باڵوێزی ڤاتیکان لە بەغدای پایتەختی عێراق، بەر لە سەردانەکەی پاپا، تووشی پەتای کۆرۆنا بوو.

بەپێی هەواڵی میدیا عێراقییەکان، ئەمڕۆ یەکشەممە 28-2-2021 میتجا لیسکۆڤار، باڵوێزی ڤاتیکان لە بەغدا رای گەیاندووە، کە ئەنجامی پشکنینەکەی دەری خستووە، تووشی پەتای کۆرۆنا بووە.

میتجا لیسکۆڤار هەروەها رای گەیاندووە، خۆی و ژمارەیەک لە کارمەندانی باڵوێزخانەکەی، خۆیان کەرەنتین کردووە.

باڵوێزی ڤاتیکان لە عێراق ئاماژەی بەوەش کردووە، کە تووشبوونیئەو بە پەتای کۆرۆنا هیچ گۆڕانکارییەک لە سەردانەکەی پاپا، دروست ناکات.

بڕیارە لە رۆژانی 5 تا 8-3-2021، پاپا فرانسیس، پاپای ڤاتیکان، سەردانی عێراق و هەرێمی کوردستان بکات.

بەرنامەی کاری سەردانەکەی پاپا:

- رۆژی 5-3-2021 دەگاتە فڕۆکەخانەی بەغدا و لەوێ لەگەڵ مستەفا کازمیی سەرۆک وەزیرانی عێراق کۆ دەبێتەوە.

- رۆژی 6-3-2021 سەردانی نەجەف دەکات و لەگەڵ ئایەتوڵا عەلی سیستانی، مەرجەعی باڵای شیعەکانی عێراق کۆ دەبێتەوە و دواتر سەردانی شوێنەواری ئور لە پارێزگای زیقار دەکات.

- رۆژی 7-3-2021 لەڕێی فڕۆکەخانەی نێودەوڵەتیی هەولێرەوە سەردانی هەرێمی کوردستان دەکات و هەر لە فڕۆکەخانە لەگەڵ بەرپرسانی باڵای هەرێمی کوردستان کۆ دەبێتەوە.

- هەر هەمان رۆژ سەردانی مووسڵ دەکات و دواتر دەچێتە ناوچەی قەرەقۆش و دواتریش دەگەڕێتەوە هەولێر.

- ئێوارەی ئەو رۆژە لە یارگای نێودەوڵەتیی شەهید فرەنسۆ هەریری قەداسێک ساز دەکات.

- دوای قەداسەکە لە هەولێر، دەگەڕێتەوە بەغدا و رۆژی دواتر (8-3-2021) دەگەڕێتەوە ڤاتیکان.






باسنیوز