ئەوەی بیەوێت لەبەغدا دەسەڵاتدار بێت دەبێت حكومەتێك پێكبهێنێت تێڕوانین و خواستەكانی گەلی كوردستانی رەچاو كردبێت، ئەگەر نا جیا لەوەی ئەو حكومەتە سەركەوتوو نابێت، لەهەمانكاتدا شەرعیەتی نیشتمانی نابێت و گرنگترین پێكهاتەی سەرەكی كە ئەمرۆ لە پرۆسەی سیاسیی عێراقدا كوردە بەشداری تێدا ناكات، ئەم بۆچوونە رۆژ لەدوای رۆژ بە ئاستێك خۆی دەسەلمێنێت، كە هەموو لایەنەكانی عێراق بەتایبەتی ئەو لایەنانەی دەیانەوێت حكومەت پێكبهێنن رووبەرووی ئەو واقیعە دەبنەوە بەبێ رەچاوكردنی خواستەكانی كورد حكومەت پێكنایەت، ئەمەش بۆتە هۆكاری ئەوەی كە بۆ پێكهێنانی حكومەتێكی سەركەوتوو هەموو سەردانی كوردستان بكەن و بچنە لای سەرۆك بارزانی بۆ ئەوەی سەبارەت بە چۆنیەتی حكومەتی داهاتووی عێراق وتووێژ بكەن، بەڵام پرسیار لێرەدا ئەوەیە ئایا تێڕوانینەكانی كورد بۆ حكومەتی داهاتووی عێراق چین؟ ئایا خواست و تێڕوانینەكان بەو جۆرەن كە لایەنی بەرامبەر سازش بكات، یان داوای ئەوەی لێبكرێت لەبەرامبەر خواستەكانی كورد نەرمی بنوێنێت؟ ئەمە ئەو پرسیارە كە وەڵامێكی لۆژیكیانەی هەیە و لە هەمانكاتدا وەڵامێكی قورسیشە بۆ ئەوانەی لەسەر ریتمی پرۆسەی بونیادی دیموكراتی لەعێراق و جێبەجێكردنی دەستووری عێراق رانەهاتوون، هەربۆیە وەك نزار جەنابی لەم راپۆرتە جەختی لەسەر دەكاتەوە كە سیاسەتمەدارە عێراقییەكان بەتەواوەتی لە هونەری پیادەكردنی سیاسەت تێنەگەیشتوون، ئەوەی پێویستە بۆ سەرخستنی پرۆسە سیاسییەكە پێوەی پابەند نابن،هەروەها ئێمەش وەك گۆڤاری گوڵان لە زۆربەی دیمانەكانمان جەخت لەسەر وەرگرتنی راوبۆچوونی سیاسەتمەدار و لایەنە سەرەكییەكانی ناو پرۆسەی سیاسیی عێراق دەكەینەوە و لێیان دەپرسین ئایا تاچەند ئامادەباشیتان تێدایە كە وەڵامدانەوەیەكی ئیجابیانەتان بۆ پابەند بوون بە دەستووری عێراق هەبێت و هەوڵەكانتان بەو ئاراستەیە بێت حكومەتی داهاتووی عێراق لە چوارچێوەی ئەو دەستوورەدا پێكبهێنریت كە عێراقییەكان دەنگیان پێداوە؟ بێگومان ئەم پرسیارەی ئێمە دەیكەین هەمووی ئەو خواست و تێروانیانەی كورد لەخۆی دەگرێت كە پرۆسەی حكومەتی داهاتووی عێراق داوای دەكات، بەڵام كاتێك خۆ دزینەوە لە جێبەجێكردنی دەستوور یان هەوڵدان بۆ پشتگوێ خستنی ئەو مادانەی پەیوەندی بە خواستی كوردەوە هەیە، وەك مادەی 140 بۆ چارەسەركردنی كێشەی ناوچە جێ ناكۆكەكان، ئەوا ئەو كات دەبین سنوری دیالۆگ و لێكتێگەیشتن تەسك دەبێتەوە و خاڵی هاوبەش نامێنێت بۆ ئەوەی قسەی لەسەر بكرێت، بەڵام ئێستا هەموو لایەك بە لایەنی ئیدارەی ئەمەریكیشەوە كە لە پشتی پەردەوە رۆڵی سەرەكی لە سەرخستنی پرۆسەی سیاسیی عێراق و پێكهێنانی حكومەتی داهاتووی عێراق دەگێڕن، گەیشتوونە ئەو قەناعەتەی كە رێگەی دروست بۆ پێكهێنانی حكومەتێكی سەركەتوو و ئاییندەیەكی سەقامگیر بۆ عێراق، ئەو رێگەیەیە كە لەكوردستانەوە بۆ پێكهێنانی حكومەتی داهاتووی عێراق و سەرخستنی پرۆسەی سیاسیی و دابینكردنی ئاسایش و سەقامگیری دەخرێنە روو، بۆیە هەموو رێگەكان روو لە كوردستان دەكەن و هەر دەبێت لەو رێگەیەشەوە حكومەتی داهاتووی عێراق پێكبهێنریت و پرۆسەی سیاسیی لە عێراقدا سەركەوتن بەدەست بهێنێت.
