وەزیری تەندروستیی عێراق: دووشەممەی داهاتوو ڤاکسین دەگات
حەسەن تەمیمی، وەزیری تەندروستی و ژینگەی عێراق بە ئاژانسی هەواڵی فەرمیی عێراقی راگەیاند "پێكوتەكەیش لە هەموو پارێزگاكانی عێراق بێبەرامبەر بە هاووڵاتییان دەدرێت."
لەبارەی بەرزبوونەوەی رێژەی تووشبوون بە كۆرۆنا، وەزیری تەندروستیی عێراق گوتی: "ئێمە لە بەرزبوونەوەی رێژەی تووشبوونی منداڵان بە ڤایرۆسی كۆرۆنا نیگەرانین. سەرجەم بڕیارەكانی تایبەت بە كۆرۆنایش دوور لە لایەنی سیاسی دەگیرێنەبەر."
هاوکات رۆژی سێشەممە 2021/02/23 وەزارەتی تەندروستیی عێراق ئاماری 24 كاژێری رابردووی تایبەت بە ڤایرۆسی كۆرۆنای بڵاوكردەوە و رایگەیاند، چوار هەزار و 181 تووشبووی دیكەی كۆرۆنا تۆماركراون و 16 تووشبوویش مردوون.
بەپێی راگەیێندراوی وەزارەتی تەندروستی لە ماوەی 24 كاژێری رابردوودا، دوو هەزار و 592 تووشبوویش چاكبوونەتەوە.
لەسەرەتای بڵاوبوونەوەی كۆرۆنا لە ئاداری ساڵی 2020ـەوە تاوەكو ئێستا 675 هەزار و 982 كەس لە عێراق تووشی كۆرۆنا بوون، لەو ژمارەیەیش 623 هەزار و 337 تووشبوو چاكبوونەتەوە، 13 هەزار و 331 تووشبوویش مردوون.
rudaw -
