لێكتێنەگەیشتن واڵا نەبێت، هێندە پرۆسەی وتووێژ و پێكەوە كاركردن بواری بۆ نامێنێتەوە.

نەرمی نواندنی پارتی و یەكێتی و
پێداگیری لایەنەكانی ئۆپۆزسیۆن
بەیاننامەی هاوبەشی پارتی و یەكێتی وەك وەڵامدانەوەیەك بۆ پڕۆژەكەی هەرسێ لایەنی ئۆپۆزسیۆن (گۆڕان و كۆمەڵ و یەكگرتوو) جارێكی دیكە لەلایەن ئۆپۆزسیۆنەوە تەفسیری بەو ئاڕاستەیە بۆ كرایەوە كە پارتی و یەكێتی ئامادەنین وەڵامی پڕۆژەكەی ئۆپۆزسیۆن بدەنەوە، لەكاتێكدا بەدەق لە بەیاننامە هاوبەشەكەی پارتی و یەكێتی هاتووە ((ئێمە لەكاتی خۆیدا وەڵامی ئەو خاڵانەمان داوەتەوە كە خۆی لە پڕۆژە 17 خاڵیەكەی پەرلەمان و بەرنامەی سەرۆكی هەرێم و بڕیارەكانی سەرۆكی حكومەت دەنوێنێ.....لەگەڵ ئەوەشدا ئێمە ئامادەین لەسەر ئەم خاڵانە دابنیشین تائیتیفاقی لەسەر بكەین. مەسەلەی هەڵوەشاندنەوەی حكومەتی هەرێمیش بەو شێوەیەی ئەوان داوای دەكەن بەنایاسایی و ناشەرعی دەزانین، بۆیە پێكهێنانی حكومەتێكی ئینتیقالی ڕەتدەكەینەوە) ئەم چەند پەرەگرافەی لەنێوان ئەم دوو كەوانەیە ئاماژەمان پێكردون، نەرمییەكی لەرادەبەدەری ئەوتۆی پێوە دیارە كە بوار بۆ ئەوە ناهێڵێتەوە وەك رەتكردنەوە یان حیساب نەكردن بۆ پڕۆژەكەی ئۆپۆزسیۆن بخوێنرێتەوە، بەڵام تەنیا خاڵێك كە لایەنی ئۆپۆزسیۆن تەفسیری ئەوەی بۆ دەكات كە وەڵامی پڕۆژەكەیان نەدراوەتەوە ئەوەیە كە پارتی و یەكێتی داوای ئەوەیان كردووە وەك چۆن ئەوان وەك ئۆپۆزسیۆن مافی خۆیانە پڕۆژەیان هەبێت، بەهەمان شێوە پارتی و یەكێتیش وەك دوو لایەنی سەرەكی و حكومڕان لەكوردستان مافی خۆیانە پڕۆژەی خۆیان هەبێت و چۆن پارتی و یەكێتی ئامادەییان پیشانداوە كە وتووێژ لەسەر پڕۆژەكەی ئۆپۆزسیۆن بكەن بەهەمان شێوە دەبێت وەك عورفێكی سیاسیی لەنێوان لایەنە سیاسییەكانی كۆمەڵگەی دیموكراتی، فەرز دەبێت لەسەریان ئەوانیش رێز لە وەڵامدانەوەكەی پارتی و یەكێتی بگرن و پێكەوە بگەنە چارەسەرێك كەهەموو لایەكی پێ ڕازی بێت، بەڵام پێداگرتن لەسەر ئەوەی كە دەبێت بێ وتووێژ كردن پڕۆژەكەی ئۆپۆزسیۆن جێبەجێ بكرێت ئەمە كارێكە دەكەوێتە دەرەوەی سیاسەتكردن لە كۆمەڵگەی دیموكراتی، لەمبارەوە و سەبارەت بەهێوركردنەوەی بارودۆخی ناوچەكانی سلێمانی و دەوروبەری و بۆ هەنگاو هەڵگرتن بۆ چارەسەری كێشەكە، یوسف محەمەد وەك بەڕێوەبەری ناوەندی توێژینەوەی سیاسی بزووتنەوەی گۆڕان بەمجۆرە بۆ گوڵان هاتە ئاخاوتن:((ناڕەزاییەكانی هەرێمی كوردستان تایبەت نییە تەنیا بە شاری سلێمانی، بۆتە خۆپیشاندانێكی جەماوەری بەرفراوان لەناو شاری سلێمانی و لەقەزا و ناحیەكانی سەر بە پارێزگای سلێمانی و هەندێ لەقەزا و ناحیەكانی سەر بەپارێزگای هەولێریش بەتایبەتی لەقەزای كۆیە و تەق تەق، هەروەها لەهەموو شارو شارۆچكەكانی تری كوردستان ناڕەزایی هەیە، تا ئێستا چەندجار داوای مۆڵەتی خۆپیشاندان لەپارێزگاری هەولێر كراوە، بەڵام مۆڵەتیان پێ نەداون، كەواتە ناڕەزایی خۆپیشاندانەكان تەنیا لە سلێمانی نییە، بەڵكو لەهەموو هەرێمی كوردستانە، بەڵام لەسلێمانی خەڵك دەسەڵاتی ناچاركردووە كەخۆپیشاندان ئەنجام بدەن و دەسەڵاتی یەكێتی لەسلێمانی نەتوانێت پەرچەكرداری هەبێت، بەڵام لەهەر شوێنێكی تر دەسەڵاتی هەبووبێت، ئەوە بەهێز وەڵامی خۆپیشاندەرانی داوەتەوە، هەروەها دەبێت ئەوەش بزانین كە تائێستاش لەهەرێمی كوردستاندا دوو ئیدارەیی هەیە.

سەبارەت بەچۆنییەتی هێوركردنەی بارودۆخەكەش، ئێمە پێمانوایە دوو ڕێگە لەبەردەمی دەسەڵاتی هەرێمی كوردستان هەیە، ڕێگایەكیان ئەوەیە كە وەكو قەزافی بەهێزە ئەمنییەكانی خۆیان و ئەو هێزە چەكداریانەی كە هەیانە بیانهێنە ئەو شوێنانەی خۆپیشاندانی تێدایە و ناڕەزاییەكان كپ بكەنەوە، بێگومان بەراوبۆچوونی من ئەوە فەشەل دەهێنێت، ئەو رێگەیە سەركەوتوو نابێت، ئەمە لەگەڵ ئەوەی بەشێك لەناو دەسەڵاتی سیاسی وا بیر دەكاتەوە كە بە ڕێگەی هێز و چەك دەتوانرێت بارودۆخەكە هێوربكەنەوە، بەڵگەش بۆ ئەمە ئەو بەیانامەیەیە كە شەوی هەشتی مانگ لەلایەن دەسەڵاتی سیاسی دەرچووە كە بۆ وەڵامدانەوەی هەر سێ لایەنی ئۆپۆزسیۆنەو بەنەفەسێكی زۆر توند و هەڕەشەئامێزە.
ڕێگەی دووەم بۆ هێوركردنەوە بریتییە لەوەی كە دەبێت دەسەڵاتی سیاسی بەدەنگ داخوازیەكانی خەڵك و ئۆپۆزسیۆنەوە بچێت و هەوڵی گۆڕانكاری بنچینەیی لەهەرێمی كوردستان بدات و دەستی گەندەڵكاران لە هەرێم ببڕێت و هێزە چەكدار و ئەمنییەكان بەدەست حزبەوە نەمینێت و پارتی و یەكێتی وەكو دوو حزبی سیاسی بمێننەوە كە لە ڕابردوو وەكو حزبەكانی تر خزمەتیان بەهەرێمی كوردستان كردووە)).
ئەو بۆچوونەی یوسف محەمەد وەك ئەندامی شاندی بزووتنەوەی گۆڕان لەوتووێژەكانی نێوان پارتی و یەكێتی ئاماژەی پێكرد، تاراددەیەكی زۆر بەدەربڕی هەڵوێستی فەرمی بزووتنەوەی گۆڕانیش دەخوێنرێتەوە، بەڵام پرسیاری سەرەكی ئەوەیە ئایا لایەنەكانی دیكەی ناو ئۆپۆزسیۆنیش هەمان هەڵوێستی توندیان هەیە، یان بەجۆرێك لەجۆرەكان بواری ئەوەیان هێشتۆتەوە كە هەوڵبدرێت بەزمانی دیالۆگ و لێكتێگەیشتن كێشەكان چارەسەر بكرێن، لەمبارەوە پرسیارمان لەبەڕێز مەولود باوەمراد ئەندامی مەكتەبی سیاسیی یەكگرتووی ئیسلامی كرد و بەم شێوەیە سەبارەت بەهێوركردنەوەی باردۆخەكە رای خۆی بۆ گوڵان دەربڕی : (سەرەتا دەمەوێت لەو خاڵەوە دەست پێبكەم كە پێویستی وخواستی چاكسازی ئەمڕۆ لەكوردستاندا كۆدەنگیيەكی نیشتمانی كۆمەڵگەی كوردستانی لەسەرە و هەموو حزب ولایەن وهێزەكان لەدەسەڵات بن یان ئۆپۆزسیۆن هاودەنگ وكۆكن لەسەر پێویستی ئەنجامدانی چاكسازی وچارەسەركردنی كێشەی گەندەڵی، لەگەڵ جیاوازی ودیدو ڕوئیاكان بۆ چۆنیەتی چاكسازی وچۆنیەتی پیادەكردن وجۆری میكانیزمەكانی، ئەم ڕاستیە لانیكەم لەڕووی تیۆریيەوە ئاماژەی ئەوە دەدات بەدەستەوە كە هیچ كەس ولایەنێك لەبەرەی دژی چاكسازیدا نیيە و چاكسازی نە لەدژی ئەزموون و دەسەڵاتی سیاسی هەرێمە، نەلە دژی هێزولایەنە سیاسیەكانیدا نابێت و دەبێ و دەشێ ئەم كۆدەنگیيە خاڵی هاوبەشی لێك تێگەيشتنی گشتی بێت بۆ پەڕینەوە بەرەو قۆناغێكی نوێی سیاسەتكردن لەكوردستاندا كەتایتڵی گەورە تیایدا پرۆسەی چاكسازی نیشتمانییە كە ئەوەش وەڵامدەرەوەی خواستی خۆپیشاندەران وسەرجەم كۆمەڵگەی كوردستانیيە، بۆئەوەی ئەم قسانەش لەخەون وخەیاڵێكی خۆشی ئۆپۆزسیۆن وجەماوەر و وگوتاری جوان ودڵخۆشكەرەی ناكردەیی دەسەڵات دەرچن، دەبێ ئەم پرۆسە نیشتمانیيە زەرور وژیانیيە لەسەرو حەساسیەتە حزبی وچوارچێوە تەسكەكانی ململانێی حزبی ودەسكەوتی سیاسی و شەڕەكانی نفوز بردنەوە ودۆڕاندن دابنرایە وسەیر بكرایە، بەداخەوە تا ئێستە وانەهاتووە وبەدڵنیایيەوە تا نەگەینە وێستگەی ئەو تێگەشتنە هاوبەشە، هەر خەریكی دۆزینەوەی خیارەكانی باسك بادانی یەكترو شەڕی بەحساب تەنازول نەكردنی سیاسی دەبین، لێرەوە دێمەوە سەر پرسیارەكە بەڕای ئێمە بەڕەوا زانینی داوای خۆپیشاندەران داننانە بەڕاستی و پێویستبوونی ئەوەی كە خۆپیشاندەران داوای دەكەن لەدەسەڵاتی سیاسی هەرێم بەهەموو دامەزراوەو ئۆرگانە تەشریعی وتەنفیزی وسەرۆكایەتیەكەوە، ئەمە هەنگاوی ئیجابی یەكەمە ودەبێتە خاڵی سەرەتاو بنەڕەتی و ڕێخۆشكەر بێت بۆ نیشاندانی ئیرادەی سیاسی دەسبەكاربوون بۆ چاكسازی وچارەسەركردنی گەندەڵی كە كرۆكی داخوازی خۆپیشاندەران پێكدەهێنێ، بەڵام ئەگەر لەڕوانگەی مەرجە بابەتی و پێویستیە كردەییەكانی بەرجەستەبوونی ئیرادەی سیاسیەوە بڕوانینە وەڵامەكان لەماوەی ڕابردوودا، ئیرادەی سیاسی دەكاتە ئامادەیی و ئارەزووی نوخبەی حوكمڕانی ئەم هەرێمە بۆ وەرگرتنی ئەو بڕیارانەی كە وەڵامدەرەوەی خواست وداوای خۆپیشاندەران وجەماوەرە بەگشتی بۆ چاكسازی گشتی كە بەسەرهەموو لایەكی كۆمەڵگەی كوردستاندا ڕابگات، ئەو ئیرادەیە پێویستی بەم مەرجە پراكتیكیانەی خوارەوە هەیە:
1. وەرگرتنی بڕیار و پابەندبوونی حكومەت بەو پرۆژە دانپێنراوەی كەدانراوە بۆ چاكسازی وەك پرۆتۆكۆلێك لەنێوان حكومەت و دەسەڵاتی سیاسی هەرێم كەخاوەنی ئیرادەكەیە وجەماوەری خۆپیشاندەر یان كۆمەڵگە بەگشتی.
2. پابەندبوون بەو میكانیزمانەی بۆ جێبەجێكردنی پرۆژەی چاكسازیيە بڕیاردراوەكە دیاریكراون.
3.پابەندبوون بەموتابەعەكردنی ئیداری وسیاسی ویاسایی و هەڵگرتنی لەمپەڕ وگرفتەكانی سەر ڕێی ئەو پرۆژەیەی ئیرادەی سیاسی دەسەڵاتی هەرێم وەڵامدەرەوەی بووە.
4.پەرەپێدان وگۆڕینی میكانیزمەكان بەمەبەستی چوونە پێشەوەی پرۆسەكە.
5. پابەندی بەبەردەوامبوونی گەیاندنە جێی پرۆسەكە.

ئەگەر لەڕووی ئەو خاڵە پێویستیانەی بەرجەستە بوونی ئیرادەی سیاسیەوە بڕوانینە وەڵامەكان بۆچی نابنە هۆكاری هێورنەبوونەوە بەشی هەرەزۆری پەیوەستبوون بەناهەماهەنگی ولێكپچڕانی وەڵامدانەوەكانی قۆناخی ڕابردوو لەلایەن پێگە جیاوازەكانی دەسەڵاتی هەرێمەوە، پەرلەمان لە23/2دا پرۆژەیەكی 17خاڵی ڕاگەیاند، ئێمە لەیەكگرتوو تەبەنیمان كرد ولەڕووی كردەییەوە بەهیچ نەگەیشت، دواتر داخوازی خۆپیشاندەران لە28/2دا لەدووبەشی هەنووكەیی وبنەڕەتیدا لەمیانەی 37 خاڵدا بەنامەونامەكاری لەلایەن سەرۆكی حكومەتەوە وەڵامدرایەوە جێگەیەكی ئەوتۆی نەگرت، دواتر سەرۆكی هەرێم لەپاش گەڕانەوەی لەسەفەر هەندێك پێشنیاری گرنگی خستنەڕوو میكانیزمی بۆ نەسازێنرا، ئاخر خۆ ئیرادەی سیاسی وشەیەك نیيە هەروا لەخۆوە بوترێت موستەلزەماتی كردەیی خۆی هەیەونابێ بەرپرسانی هەرێم ڕێگەبدەن تەنيا بەگوتار ئەو ئیرادە سیاسیيە دەرببڕدرێت وببێتە قوربانی ململانێی هێزە سیاسیيەكان.
گفتوگۆی ڕاشكاوانەی لەگەڵ خۆپیشاندەران كە ئەنجومەنێكیان بۆ خۆیان دەسنیشانكردوە هەروەها لەتەك هەموو هێزەكان بێ لەبەرچاوگرتنی هیچ جۆرە حەساسیەت و باسوخواسی تەنازولكردن یان گوێدانە ڕەنگ ودەنگێك بۆ گەيشتنە پرۆژەیەكی چاكسازی نیشتمانی هی هەمووان بێت و گوزارشت لەم كۆدەنگیە نیشتمانیەی چاكسازی بكات. )) ئەمە دیدی یەكگرتوویی ئیسلامی كوردستان بۆ هێوركردنەوەی باردۆخەكە پیشاندەدات.
هەروەها سەبارەت بە هەڵوێستی كۆمەڵی ئیسلامیش پرسیارمان لە عەبدولستار مەجید ئەندامی مەكتەبی سیاسیی كۆمەڵی ئیسلامی كرد و سەبارەت بەچۆنییەتی هێوركردنەوەی بارودۆخەكە بەمجۆرە ڕای لایەنەكەی خۆی بۆ گوڵان خستەڕوو: ((پێموایە هەرێمی كوردستانیش وەكو هەندێ وڵاتانی دیكە، لە ژیانی سیاسی و كۆمەڵایەتی كۆمەڵگەی كوردەواریماندا بەقۆناغێكی نوێ تێدەپەڕێت، ئەم قۆناغە نوێیەش پێویستی بەهەڵسوكەوت و مامەڵەیەكی نوێ هەیە، بۆیە دەبێ بەرپرسانی هەرێم بەدەسەڵات و ئۆپۆزسێونەوە زۆر بە وردی و واقیعبینانە و بە دڵسۆزی و خەمخۆری و بوێرانە مامەڵە لەگەڵ ئەم بارودۆخە بكەن، بەڵام كۆتاییهێنان بەم خۆپیشاندانانەش كە جار جار هەڵیشكشاوە بۆ ئاڵۆزی، بەلایەنی بە دەسەڵات دەكرێت، واتە (حكومەت و سەرۆكایەتی هەرێم و پەرلەمان) ئەوان دەتوانن كۆتایی بەو خۆپیشاندانانە بێنن، ئەویش بەوە دەبێ كە وەڵامی داوا ڕەواكانی خۆپیشاندەران بەكردار بدەنەوە، چونكە ئەوەی تا ئێستا گوێمان لێ بووە لە وەڵامەكان پڕۆژەی باش پێشكەش كراوە، وەڵامەكانی سەرۆكایەتی هەرێم و حكومەت و پەرلەمان لە (17) خاڵەكەی خۆیدا وەڵامی باشبوون، بەڵام ئەو بڕیار و وەڵامانە تا ئێستا نەكەوتۆتە چوارچێوەی جێبەجێكردن، بۆیە تاكە ڕێگە بۆ رزگاربوون لەم بارودۆخە وەڵامی ئیجابی بەرپرسانەی بەرپرسانی هەرێمە بۆ خۆپیشاندەران و پڕۆژەی ئۆپۆزسیۆن.
سەبارەت بەپڕۆژەكەی جەنابی سەرۆكی هەرێمیش، ئێمە پێمانوایە هەندێك كەموكوڕی تێدایە، بەتایبەتی لە یاسای خۆپیشاندان و لەو بڕگەیەی باسی دەستگیركردن دەكات، كە لە خاڵی پێنجەمدا هەموو ئەوانە دەگرێتەوە كە هاندان و خاوەنداریەتی خۆپیشاندانەكانیان كردووە، چونكە خۆپیشاندانی نایاسایی و بێ مۆڵەت بووە. هەروەها خاڵێكی تر ناكرێت هەركەسێك بە هەر بیانوێك تەقە بكات و خەڵك بكوژێت و بریندار بكات، بەڵام دەستگیر نەكرێت و لێكۆڵینەوەی لەگەڵ ئەنجام نەدرێت، كەچی یەكێك تەنیا دوو قسەی كردووە بگیرێت، بەبڕوای ئێمە ڕەوشەكە ناسكە، بۆیە پێویست بوو ئەو كۆبوونەوانەی كە لەنێوان ئەندامانی مەكتەبی سیاسی پارتی و یەكێتی كە بەتەنیا لەگەڵ هەر یەك لە كۆمەڵی ئیسلامی و یەكگرتوو و گۆڕان ئەنجام دەدرا تەفعیل بكرابووایە و بەردەوام برەویان پێ بدرابووایە، تاوەكو لەكۆتاییدا هەموومان بە پڕۆژەیەك یان ئەنجامێك بگەیشتبوواین كە چارەسەری كێشە و گرفتەكانی بكردبوایە، سەرەڕای ئەوەش ئێمە هەرسێ لایەنی ئۆپۆزسیۆن داوای هەڵوەشاندنەوەی حكومەتمان كردووە، گەرچی ئێستاش دەڵێین و ئامادەین كە بەیەكەوە پێنج قۆڵی دابنیشین و لەسەر ئەو پڕۆژەیەی هەمانە رێك بكەوین بۆ ئەوەی ئەو قەیرانەی كە هەیە چارەسەر ببێت و داواكاری خۆپیشاندەران بێتەدی و رزگارمان بێت، چونكە ئەو بارودۆخە بۆ هەموو لایەكمان ناخۆشە. خۆمان بەخەمخۆر و دڵسۆزی جەماوەر و میللەت و وڵات و كوردستان و حكومەت و پەرلەمان دەزانین، هەر هەنگاو و نەخشەڕێگەیەك ببێتە مایەی چارەسەری كێشە و گرفتەكان و رزگاربوون لەم قەیرانە، ئێمە دڵسۆزانە و بوێرانە دێینە پێش و لەم قۆناغەدا پێمانوایە ئەوەی ئێستا ئۆپۆزسیۆن پێشكەشی كردووە بریتییە لە پڕۆژەیەكی (22) خاڵی كەدوا خاڵی داوای هەڵوشانەوەی حكومەت دەكات، ئەوە مانای ئەوە نییە كە دژایەتی حكومەت دەكەین، بەڵكو پێمانوایە ئەو حكومەتە لەم قۆناغەدا نەیتوانیوە ئەركی خۆی جێبەجێ بكات، بۆیە پێمان باشە ئەو حكومەتە هەڵبوەشێتەوە و حكومەتێك بەتەوافوق دروست بكەین كە وەكو ئەوەی برادەرانی پارتی دەڵێن حكومەتێكی بنكە فراوان بێت كە لەئاستی داواكاری جەماوەر و پڕۆژە و داواڕەواكانی خۆپیشاندەران و ئۆپۆزسیۆن بێت، ئەمەش تاكە ڕێگەیە بۆ چارەسەركردنی كێشەكان و ئەو بارودۆخەی ئێستا هەیە)).

بەڵام لەبەرامبەردا جەعفەر ئیمنكی ئەندامی مەكتەبی سیاسیی پارتی دیموكراتی كوردستان و ئەندامی شاندی پارتی و یەكێتی بۆ دانیشتن لەگەڵ هەرسێ لایەنەكەی ئۆپۆزسیۆن، سەبارەت بەدیدی پارتی و یەكێتی بۆ هێوركردنەوەی بارودۆخەكە لەلێدوانێكی تایبەتدا بۆ گوڵان بەمجۆرە هاتە ئاخاوتن:(بێگومان وەك دیارە مەبەستمان هێوركردنەوەیە و دەمانەوێت باشتر و وردتر لە داواكاریی خۆپیشاندەران تێبگەین، بۆ ئەمەش دەبێت هەردوو لامان (پارتی و یەكێتی و نوێنەرانی خۆپیشاندەران)پێكەوە دیالۆگ ئەنجام بدەین، بەڵام ئەگەر راستەوخۆ و لەنزیكەوە دیالۆگ لەنێوان ئێمە و خۆپیشاندەران نەبێت، ئەوە درەنگتر یان كەمتر لەیەك حاڵی دەبین. هەروەها لەگەڵ ئەوەی ئێمە بەردەوام داواكاری خۆپیشاندەرانمان پێدەگات و وەڵامیشیان دەدەینەوە، بەڵام دیارە تائێستاش لێكحاڵی نەبوونێك لەنێوانماندا هەیە، هەربۆیە و بۆ ئەوەی باشتر لە یەكتری تێبگەین، پێویستە پێكەوە دابنیشین و وتووێژی راستەوخۆ لەگەڵ سەرۆكایەتی هەرێم و حكومەت و پەرلەمان دەست پێبكات و داواكاریەكانیان وردتر بخەنەڕوو بۆ ئەوەی باشتر وتووێژی لەسەر بكەین، ئەمەش لەبەر ئەوەیە ناكرێت تەنیا لەسەر سەكۆیەكەوە یان لەڕێگەی میدیاوە داواكاریەكانیان باس بكەن بەبێ ئەوەی بێنە پێشەوەو وتووێژی لەسەر بكەین، هەر ئەمەش وایكردووە وەڵامەكانی ئێمەش بە وردی بەوان نەگات، چونكە لەگەڵ یەك دانەنیشتووین، بۆیە زۆر پێویستە دیالۆگێكی بەهێزتر لە نێوان ئێمە و خۆپیشاندەران دروست بێت و باوەڕی ئێمە ئەوەیە كە پێویستە هەردوو لامان زیاتر هەنگاو بنێین بۆ هێوركردنەوەی بارودۆخەكە نەك بەرەو تەفعیلكردنی بارودۆخەكە)).
هەر سەبارەت بەهێوركردنەوەی بارودۆخەكە و هەوڵە هەمەلایەنەكانی لایەنەكانی ئۆپۆزسیۆن و دەسەڵات بۆ ئەوەی بتوانن پێكەوە بگەنە پڕۆژەیەكی هاوبەش بۆ ئەوەی ئەم قەیرانە تێپەڕێنرێت، جەعفەر ئیمنكی وتی: (لێرەدا هەست دەكەین لایەنی ئۆپۆزسیۆن زیاتر شێوازی مەرجدار و فشار بەكاردەهێنن، ئەمە لەبری ئەوەی بێن لەگەڵ یەك گفتوگۆ بكەین بۆ ئەوەی وردتر لەسەر داواكاری خۆپیشاندەران و ئۆپۆزسیۆن بكۆڵینەوە، پێكەوە بەهاوبەشی میكانیزمێك دابڕێژین و پێكەوە جێبەجێی بكەین، بەپێچەوانەوە ئەوان دەیانەوێت بەدوور بەدووری داواكارییەكان ئاڕاستە بكەن، بەداخەوە من بەشی حاڵی خۆم وا تێدەگەم، ئەوان زیاتر مەبەستیانە رای گشتیی لە دژی پارتی و یەكێتی بوروژێنن، بۆیە ئومێد دەخوازم من لەمەدا بەهەڵەدا چووبم، بەڵام گۆڕانكاری و چاكسازی كاری هەموو لایەكمانە تەنیا كاری بەڕێز سەرۆكی هەرێمی كوردستان و پارتی و یەكێتی نییە، بەڵكو كاری ئۆپۆزسیۆنیشە، چونكە ئەوانیش لە حكومەت و پەرلەمان بەشدارن و بوونیان هەیە، هەروەها پێش كەمتر لە دووساڵ بەشی زۆری سەركردایەتی گۆڕان لە سلێمانی و ئیدارەی سلێمانی بەرپرس بوون و بەرپرسیاریەتیان لەسەر شان بووە، بۆیە دووبارە دەڵێم چاكسازی كاری هەموولایەكمانە، بەڵام ئەوەی دەیبینین ئەوەیە كە بەداخەوە ئۆپۆزسیۆن رۆڵی خۆی نەبینیووە كە دەتوانیت ڕۆڵێكی كاریگەرتر بۆ هێوركردنەوەی خۆپیشاندەران و بارودۆخەكە ببینێت، چونكە باوەڕناكەین تا ئێستا ڕۆڵی خۆیان بە باشی دیتبێت، بۆیە داوایان لێ دەكەین با ڕۆڵی خۆیان باشتر و كاریگەرتر ببینن لە هێوركردنەوەی خۆپیشاندەران و شەقام ئەمە لە لایەك، لە لایەكی تر ئێمە و ئەوان لە وڵاتێك دەژین كە سیستەمێكی دیموكراتی هەیە، دەبێ زمانی دیالۆگ و لێك تێگەیشتن بەهێز بكەین لەپێناوی ئەوەی ئەو ئەزموونە بەرەوپێشەوە ببەین)).
ئۆپۆزسیۆن و بایكۆتكردنی دانیشتنە ئاساییەكانی پەرلەمان
لایەنێكی دیكە كە ئەمڕۆ لایەنی ئۆپۆزسیۆن جەختی لەسەر دەكاتەوە ئەوەیە كە نابێت پەرلەمان دانیشتنی ئاسایی خۆی گرێبدات و دەبێت هەموو كۆبوونەوەكان نائاسایی بن و تایبەت بن بەبارودۆخی ئێستا، ئەمە لەكاتێكدایە ناكرێت پەرلەمان لەكاری ئاسایی خۆی پەكبخرێت و بەزۆری زۆرداری هەموو یاساكان پشتگوێ بخرێن، سەبارەت بەگرێدانی دانیشتنەكانی پەرلەمانی كوردستان بەشێوەیەكی ئاسایی پرسیارمان لەبەڕێز د.كەمال كەركوكی سەرۆكی پەرلەمانی كوردستان كرد، بۆچی دانیشتنەكان بە ئاسایی بەڕێوەدەبەن، لەكاتێكدا لایەنەكانی ئۆپۆزسیۆن داوا دەكەن دانیشتنەكان بەشێوەیەكی نائاسایی بەڕێوە بچن؟ لەوەڵامدا سەرۆكی پەرلەمانی كوردستان بەمجۆرە بۆ گوڵان هاتە ئاخاوتن:(سەبارەت بەدانیشتنەكانی پەرلەمانی كوردستان كەبەشێوەیەكی ئاسایی بەڕێوەدەچن، لەبەر ئەوەیە بەپێی یاسا و پەیڕەوی ناوخۆی پەرلەمان هەركاتێك نیسابی یاسایی تەواو بوو، واتە لەكۆی 111 پەرلەمانتار 56 پەرلەمانتار ئامادەبوو دانیشتنەكان بەشێوەیەكی ئاسایی بەڕێوە دەچن، خۆ ئەگەر لەم رێژەیەش كەمتر بوو، ئەوا پەرلەمان هەر دەتوانێت كۆبێتەوە و وتووێژ لەسەر بەرنامەی كاری خۆی بكات، بەڵام لەم حاڵەتەدا ناتوانرێت بڕیارەكە بخرێتە دەنگدانەوە، لەم بارودۆخەی ئێستاشدا بێگومان وەك هەموو لایەك ئاگادارە نیسابی یاسایی پەرلەمان تەواو بووە و بەرنامەی كار ئامادەبووە، بۆیە بەشێوەیەكی ئاسایی كۆبوونەوەكان بەڕێوەچوون، هەروەها ئەندامی پەرلەمان نوێنەری خەڵكن و خەڵك دەنگی پێداون، بۆیە كاتێك پەرلەمان كۆبوونەوە بكات و ئەو ئامادە نەبێت بەشداری لەكۆبوونەوەكان بكات، ئەوا غەدر لەو خەڵكە دەكات كە ئەو نوێنەرایەتییان دەكات)).

هەر لەدرێژەی لێدوانەكەی بۆ گوڵان و سەبارەت بە گرێدانی كۆبوونەوەی نائاسایی كە پێشتر پەرلەمانی كوردستان بۆ قسەكردن لەسەر بارودۆخەكە گرێداوە، بەڕێز سەرۆكی پەرلەمانی كوردستان وتی:(ئەگەر پەرلەمانی كوردستان لەپشووی خۆیدا بێت و بارودۆخێك بێتە پێشەوە و پێویست بوو پەرلەمان لەسەری كۆبێتەوە، ئەوا دیسان بەپێی یاسا و پەیڕەوی ناوخۆی پەرلەمان دانیشتنی نائاسایی گرێدەدەین، بەڵام دوای ئەوەی كە خولی تازەی پەرلەمان دەست پێدەكاتەوە و بەرنامەی كار لەبەردەست بوو، ئەوا دانیشتنەكان بەپێی یاسا بە شێوەیەكی ئاسایی بەڕێوەدەچن، بەڵام دیسان ئەگەر مەسەلەیەك هاتە پێشەوە و لەدەرەوەی بەرنامەی كار بوو، بۆ نموونە وەك داواكردن بۆ ئامادەبوونی وەزیری پێشمەرگە كە بڕیارە پەرلەمان رۆژی یەكشەمە بانگهێشتی بكات ئەوە كۆبوونەوەی نائاسایی گرێدەدەین، رۆژی چوارشەمەی دادێ وەزیری ناوخۆی حكومەتی هەرێمی كوردستان بانگهێشت دەكرێت).
سەبارەت بە پڕۆژە 17 خاڵیەكەی پەرلەمانیش كە بزووتنەوەی گۆڕان بەو جۆرە ناوی دەبات پەكخراوە یان جێبەجێ ناكرێت، سەرۆكی پەرلەمانی كوردستان سەبارەت بەم پرسەش وتی: (پڕۆژە 17 خاڵیەكەی پەرلەمان بەزۆرینەی دەنگی ئەندامانی پەرلەمان پەسەندكراوە، بۆیە ئەم پڕۆژەیە كاری لەسەر دەكرێت و چەند خاڵێكی كاری لەسەر كراوە و هەندێكی دیكەی لیژنەكانی پەرلەمانمان راسپاردوە كاری لەسەر بكەن و بەدواداچوونی لەسەر بكەن، هەروەها هەندێك خاڵی دیكەشی پێویستی بەكاركردن هەیە لەدەرەوەی پەرلەمان، بۆیە بەهیچ جۆرێك پڕۆژە 17 خاڵییەكە پەكنەخراوە و كاری جددی لەسەر دەكرێت، بەڵام هەندێك لەو خاڵانە پێویستی بەكات و ئیشی زیاترە)).
ئەوەی سەرۆكی پەرلەمانی كوردستان لە وتەكانی بۆ گوڵان ئاماژەی پێكرد، بەوجۆرەیە كە دانیشتنە ئاساییەكانی پەرلەمان بەپێی یاسا و پەیڕەوی ناوخۆی پەرلەمان بەڕێوە دەچێت و ئەگەر مەسەلەیەكیش هەبێت كە پێویست بكات پەرلەمان كۆبوونەوەی نائاسایی لەسەر گرێبدات، ئەوا زۆر ئاساییانە كۆبوونەوەی نائاسایی لەسەر دەكرێت، وەك ئەو كۆبوونەوانەی كە بڕیارە هەر لەم هەفتەیە بۆ بانگهێشتكردنی هەردوو وەزیری ناوخۆ و پێشمەرگە گرێبدرێن، بۆیە لەم چوارچێوەیەدا و سەبارەت بە بایكۆتكردنی دانیشتنە ئاساییەكانی پەرلەمان لەلایەن پەرلەمانتارانی ئۆپۆزسیۆنەوە، پرسیارمان لە یوسف محەمەد بەڕێوەبەری ناوەنی توێژینەوەی سیاسی بزووتنەوەی گۆڕان كرد، بەڕێزی بەمجۆرە وەڵامی داینەوە و وتی: (لەكاتێكدا خەڵك لەسەر شەقامە و داخوازی هەیە و یاسا جێبەجێ ناكرێت و خەڵك بەشێوەیەكی نایاسایی دراوەتە بەرگوللە و دەستگیر نەكراون، گەرچی خەڵكانێ هەنە لە لایەن دادگاكانەوە بڕیاری دەستگیركردنیان دەرچووە، بەڵام ناچنە بەردەمی دادگا و دەیانشارنەوە، لەو كاتەدا دەبێت پەرلەمانی كوردستان بەدەم داخوازییەكانی خەڵكەوە بچێت و بەرگری لە هاووڵاتیانی هەرێمی كوردستان بكات نەك وەكو ئەوەی نەبای دیبێت و نەباران و دەچێت گفتوگۆ لەسەر شتە ڕۆتینیەكان دەكات و بیەوێت بودجە تێپەڕێنێت كە بڕێكی زۆری لە پارەی خەڵكی كوردستانی لە تاریكی هێشتۆتەوە و چەندین پڕۆژەی وەهمی تێدایە، بەڕاستی پەرلەمانێك كە لەگەڵ داخوازییە هەنوكەییەكانی هاووڵاتیان نەجووڵێتەوە ئەوە هێزەكانی ئۆپۆزسیۆن هەقی خۆیانە رەخنە لە ئەدای پەرلەمان بگرن و هەڵوێست وەربگرن.
هەروەها سەرۆكایەتی ئەو پەرلەمانە رێز لەو پەیڕەوە ناوخۆیەی پەرلەمانە ناگرێت كە نزیكەی (20)ساڵە دانراوە هەتا ئێستا گۆڕانكاری تێدا نەكراوە و بەپێی ئەو پەیڕەوە ئەجیندای پەرلەمان دیاری دەكرێت و كات و ساتەكانی دانیشتنەكان دیاری دەكرێت نەك بەپێی زەوق و ئارەزووی سەرۆكایەتی پەرلەمان و هەردوو حزبی دەسەڵات، بەرنامەی كاری پەرلەمان بەدەمەوەچوونی داوا و داخوازییەكانی خەڵك و خۆپیشاندەران بوو نەك بودجە و شتی تر كە ئێستا دانیشتنی بۆ ئەنجام دەدەن، ئەمەش كارێكی نایاساییە)).
سەبارەت بەتێكەڵاوكردنی خواست و داوای خۆپیشاندەران و ئەجیندای سیاسیی لایەنەكانی ئۆپۆزسیۆنیش پرسیارمان لە یوسف محەمەد كرد و لێمان پرسی ئایا باشتر نییە كە ئەم دوو شتە لەیەكتری جیابكرێنەوە؟ لەوەڵامدا وتی:(ئەوە روانینی دەسەڵاتی سیاسییە كە پێیوایە پێویستە خواستی خۆپیشاندەران و ئەجیندای ئۆپۆزسیۆن جیاواز بێت، چونكە دەسەڵاتی سیاسی لەلایەكە و جەماوەری هەرێمی كوردستان لەلایەكی ترن، ئەوان لەسەرگردەكان خانوویان دروستكردووە و لەگەڕەكە راقیەكانی شارە گەورەكان دەژین و نازانن بێكارەبایی و بێ ئاوی چییەو...، بەڵام هێزە ئۆپۆزسیۆنەكان و بەشی زۆری سەركردەكانی هێزە ئۆپۆزسیۆنەكان وەكو ئەوان نین، لەناو خەڵكەكە دەژین و بەشێكی زۆریان كرێچین و سووتەمەنیان نییە و دەزانن بێ پارەیی چییە و دەزانن بێ ئیشی ئازاری چەندە و. بۆیە جیاواز نین لەگەڵ خەڵك و لەگەڵ خواستەكانی جەماوەر دەژین و لەگەڵ خوپیشاندەران یەكين، هەروەها دەمەوێت بڵێم تەنیا بەپشتگیری و تەبەنیكردنی رای جەماوەرە ئۆپۆزسیۆن بەزیندوویی دەمێنێتەوە. هەر كاتێك بزووتنەوەی گۆڕان پشت لە شەقام و جەماوەر و خەڵك بكات مانای وایە ئینتیحار دەكات، بۆیە جەماوەر و هێزە ئۆپۆزسیۆنەكان لێك ناترازێن و یەكن)).
ئەوەی لە قسەكانی یوسف محەمەد دەردەكەوێت كە بایكۆتكردنی كۆبوونەوەكانی پەرلەمان لەلایەن پەرلەمانتارانی بزووتنەوەی گۆڕانەوە بڕیاریكی مەركەزی سەركردایەتی گۆڕانە، هەربۆیە پرسیاریشمان لە عەبدولستار مەجید ئەندامی مەكتەبی سیاسی كۆمەڵی ئیسلامی كرد سەبارەت بە بایكۆتی دانیشتنە ئاساییەكانی پەرلەمان و لەمبارەوە بەگوڵانی راگەیاند:(ئێمە وەكو كۆمەڵی ئیسلامی تاراددەیەكی زۆر پەرلەمانتارانمان لەهەڵوێست و بڕیاردان لەسەر بابەت و مەسەلە هەنووكەییەكان لەپەرلەمان ئازادن، بەڵام بەگشتی لەگەڵ ئەوەین كە پەرلەمانتارەكانی ئێمە لە لیستی فراكسیۆنی كۆمەڵی ئیسلامی لەكۆبوونەوەكانی پەرلەمان بەشداربن، بەڵام ئەوەش بەوە دەبێت كە سەرۆكایەتی پەرلەمان پرس و را لەسەر هەموو بابەتەكان بەهەموو لایەنەكان بكات،)) سەبارەت بەجیاكردنەوەی خواستەكانی خۆپیشاندەران و ئەجیندای ئۆپۆزسیۆن و بەشداریان لە پرۆسەی چاكسازی و داڕشتنی میكانیزمێك بۆ چارەسەركردنی دیاردەی گەندەڵی، ئەندامی مەكتەبی سیاسی كۆمەڵی ئیسلامی وتی:(ئێمە نەمانگوتووە لە داڕشتنی میكانیزم بۆ رووبەڕووبوونەوەی گەندەڵی بەشداری ناكەین، ئەو كاتەی جەنابی كاك مسعود بارزانی داوای ئەم پڕۆژەیەی كرد، ئێمە پڕۆژەیەكمان ئامادەكرد، بەڵام جەنابیان سەفەری كرد، تا ئەویش هاتەوە ئەو بارودۆخە نوێیەی بەسەرداهات و ئەو كاتەش ئەو بارودۆخە لەوە گەورەتر بوو لەوەی بێن باسی پڕۆژەیەكی گەندەڵی بكەین، ئێستاش جیاوازییەكی ئەوتۆ لە نێوان داوا رەواكانی خۆپیشاندەران و پڕۆژەكانی ئۆپۆزسێون بۆ گۆرانكاری و چاكسازی نییە، چونكە ئۆپۆزسێون دەمێكە داوای گۆڕانكاری كردووە و پڕۆژە و یاداشتی بۆ چاكسازی و گۆڕانكاری پێشكەش كردووە، ئەوەی ئێستاكە سەریهڵداوە لە ئەنجامی بەهەند وەرنەگرتنی داواكاری و پڕۆژەكانی ئۆپۆزسێونە و لە نزیكەوە لەگەڵ ئەندامانی مەكتەبی سیاسی پارتی دیموكراتی كوردستان و یەكێتی نیشتمانی كوردستان و جەنابی سەرۆكی هەرێم و حكومەت و سەرۆكایەتی پەرلەمان بەوردی و بەتێروتەسەل باسی ئەو قەزایانەمان كردووە كە كێشە و گرفتن و پێویستیان بە چارەسەری بنەڕەتی هەیە، بەبۆچوونی من دەبێ ئۆپۆزسیۆنیش هەوڵبدات ئەو دەنگە ناڕەزاییانەی لە وڵات هەیە رێكیانبخات و خاوەنداری بكات بۆ چاككردن و گۆڕانكاری باش لە هەرێمدا كە بەشێوەیەك بێت هاووڵاتیان پێی رازی بن و ئومێدیان پێی هەبێت و دڵیان پێی خۆش بێت. دیسان دەڵێم ئەم قۆناغەمان پێویستی بە ڕووبەڕووبوونەوەیەكی بوێرانە هەیە لەلایەن دەسەڵاتەوە، واتە دەسەڵات زۆر بەئاسایی و بوێرانە بێت و دەست بەگۆڕانكاری گەورەگەورە بكات كە لەحەقیقەتدا لە قازانجی حكومەت و پەرلەمان و سەرۆكایەتی هەرێم و خەڵك و جەماوەرو ئۆپۆزسیۆنیشە، دووبارە دەڵێم ئێمە پڕۆژەمان ئامادەكردبوو و بڕیاریشمان دابوو كە لە ڕووبەڕووبوونەوەی گەندەڵی بەشداربین، ئێستاش ئامادە و هاوكارین بۆ بەشداری كردن لە گوڕانكاری و چاكسازی و بەرەنگاربوونەوەی گەندەڵی بەشێوەیەكی بەرفراوان و ڕیشەیی، ئەو كاتە ئەگەر هەموو گەندەڵی و گەندەڵكارانیش كۆتایی نەیەت، ئەوە بەشێكی زۆر بنبڕ دەكرێت و نامێنن)).
هەر لەچوارچێوەی ئەم پرسە و بایكۆتكردن و ئامادەنەبوونی پەرلەمانتارانی ئۆپۆزسيۆن لە دانیشتنە ئاساییەكاندا، مەولود باوە مراد ئەندامی مەكتەبی سیاسی یەكگرتووی ئیسلامی بەمجۆرەی رای خۆی دەربڕی : (وادەزانم لەبەرئەوەی ئەوان ئاسۆكانی كارایی وكاریگەرییان لەسەر ڕووداوەكان وچارەسەركان لەبەردەم داخراوە ناچارن پەنا بۆ هەموو وەسیلەیەكی پەرلەمانی بەرن تا لەبەردەم دەنگدەرانیاندا تووشی ئیحراجی نەبن ئەگینا هێوركردنەوە بەوان ناكرێت، بە ئیرادەی سیاسی كۆی دەسەڵات دەكرێت لەهەرێمدا. هەروەها لەئێستادا لەبری گفتوگۆی پێویست، ولێكگەیشتنی هاوبەش بۆ دۆزینەوەی خیارەكانی چارەسەر و دانانی میكانیزمی گونجاو و دووركەوتنەوە لە ئەگەرەكانی تەشەنەكردنی گرفتەكان، جۆرێك لەدابڕان وسەنگەر لەیەكگرتن هەیە كەپێویستە موبادەرەیەك بۆ سەرلەنوێ كۆكردنەوەی هەموو لایەنەكان لە دایەلۆگێكی سیاسی نیشتمانیدا بكرێت.))
لەدرێژەی پرسیارەكانی گوڵان بۆ باوەمراد، پرسیاری ئەوەمان لێكرد بۆچی ئۆپۆزسیۆن ئەجیندای خۆی تێكەڵاوی خۆپیشاندەران كردووە و ئامادەنین بەشداری لەپرۆژەكانی چاكسازیدا بكەن؟ لەوەڵامدا بەمجۆرە رای خۆی خستەڕوو: (ئەم سێ لایەنە، كە ئێمە لەیەكگرتوو لایەنێكین تیایدا خیاری ئۆپۆزسیۆن بوونمان هەڵبژاردووە لەم خولەی پەرلەماندا و ئاشكرایە ولەهەموو دنیادا وایە خیاری ئۆپۆزسیۆن واتای مانەوە لەگەڵ جەماوەر بۆ كەسبكردنی دەنگی شەقام وگوڕخواردنەوە بۆ نۆرەیەكی تری هاتنەوە بەردەمی جەماوەر لەهەڵبژاردنە گشتیيەكاندا بەمەبەستی بردنەوەی دەنگەكانیان، هەروەها جەماوەر یەكێكە لە ڕەگەزە پێكهێنەرە سەرەكیەكانی حزب چ لەدەسەڵات بێت یان ئۆپۆزسیۆن، ئەم دابڕانە لە ئەجيندادا نەك هەر ناكرێ ونابێ ... ئێستەش چارەسەر گفتوگۆیە بۆ پێكهێنانی پرۆژەیەكی چاكسازی نیشتمانی كە هی هیچمان نەبێ وهی هەموومان بێت، بەڵام مەرجی سەرەكی ئەوەیە ئەو قەناعەتەمان لادروست ببێت كە كوردستان كەوتووەتە قۆناغێكی سیاسی نوێوە، كەرەسە وبیر ومیكانیزم وسیستمی نوێی ئیدارەكردنی پێویستە.)) سەبارەت بەهەڵوێستیشیان سەبارەت بە پرۆژانەی بۆ چاكسازی خراوەنەتە روو باوەمراد دەڵێت : (لەبەر ئەوەی تەواوی میكانیزمە قەزایی وئیداریيەكان لەدەست دەسەڵاتدایە وادەزانم ئەگەر ئەرك و بەرپرسیاریەتیەك ڕووبكاتە هەرلایەنێك لەسەر مێزی بەیەكگەشتنەوەی گفتوگۆی چارەسەر كەس نكوڵی لێ ناكات. بەڵام مەسئولیەتی سەرۆكی هەرێم وەك بەرپرسی یەكەمی هەڕەمی دەسەڵات لەم هەرێمەدا لەئەمڕۆدا لەوەندەدا تەواو نابێت كە بەش وبازنەیەك یان پانتاییەكی دیاریكراو لە وەڵامدانەوەی داخوازی خۆپیشاندەران یان پرۆسەی چاكسازی بگرێتەبەر بەڵكو وەك لەهەموو گوتارەكانیدا ئاماژەی بەكۆی خاڵە پێویستەكانی پرۆسەی چاكسازی كردوە هەوڵی بەرهەمهێنانی پرۆژەیەكی نیشتمانی چاكسازی بدات كە كۆدەنگی هەمەلایەنەی لەسەربێت و بەنەتیجە بكاتە پرۆژەی هەرێمەكە))
جەعفەر ئیمنكیش وەك ئەندامی مەكتەبی سیاسیی پارتی دیموكراتی كوردستان، ئامادەنەبوون یان بایكۆتكردنی دانیشتنە ئاساییەكانی پەرلەمان لەلایەن پەرلەمانتارانی ئۆپۆزسیۆنەوە، بەهەوڵێكی دیكەی لێك دووركەتنەوە و لەیەكتری نەگەیشتن لەقەڵەمدا و لەمبارەوە بەمجۆرە رای خۆی بۆ گوڵان خستەڕوو و وتی: (ئەوەی ئێستا دەیبینین ئەوەیە كە ئۆپۆزسیۆن دوور بە دوور زۆر پەنا بۆ بەیاننامە دەبەن، لەبری گفتوگۆ و كۆوبوونەوەی سێ قۆڵی و پێنچ قۆڵی، ئەمە لەلایەك، لەلایەكی دیكە بەشداری نەكردنیان لە دانیشتنە ئاساییەكانی پەرلەمان وایكردووە زیاتر لێك تێنەگەین، بۆیە ئەم دوو ئاماژەیە، بەمەترسی دەزانین و هەربۆیە لایەنی ئۆپۆزسیۆن لەبری ئەوەی بەشداری لە كۆبونەوە و دانیشتنی پەرلەمان بكەن و لەناو پەرلەمانەوە رەخنەی خۆیان بگرن و هەڵوێستی خۆیان پیشان بدەن، دەچن بەرێگەی میدیاكان و دەركردنی بەیاننامە رای خۆیان دەخەنە روو، بەڵام ئەگەر كۆبوونەوەكانی نێوانمان بەردەوامبووایە، ئەوا بەڕێككەوتن و ئامانجی باش دەگەیشتین. هەروەها ئەوان هەر داوا دەكەن ئێمە بەخۆدا بچینەوە و ئێمەش داوادەكەین با هەر هەموومان بەیەكەوە بەخۆدا بچینەوە، لەبەر ئەوەی ئەو گرفت و كێشانەی هەیە چارەسەری نەكەین دەبێتە مەترسی لەسەر ئاساییشی نەتەوەیی و هەر هەموومان نەك تەنیا دەسەڵات، بەڵكو لەسەر ئۆپۆزسیۆنیش)).
سەبارەت بەوەشی كە پارتی و یەكێتی دەیەوێت خواست و داواكاری خۆپیشاندان لە ئەجیندای لایەنەكان جیابكاتەوە، جەعفەر ئیمنیكی سەبارەت بەم پرسەش وتی: (ئۆپۆزسیۆن هەقی خۆیەتی چۆن داوای خۆی پێشكەش دەكات، ئەوان لە دیالۆگن وەكو ئێمەن چۆن ئێمە لە پەرلەمانین هەقی خۆمانە و ئیش دەكەین ئەوانیش هەقی خۆیانە لە پەرلەمان ئیش بكەن و رەخنە و پێشنیار لە حكومەت بگرن، بەڵام لەبارەی خۆپیشاندەران ئێمە وەكو پارتی دیموكراتی كوردستان و دەتوانم بەناوی یەكێتی نیشتمانی كوردستانیش قسە بكەم، داواكاری خۆپیشاندەرانمان بەڕەوا زانیوە و بەڕەواشی دەزانین، ئەگەر هەندێ لەو داوكارییانە جێگەی خۆشی نەبێت ئەوە ئێمە تێدەگەین ئەوان خۆپیشاندەرن و بۆی هەیە داوایەك بەشێوەیەك بخەنەڕوو بەناوی داوایەكی درێژخایەن و هەنووكەیی، بۆیە ئێمە تێدەگەین و وەڵامیان دەدەینەوە و بۆیان جێبەجێ دەكەین، بەڵام هەندێ لەو داواكاریانە پێویستی بەمیكانیزم و تەفعیلكردنی حكومەتە، خۆپیشاندەر خۆ لایەنێكی سیاسی نییە، بۆیە دەبێ ئەو داواكارییانە بەلایەنێكی سیاسی بدرێت و ئەو لایەنە سیاسییەش میكانیزمێك لە حكومڕانی بەكاربێنێ بۆ تەفعیل كردنی حكومەت، بۆ نموونە یەكێك لەمانە چاكسازییەكانە ئەو بابەتە زۆر سادە و ئاسان نییە هەر بڵێ بە بەیاننامەیەك داوا دەكەم و دەبێ لە ڕۆژی دووەم حكومەت جێبەجێی بكات، چونكە ئەوە پێویستی بەكات و میكانیزم و ئالییەتی دیموكراسی هەیە و هەندێكی دەبێ پەرلەمان گفتوگۆی لەسەر بكات و یاسای بۆ دەربچێت، لێرەدا ئێمە بڕوامان بەوە هەیە كەخۆپیشاندەران بەنیازێكی دیار و پاك ئەو كارە دەكەن و بەیاننامەكەشیان رەوایە، لێرەدا دەبێ بۆ لایەنی بەرامبەریش باوەڕی بەوە هەبێت كە نیاز پاكە و ئەو داواو ئامانجانە نەك تەنیا هی ئەوانە، بەڵكو هی ئێمەشە و تەنیا ئامڕازە كە لە نێوان ئێمە و ئەوان جیاوازە، بۆگەیشتن بە ئامانجێكی هاوبەشیش لەنێوان هەردوولادا پێویستمان بەوەیە هەردوو پێكەوە لەنزیكەوەو راستەوخۆ وتووێژ و دیالۆگ ساز بكەین)).