ئەمڕۆ پێنجشەممە بەرپرسێكی بازرگانیی عێراق ئاشكرای كرد لە وڵاتەكەدا 80 هەزار كۆمپانیا هەن، كە 60 هەزاریان وەهمیین و كێشەی زۆریان بۆ كەرتی تایبەت و ئابووریی وڵاتەكە دروست كردووە.

فیراس حەمدانی سەرۆكی ژووری بازرگانیی بەغدا ئاشكرای كرد لە عێراقدا 80 هەزار كۆمپانیا تۆمار كراون، كە تەنها 20 هەزاریان كۆمپانیان ڕاستیینەن و كار دەكەن، 60 هەزارەكەی تر كۆمپانیای وەهمیین و تەنها ناویان هەیە.

دەشڵێ ئەم كۆمپانیا وەهمیییانە قورساییەكی دارایی زۆریان لەسەر كەرتی تایبەت دروست كردووە و باری حكوومەتیشیان گران كردووە.

حەمدانی لە لێدوانێكی رۆژنامەوانیدا ئاماژەی بەوە دا كە ئەم كۆمپانیا وەهمیییانە قورساییەكی زۆریان دروست كردووە و پێویستە یاساكانی بازرگانی هەموار بكرێنەوە، دەبێ سیاسەتێكی نوێ بۆ كەمكردنەوەی ناونیشانە بازرگانییەكان پەیڕەو بكرێت.

ئەم بەرپرسەی بەغدا ئەوەشی ئاشكرا كردووە كە تا ئێستا نزیكەی 480 هەزار ناوی بازرگانی لە ژووری بازرگانی بەغدا، لە وەزارەتی بازرگانی و یەكێتی ژوورە بازرگانییەكانی عێراقدا تۆمار كراون.










باسنيووز