ئه‌و شاره‌ى عه‌بادى پێش مانگێك ڕزگاركردنى ڕاگه‌یاند تائێستاش 200 چه‌كدارى داعشى تێدایه
له‌وباره‌یه‌وه، ئه‌حمه‌د خورشید، ئه‌ندامى ئه‌نجومه‌نى شارى حه‌ویجه، ڕای گه‌یاند: "شاره‌كه بووه به شارى تارماییه‌كان و كه‌سى تێدا ناژى".
ئاماژه‌ى به‌وه‌شدا، كه هه‌رچه‌نده ده‌یان و سه‌دان ئاواره بۆ شاره‌كه گه‌ڕاونه‌ته‌وه، به‌ڵام به‌هۆى نه‌بوونى خزمه‌تگوزارییه‌كان و بوونى ته‌قه‌مه‌نییه‌كى زۆر، وایكردووه ئاواره‌كان نه‌توانن بگه‌ڕێنه‌وه بۆ شاره‌كه‌یان"
هه‌روه‌ها گوتیشی: "ئه‌نجومه‌نه‌كه باره‌گاى خۆى كردووه‌ته‌وه، هه‌روه‌ها په‌روه‌رده كراوه‌ته‌وه و مامۆستاكان گه‌ڕاونه‌ته‌وه، به‌ڵام تائێستاش چه‌كدارانى داعش له چه‌ند گه‌ڕه‌كێكدا خۆیان حه‌شار داوه و ژماره‌یان نزیكه‌ى 200 چه‌كدار ده‌بێت، ئه‌وه‌ش مه‌ترسى دروست كردووه".
ئه‌مه‌ش له‌كاتێكدایه، كه زیاتر له مانگێكه حه‌یده‌ر عه‌بادى، سه‌رۆك وه‌زیرانى فیدڕال، ڕزگاركردنى شارى حه‌ویجه‌ى له داعش ڕاگه‌یاند كه زیاتر له سێ ساڵ ده‌بوو ئه‌و شاره داگیر كرابوو
باسنيوز
