سه‌رۆكی هه‌رێمی كوردستان پێشوازی له سه‌رۆك وه‌زیرانی عێراقی فیدراڵ ده‌كات
له فرۆكه‌كه‌خانه‌ی نێوه‌ده‌وڵه‌تی هه‌ولێر له‌لایه‌ن به‌رێز مه‌سعود بارزانی سه‌رۆكی هه‌رێمی كوردستان و دكتۆر رۆژ نوری شاوه‌یس جێگری سه‌رۆكی ئه‌نجوومه‌نی وه‌زیرانی عێراقی فیدراڵ و مه‌سروور بارزانی سه‌رۆكی ئاژانسی پاراستنی ئاسایشی هه‌رێمی كوردستان و دكتۆر فوئاد حوسێن سه‌رۆكی دیوانی سه‌رۆكایه‌تی هه‌رێمی كوردستان پێشوازیان لێكرا.
پاشان كۆبوونه‌وه‌یه‌ك له نێوان هه‌ردوو به‌رێزان مه‌سعود بارزانی سه‌رۆكی هه‌رێمی كوردستان و دكتۆر نوری ئه‌لمالیكی سه‌رۆك وه‌زیرانی عێراقی فیدراڵ به‌رێوه‌چوو كه تیایدا په‌یوه‌ندییه‌كانی نێوان حكوومه‌تی هه‌رێمی كوردستان و حكوومه‌تی فیدراڵ و چۆنییه‌تی مامه‌ڵه‌كردن له‌گه‌ڵ كێشه هه‌ڵواسراوه‌كانی نێوانیان خرایه به‌رباس و دواتریش به‌سه‌رپه‌رشتی سه‌رۆك بارزانی و دكتۆر نوری ئه‌لمالیكی ئه‌مینداری گشتی حزبی ده‌عوه ، هه‌ردوو مه‌كته‌بی سیاسی حزبی ده‌عوه و پارتی دیموكراتی كوردستان كۆبوونه‌وه‌و تیایدا قۆناغی دوای هه‌ڵبژاردنی ئه‌نجوومه‌نی نوێنه‌رانی عێراق و ئه‌و هه‌نگاوانه‌ی كه پێویستن بهاوێژرێن بۆ پێكهێنانی حكوومه‌تی نوێی عێراق تاوتوكران.
هه‌ردوولاش بریاریاندا كه ئه‌و جۆره كۆبوونه‌وانه به‌رده‌وامیان هه‌بێت .
له‌لایه‌ن حزبی ده‌عوه‌وه سادق ئه‌لروكابی، حه‌سه‌ن ئه‌لسنێد و یاسین مه‌جید، له‌لایه‌ن پارتی دیموكراتی كوردستانه‌وه‌ش، به‌رێزان فازڵ میرانی سكرتێری مه‌كته‌بی سیاسی و دكتۆر رۆژ نوری شاوه‌یس و مه‌سروور بارزانی و مه‌حموود محه‌مه‌د ئه‌ندامانی مه‌كته‌بی سیاسی ئاماده‌ی كۆبوونه‌وه‌كه بوون.
