رابەری رەوتی سەدر رایگەیاند، حکومەتی عێراق لەبارەی دابینکردنی ڤاکسینی کۆرۆنا پابەندنەبو بە بەڵێنەکانی و کەمتەرخەمییەکی بەرچاوی هەبوە، بۆیە هەڵمەتێکی پەرلەمانی بەرامبەری دەستپێدەکەن و داوا دەکەن دابینکردنی ڤاکسین دوربێت لەدەستی گەندەڵی و هەژارانیش پێشینەی ئەو کەسانە بن کە پێیاندەدرێت.

پەیوەست بەدابینکردنی ڤاکسینی کۆرۆنا کەمتەرخەمییەکی بەرچاو لەلایەن حکومەتەوە هەیە

موقتەدا سەدر، رابەری رەوتی سەدر لەپەڕەی فەرمی خۆی لەتویتەر ئاماژەی بەوەشکردوە، پەیوەست بەدابینکردنی ڤاکسینی کۆرۆنا کەمتەرخەمییەکی بەرچاو لەلایەن حکومەتەوە هەیە و پابەندی بەڵێنەکانی نەبوە، بۆیە هەڵمەتێکی پەرلەمانی بەهێز بۆ لێپرسینەوە و بەدواداچون لەسەر ئەو بابەتە دەستپێدەکەن.

گەیشتنی ڤاکسین و دابینکردنی بێبەرامبەر بەواتای ئەوە نایەت کە بەردەستبونی دوردەبێت لەدەستی گەندەڵی

ئەوەشی خستوەتەڕو، گەیشتنی ڤاکسین و دابینکردنی بێبەرامبەر بەواتای ئەوە نایەت کە بەردەستبونی دوردەبێت لەدەستی گەندەڵی، بەکارهێنانی بودجەی گشتی بۆ بەرژەوەندی تایبەت و فرۆشتنەوەی ڤاکسینەکە لەبازاردا بەشێوەیەکی نایاسایی، هۆشداریش دەدەن و لەلایەنی یاساییەوە ئەرکی سەرشانیان جێبەجێدەکەن.

پێشنیاز دەکات دەستبکرێت بەناونوسینی هاوڵاتیان بۆ وەرگرتنی ڤاکسینەکە

رابەری رەوتی سەدر پێشنیاز دەکات دەستبکرێت بەناونوسینی هاوڵاتیان بۆ وەرگرتنی ڤاکسینەکە و لەو ناوچانەوە دەستپێبکرێت کە هەژارن و زۆرتر مەترسی توشبونیان هەیە، هەروەها هەڵمەتی هۆشیاری بەردەوام بێت چونکە وەرگرتنی ڤاکسین بەواتای کۆتاییهاتنی پەتاکە نایەت و بەستنی دەمامک و خۆپارێزی وەک رێکارێکی خۆپارێزی پێویستە بەردەوام بن.










خەندان