هەڵوێستی یەكدەنگی و گرنگیی فراكسیۆنە كوردستانییەكان لەمەڕ بڕیاری ئەنجومەنی نوێنەرانی عێراق بۆ كشانەوەی هێزە بیانییەكان بۆ ئەو هەوڵ و هەماهەنگییەی نێوان سەرۆكایەتیی هەرێمی كوردستان و فراكسیۆنە كوردستانییەكان دەگەڕێتەوە، بەمەش كورد سەلماندی كە چارەسەركردنی ئەم كێشەیە بە ددانبەخۆداگرتن و پەلەنەكردن دەبێت، بەڵام تێپەڕاندنی بڕیارەكە لەلایەن شیعەكانەوە سەرەتایەكی خراپ بوو بۆ هەڵوەشانەوەی ئەو بنەمایانەی كە عێراقیان لەسەر بونیاد نراوە كە ئەویش تەوافوق و هاوبەشییە لەنێوان هەر سێ پێكهاتە سەرەكییەكەی كورد و شیعە و سوننە. بۆ قسەكردن لەسەر ئەم پرسانە و دەرهاویشتە خراپەكانی بڕیارەكەی ئەنجومەنی نوێنەرانی عێراق چەند پرسیارێكمان ئاراستەی دكتۆر بەشیر حەداد جێگری سەرۆكی ئەنجومەنی نوێنەرانی عێراق كرد، لێرەدا پوختەی قسەكانی بڵاودەكەینەوە.

* پێش هەموو شت بەشدارینەكردنی هاوپەیمانیی فراكسیۆنە كوردستانییەكان لەو بڕیارەی ئەنجومەنی نوێنەرانی عێراق بۆ كشانەوەی هێزە بیانییەكان لە عێراق، هەڵوێستێكی بەرز و گرنگ بوو، ئەم یەكڕیزی و یەكهەڵوێستییە چۆن دروست بوو؟ ئایا تاچەند فراكسیۆنەكان و سەرۆكایەتیی هەرێمی كوردستان لەسەر ئەم پرسە هەماهەنگ بوون؟
- بێگومان رۆڵ و هەماهەنگیی نێوان سەرۆكایەتی هەرێم و فراكسیۆنە كوردستانییەكان لە بەغدا لەمەڕ دانیشتنەكەی پەرلەمانی عێراق بۆ دەركردنی هێزە بیانییەكان روون و ئاشكرا بوو، رۆڵی رێزدار نێچیرڤان بارزانی سەرۆكی هەرێمی كوردستان هەر لە دانیشتن و گفتوگۆكردن لەگەڵ لایەنە سیاسییەكان و دروستكردنی ئەو یەكدەنگی و یەكهەڵوێستییەی نێوان فراكسیۆنە كوردستانییەكان لە بەغدا هاوكاریی سەرەكی ئێمەی فراكسیۆنە كوردستانییەكان بوو، دەتوانم بڵێم رۆڵی بەڕێزیان رەنگی دایەوە لەسەر هەوڵەكانی ئێمەش بۆ دروستبوونی یەكدەنگی و یەكهەڵوێستی لەسەر پرسە نەتەوەیی و نیشتمانییەكان، هەروەكو چۆن لەسەر پرسی تێپەڕاندنی بودجەی 2019 و بابەتی یاسای هەڵبژاردنەكان و ئەم بڕیارەی كشانەوەی هێزە بیانییەكان لە عێراق بینیمان، بە شێوەیەك لەناو 59 ئەندام پەرلەمانی كوردستانی یەك ئەندام پەرلەمانیش ئامادەی هۆڵی پەرلەمان نەبوون بۆ دەنگدان لەسەر ئەو بڕیارە بەپەلە و هەڵەیە، ئەگەرچی بەفەرمی هاوپەیمانێتیی كوردستانی رانەگەیەندراوە، بەڵام لە دوای ئەم یەكهەڵوێستی و یەكدەنگییە سەلمێندرا كە لەتوانادا هەیە ئەم هاوپەیمانێتییە دروست بێت، داواكارم و ئومێدم زۆرە بەوەی ئەم یەكڕیزی و یەكهەڵوێستییەی كورد لەبەغدا ببێتە هۆكاری یارمەتیدەری سەرۆكی هەرێمی كوردستان بۆ پاراستنی زیاتری ماف و دەستكەوتەكانی گەلی كوردستان و بەهێزبوونەوەی پێگەی كورد لە بەغدا.
* رۆژی هەینیی رابردوو دوای نزیكەی 8-9 كاتژمێر بەسەر هێرشەكەی ئەمریكا و كوشتنی قاسم سولەیمانی و مەهدی موهەندیس، مەرجەعییەتی نەجەف داوای كرد ددان بە خۆدا بگرن و پەلە نەكەن، بەڵام كوتلە شیعەكانی ناو پەرلەمان هەمان رۆژ بڕیاریان دا رۆژی شەمە پەرلەمان كۆبوونەوەی نائاسایی خۆی بكات و پاشان كۆبوونەوەكە دواكەوت بۆ یەكشەمە، پرسیار لێرەدا ئەوەیە لایەنە شیعەكان هەمووكات خۆیان وا پیشان داوە كە پابەندی پەیامەكانی مەرجەعییەتن، بۆچی ئەمجارە پابەند نەبوون؟ ئایا دەتوانین بڵێین ئەمجارەیان پابەندی پەیامەكانی خامەنەیی بوون زیاتر؟
- پێش وەڵامدانەوەی پرسیارەكە، سەرەتا دەمەوێت ئاماژە بەوە بدەم كە هەموو فراكسیۆنە شیعەكان یەك راوبۆچوونیان نییە و مەرج نییە یەك ئاراستەی سیاسیشیان هەبێت، ئەوانیش جیاوازن لە راوبۆچوون و بیركردنەوەیان، فراكسیۆنە شیعەكان تەنانەت پابەندی بڕیارەكەی مەرجەعییەت نەبوون بەوەی كە بە هێمنی و ددانبەخۆداگرتن رووبەڕووی پرسەكە ببنەوە، ئەوە بوو هەر لە دوای گوتارەكەی مەرجەعییەت لە رۆژی هەینی، بڕیاریان دا رۆژی شەممە پەرلەمان كۆبوونەوەی نائاسایی خۆی بكات، كاتێك پەیوەندییان بەمنەوە كرد وەكو جێگری دووەمی سەرۆكی پەرلەمان منیش لەبەر ئەوەی جێگری یەكەمی پەرلەمان بەتەنیا ئەمەی راگەیاندبوو، بڕیارەكەش پەلەیی پێوە دیار بوو، راستەوخۆ پێم وتن: ناكرێت كۆبوونەوەیەكی وا نائاسایی و لەسەر پرسێكی وا گرنگ بەو پەلەییە لە رۆژی شەممە بكرێت. من بەمە رازی نیم، چونكە هێشتا زووە بۆ بڕیارێكی لەمجۆرە بێ ئەوەی ئاگاداری وردەكارییەكانی پرسەكە و دەرهاویشتەكانی بین، داوام لێكردن: با ئەم دانیشتنە بەلانی كەمەوە بۆ رۆژی یەكشەممە دوابخەین، ئەوە بوو دانیشتنەكەی پەرلەمان لەسەر پرسی كوشتنی قاسم سولەیمانی و مەهدی موهەندیس و دەركردنی بیانییەكان بۆ رۆژی یەكشەممە دواخرا، كاتێكیش رۆژی یەكشەممە سەرجەم فراكسیۆنە كوردستانییەكان كۆبووینەوە، (بە فراكسیۆنی پارتی و یەكێتی و سەرجەم فراكسیۆنەكانی دیكەشەوە) بڕیارمان دا بەشداری لەو كۆبوونەوەیە نەكەین، چونكە فراكسیۆنە شیعەكان دەیانویست لەو دانیشتنەدا بڕیاری دەركردنی هێزە بیانییەكان و ئەمریكییەكان دەربكەن، ئێمەش هیچ قەناعەتمان بە بڕیارێكی وا خراپ و مەترسیدار نییە كە زیانی بۆ عێراق دەبێت و بەو پەلەییە بێ گفتوگۆ و دیراسەتكردن دەربچێت، بەتایبەتی كە سەركردایەتیی كورد و سەرۆكایەتیی هەرێم لە بەیاننامەی خۆیاندا باسی ئەوەیان كردبوو كە پێویستە ددان بەخۆدا بگرن و پەلە نەكرێت و بابەتێكی وا گرنگ و هەستیار پێویستی بە گفتوگۆ و ئارامی و زاڵبوونی لۆژیكی عەقڵ و مەنتیق هەیە، مەرجەعییەتی شیعەش بەهەمان شێوە باسی ئەو ددانبەخۆداگرتن و پاراستنی هێمنییەی كردبوو، ئەوە بوو تەنیا بڕیار درا من وەكو سەرۆكایەتیی پەرلەمان لەبەر ئەوەی لە سەرۆكایەتیم، نەك لە فراكسیۆنەكان بەشداری دانیشتنەكەی پەرلەمان بم، كاتێكیش پێش دانیشتنەكەی پەرلەمان لەنێوان فراكسیۆنە شیعەكاندا كۆبوونەوە كرا، زۆر بە توندی وەڵامی هەموو ئەو تۆمەت و رەخنانە بوومەوە كە دەرهەق بە كورد دەكرا، بەوەی جۆرێك لە بێ وەفایی بەرامبەر عێراق هەیە و ئەم ئامادەنەبوونەی كورد و سوننە راكردنە لە بەرپرسیارێتی، حەلبووسی وەكو سەرۆكی پەرلەمان و نوێنەری سوننە وەڵامی خۆی دانەوە، منیش پێم وتن: ئامادەنەبوونی نوێنەرانی كورد لەو دانیشتنەدا نیشانەی ئەوە نییە سەروەری و بەرژەوەندیی عێراقمان لا گرنگ نییە، بەڵكو بەپێچەوانەوە ئامادەنەبوونمان بۆ رێگرتنە لەسەر دەركردنی بڕیارێك كە لە بەرژەوەندیی عێراق و سەروەریی وڵات نییە، ئەم بڕیارە پێویستی بە دیراسەتكردن و گفتوگۆكردن هەیە لەنێوان پێكهاتەكانی عێراقەوە بەتایبەتی لەنێوان كوردو شیعە و سوننە، هەربۆیە جارێكی دی بە فراكسیۆنە شیعەكانم گوت: ئەگەر بە تەنیا نیساب تەواو بكەن و فراكسیۆنە شیعەكان ئەم بڕیارە بدەن، شەقام دەڵێت ئەمە بڕیاری شیعەیە و شیعە بە تەنیا بڕیار دەردەكات و هەر دەرئەنجامێكی خراپیشی هەبێت، ئێوە بەرپرسیار دەبن. بۆیە من داوام كرد با ئەمجارە ددان بەخۆدان بگرن و لە بری ئەوەی تەنیا پێكهاتەیەك ئەم بڕیارە بدات، دەرفەت بدەن با هەموو عێراقییەكان و پێكهاتەكانی گفتوگۆ بكەن و لەگەڵ سوننەو كوردیش بگەنە شێوازێكی هاوبەش، چونكە دەركردنی هێزە بیانییەكان بەتایبەتی هێزەكانی ئەمریكا لەم كاتە هەستیارەدا مەترسیدارە و ئەوەش پەیوەندی بە چارەنووسی هەموو عێراق و پێكهاتەكانیەوە هەیە، بۆیە ئامادەنەبوونی كورد بۆ ئەوەیە ئەم دانیشتنە نەكرێت و ئەم بڕیارە بەپەلەو بێ دیراستە تێنەپەڕێندرێت، بەڵام ئەوان وتیان شەقام بۆتە ئاگر و زۆر تووڕەیە لێمان، هەر دەبێت ئەو دانیشتنە بكرێت، لە وەڵامدا پێم گوتن: با دانیشتن بكرێت، بەڵام بڕیار نەدەین، وتیان باشە ئەمڕۆ بڕیاری چی بدەین؟ وتم: با بڕیاری ئەوە بدەین بەڕێز عادل عەبدولمەهدی سەرۆك وەزیرانی كار بەڕێكەر و وەزیری بەرگری و وەزیری دارایی بانگهێشتی پەرلەمانیان بكەین و لێیان بپرسین: ئەگەر ئەم بڕیارە دەرچوو، ئایا وەك سەرۆكایەتیی ئەنجومەنی وەزیران لە غیابی هێزی ئەمریكی و بیانی گەرەنتیی ئەوەمان پێ دەدەیت كە وڵات بەڕێوە ببەیت؟ ئایا وەزیری بەرگری دەتوانیت سەروەریی عێراق و سنوورەكان بپارێزیت و زەمانەتی ئەوەمان بدەیتێ كە داعش نەگەڕێتەوە شارەكانمان؟ وەزیری دارایی ئایا گەرەنتی ئەوە دەدەیت ئەگەر هاتوو ئەمریكا یارمەتی و حەسانەی خۆی لەسەر نەوت و ئابووری و داریی عێراق هەڵگرت، بەهای دینارمان نەڕووخێت و بەهاكەی نەشكێت؟ ئایا گەرەنتی ئەوەمان دەدەیتێ، حكومەت بتوانێت مووچەی فەرمانبەرانی بدات؟ باشە رێكەوتنێك لەنێوان عێراق و ئەمریكا دوای یەك ساڵ گفتوگۆ و دیراسەتكردن واژوو كراوە و راوبۆچوونی هەموو لایەنە پەیوەندیدارەكانی سەربازی و سیاسی و ئابووری و ئەمنی لەو بارەیەوە وەرگیراوە، ئێستا ئێوەی پەرلەمانتارانی شیعە دەتانەوێت بە یەك دانیشتن رێككەوتننامەكەی نێوان عێراق و ئەمریكا هەڵبوەشێننەوە؟ بەڵام هەرچی داوا و تكام لێ كردن، سوودی نەبوو، تا كار گەیشتە ئەوەی جێگری یەكەمی پەرلەمان پێمی وت: ئێمە بەرژەوەندیی عێراقمان دەوێت و كوردی بە بێ وەفایی تۆمەتبار كرد و گوتی: كاتێك مەسەلەی بودجە و مافی خۆتان دێتە پێشەوە بە توندی داوای مافی خۆتان دەكەن، بەڵام كاتێك وڵات پێویستی بە سەروەرییە ئامادە نابن، لەوەڵامدا پێم وت: نەخێر وا نییە و دەرنەكردنی ئەم بڕیارە لە حاڵەتی ئەوەی كە بچێتە بواری جێبەجێكردنەوە زیانی بۆ سەروەریی عێراق دەبێت. گفتوگۆكەمان تا ئەو راددەیە بوو كە دەنگمان لە سەر یەكتر بەرز بۆوە.
* وەك لە میدیاكانەوە ڤیدیۆكەی بڵاوكراوەتەوە، محەمەد حەلبوسی سەرۆكی پەرلەمانی عێراق، راشكاوانە روودەكاتە عادل عەبدولمەهدی سەرۆك وەزیرانی كاربەڕێكەر و پێی دەڵێت: ئەم بڕیارە بڕیارێكی شیعەیە، ئێمە ئومێدمان دەكرد بڕیارێكی عێراقییانە بێت، دیارە حەلبوسی دەیەوێت سەرۆك وەزیران لە مەترسیی ئەو بڕیارە ئاگادار بكاتەوە، ئایا ئەو دەرهاویشتە خراپانەی ئەم بریارە چین كە دەبنە مەترسی لەسەر داهاتووی عێراق؟
- محەمەد حەلبوسی سەرۆكی پەرلەمانی عێراق لە كۆبوونەوەكەی سەرۆكی فراكسیۆنەكان پاڵپشتیی رابوبۆچوونەكانی منی كرد، لەناو پەرلەمانیش ئەو وەكو نوێنەری سوننە و منیش وەكو كورد ویستمان كۆبوونەوەكە ئەنجام نەدرێت، ئێمە وەكو كورد راوبۆچوونی خۆمان دا و سەرۆكی پەرلەمانیش وەكو سوننە مەترسییەكانی ئەم بڕیارە هەڵەیە و بەپەلەیەی روون كردەوە. هەرچەندە من قەناعەتم بەوە نییە ئەمریكا هێزەكانی خۆی بكشێنێتەوە، بەڵام لە حاڵەتی جێبەجێكردنی ئەم بڕیارەدا دەرهاویشتەكانی بۆ سەر عێراق و خەڵكەكەی زۆر خراپ دەبێت، چونكە لە حاڵەتێكدا ئەگەر ئەمریكا هێزی سەربازی خۆی كشاندەوە، ئەوا نێردە دیپلۆماسییەكانی و باڵیۆز و باڵیۆزخانەكەشی دەكشێتەوە، بگرە نێردە دیپلۆماسییەكانی زۆر لە وڵاتانی وەكو بەریتانیا و فەرەنسا و ئەڵمانیا و چەندین وڵاتی دیكەش دەكشێنەوە و رێكخراوی نەتەوە یەكگرتووەكانیش نێردەی خۆی دەكشێنێتەوە و هێزەكانی هاوپەیمانیی ناتۆش دەكشێنەوە. بەمشێوەیە بڕیارەكەی شیعە دەرهاویشتەی خراپ و مەترسیداری هەیە، نەك تەنیا لە رووی سیاسییەوە، بەڵكو لە رووی ئەمنییەتیشەوە جارێكی دی داعش هەڕەشە دەبێت بۆ سەر شار و شارۆچكەكانمان و هێرشەكانی داعش دەست پێ دەكاتەوە، ئەمە جگە لەوەی ئەگەری سەرهەڵدانی شەڕی مەزهەبی و ناوخۆش زۆرە، بە هاوشێوەی شەڕی شیعە و سوننە لە رومادی و نەینەوا و شارەكانی دیكەی عێراق، لە رووی ئابوورییشەوە بڕیارەكەی شیعە ئەگەر جێبەجێ بكرێت، دەبێت ئەوە بزانین كە عێراق لە ئێستادا نەوتەكەی خۆی دەفرۆشێت، بەڵام پارەی ئەو نەوتە راستەوخۆ نایەتە عێراق، بەڵكو دەچێتە هەژمارێك لە سەر حیسابی ئەمریكا و دەچێتە ناو یەدەگێكی دارایی ئەمریكا و لەوێوە وردە وردە پارەكە بۆ ئێمە دەنێردرێت، باشە كێ ناڵێت ئەمریكا لەكاتی كشانەوەی هەموو ئەو پارانە بلۆك ناكات؟ لە ئێستادا ئەمریكا پاڵپشتیی بەهای دیناری عێراقی دەكات و بەهای دراوی عێراقی تا راددەیەك سەقامگیرە و نرخی ئاڵووێری دۆلارو دینار لە عێراقدا تارادەیەكی باش جێگیرە، ئەگەر ئەم پاڵپشتییەی ئەمریكا لەسەر دیناری عێراقی نەمێنێت، بێگومان نرخی دۆلار بەرز دەبێتەوە و بەهای دینار دەشكێت، بەمەش جگە لەوەی پارەی نەوتی عێراق نایەت و بەهای دینار دەشكێت گرانی و هەژاری روودەدات و دۆخی عێراق لەمە زیاتر تێكدەچێت و حكومەت توانای دابینكردنی مووچەكانیشی نامێنێت.
* وەك ئەزموونی خۆت و پۆستەكەت كە جێگری سەرۆكی پەرلەمانی، ئایا لەدوای تێپەڕاندنی ئەم بریارە لەناو پەرلەمان بە پێداگریی فراكسیۆنە شیعەكان، نابێتە هۆی ئەوە كە تێپەڕاندنی یاسا و بڕیارەكانی داهاتوو لەناو پەرلەمان بە زۆرینە و كەمینە ببێتە عورفێك بۆ فراكسیۆنە شیعەكان و باكیان بە بەشداریی كورد و سوننە نەبێت؟
- پێشتر هەندێك جار لەژێر فشار و پاڵەپەستۆدا هەندك بڕیار و پرۆژە تێپەڕێندراوە، بێ ئەوەی گوێ لە كورد و سوننە بگیرێت، بەڵام بنەمای تەوافوق لەنێوان هەرسێ پێكهاتەی سوننە و كورد و شیعە مابوو، ئەگەر وا بڕوات، ئەوە مەترسیی تێكچوونی تەوافوق دێتە پێشەوەو پرۆسەی سیاسی لە عێراقدا لەمەی ئێستا خراپتر تێكدەچێت، چونكە خۆی لە خۆیدا پرۆسەی سیاسیی عێراق لەسەر پرەنسیپی تەوافوق بونیاد نراوە، نەك لەسەر بنەمای زۆرینە و كەمینە، خۆ ئەگەر مەسەلەكە زۆرینە و كەمینەی پەرلەمان بێت، ئەوا هەر شیعە زۆرینەیە و ئیتر بەشداریی كورد و سوننە لە پەرلەمان و كۆی پرۆسەی سیاسیدا هیچ مانا و واتایەكی نامێنێت. بۆیە پێویستە دووبارە نەخشە سیاسییەكان لە عێراقدا دابڕێژدرێنەوە.
* ئێوە و پەرلەمانتارانی دیكەش ئاماژە بەوە دەكەن كە ئەم بڕیارەی پەرلەمان بۆ حكومەت مولزەم نییە، ئەمەش بەو مانایەی حكومەت دەتوانێت جێبەجێی نەكات، بەڵام وەك بینیمان هەر بۆ رۆژی دواتر سەرۆك وەزیران لەگەڵ باڵیۆزی ئەمریكا كۆبووە و پێی راگەیاند كە دەبێت بكشێنەوە، ئەمە لە كاتیكدا د.عادل عەبدولمەهدی بە پیاوێكی ئاقڵ و ئابووریزان دادەنرێت، ئایا لە ئێستادا ئەویش لەژێر گوشاری حەشدی شەعبی بڕیار دەدات؟
- د. عادل عەبدولمەهدی سەرۆك وەزیرانی كاربەڕێكەری عێراق پیاوێكی عاقڵ و تەكنۆكرات و ئابووریناسێكی باشە و زۆر دڵسۆز بوو، ئەگەر بواریان پێ بدایە، كاری باشی بۆ عێراقیەكان دەكرد، بەداخەوە نەیانهێشت كار بكات و هەرچی كەموكورتی و هەڵەی حكومەتەكانی پێشوو هەیە، هەموویان خستە سەر شانی ئەو، لە 2003وە هەڵە دەكرێت، كەچی زوڵمێكی زۆریان لە د.عادل عەبدولمەهدی كرد، خۆیشی دەزانێت بڕیارەكەی پەرلەمان لەلایەن حكومەتەوە مولزەم نییە جێبەجێی بكات، بەڵام ئەو لەوە دەترسێت ئەگەر لە حكومەت نەما، هەرچی كوشتار و بریندارەكانی خۆپیشاندانەكانە بخرێتە سەر شانی ئەو و دادگایی بكرێت. لە عێراق زیاتر لە 600 خۆپیشاندەر كوژراون و زیاتر لە 20 هەزار كەس بریندار بوون، بۆیە پێش ئەوەی لە حكومەت بڕوات، دەیەوێت دڵی ئەوان رازی بكات، ئەم فشارە تەنیا لەسەر د.عادل عەبدولمەهدی نییە، بەڵكو لە سەر زۆر لە پەرلەمانتارەكانی شیعەش هەیە و نامەی هەڕەشەیان بۆ ناردوون، بەوەی ئەگەر دەنگ بە بڕیارەكە نەدەن، وەكو خیانەتكار مامەڵەیان لەگەڵ دەكرێت و ناویان ئاشكرا دەكرێت و ماڵیان دەسووتێندرێت، ئەگەر ئەم هەڕەشانە نەبووایە 30 پەرلەمانتار لە دانیشتنەكەی پەرلەماندا ئامادە نەدەبوون.
* ئێستا باس لەوە دەكرێت كە ژمارەیەك پەرلەمانتاری عێراق دەیانەوێت تانە لە بڕیارەكە بدەن، بەو حیسابەی ئەمە كاری پەرلەمان نییە و كاری حكومەتە، بۆ ئەمەش باس لەوە دەكەن ئەم پرسە رووبەڕووی دادگای فیدڕاڵی بكەنەوە، رای ئێوە لەو بارەیەوە چییە؟
- لە راستیدا ئەمە كاری پەرلەمان نییە داوا بكات هێزی بیانی بەتایبەتی ئەمریكا لە عێراق بكشێتەوە، ئەمە كاری حكومەتە و حكومەتیش خۆی ئەو رێككەوتنەی لەگەڵ ئەمریكا كردووە و هەر خۆشی دەتوانێت هەڵیبوەشێنێتەوە، دوای ساڵێكیش لە هەڵوەشانەوەی رێككەوتننامەكە دەكرێت بچێتە بواری جێبەجێكردنەوە، بەڵام لە حكومەت نەیانكرد و ویستیان تۆپەكە بخەنە ناو گۆڕەپانی پەرلەمانەوە، پەرلەمانیش لەلایەن خۆیەوە تۆپەكەی خستەوە ناو گۆڕەپانی حكومەت و داوای لە حكومەت كرد كە داوا لە ئەمریكا و هێزە بیانییەكان بكات، وڵاتەكە جێبهێڵن. ئەمە هەمووی هەڵەیە، هەنگاوی دروست ئەوە بوو، پێش هەموو شتێك پەرلەمان كار بۆ دەستنیشانكردنی كەسایەتییەك بۆ حكومەتی كاربەڕێكەر بكات بۆ ئەوەی بخرێتە شوێنی د.عادل عەبدولمەهدی و كار بكات بۆ هەڵبژاردنێكی پێشوەختە و پەرلەمان و حكومەتێكی نوێ دابمەزرێت، ئەوجا دوای گفتوگۆ و دیراسەتكردن ئەو حكومەت نوێیە باس لەو رێككەوتنە و دەركردنی هێزە بیانییەكان بكات، بەڵام لەبەر هەموو ئەو فشارو هەڕەشە و دەستێوەردانانەی لەسەر پەرلەمانتارە شیعەكان كرابوو بۆ رازیكردنی شەقام، بەپەلە ئەم كارەیان كرد و عێراق و وڵاتەكەیان خستە ناو دۆخێكی ناسەقامگیر و نائارام و نادیارەوە.