لەناو گۆڕانكارییەكانی رۆژهەڵاتی ناوەڕاستدا، ئێستا لە دوو بەشی كوردستاندا دەرفەت دروست بووە بۆ ئەوەی كورد بتوانێت خۆی حوكمڕانی خۆی بكات، بەڵام لە هەر دوو بەشەكە هێزەكانی پەكەكە هۆكارن بۆ ناسەقامگیری و تێكدانی ئەو دەستكەوتانەی بەدەست هاتوون، لە ئێستادا خەڵكانی نیشتمانپەروەر كە بە چاوی ئومێدەوە سەیری ئەو دوو بەشەی كوردستان دەكەن، لەهەمانكاتدا سەریان لەوە سوڕماوە كە حزبێكی بەناو كوردستانی هەموو ئامانجی ئەوە بێت، ئەم دەرفەتە لەدەست كورد دەربهێنێت. بۆ قسەكردن لەسەر ستراتیژیەتی هەڵەی پەكەكە و رەفتارە هەڵەكانی لە باشوور و رۆژئاوای كوردستان، ئەم دیدارەمان لەگەڵ عوسمان ئۆجەلان بەرپرسی پێشووی پەكەكە (دوای زیندانیكردنی عەبدوڵا ئۆجەلان) ئەنجامداو بەمجۆرە وەڵامی پرسیارەكانی گوڵانی دایەوە.

* ئەگەر خوێندنەوەیەكی واقیعیانە بۆ بارودۆخی ئێستای رۆژهەڵاتی ناوەڕاست بكەین، دەبینین وێڕای ئاڵۆزی و هەستیاریی بارودۆخی ناوچەكە، بەڵام كۆمەڵێك هەلیش بۆ كورد رەخساوەو هەستی پێ دەكرێت، ئایا چۆن سەیری بارودۆخەكە دەكەیت؟
- بە دیدی من كوردستان لە بارودۆخێكی تایبەتدایە و كاتێكی گرنگی بۆ هاتۆتەپێشەوە، لەبەر ئەوەی داگیركارانی كوردستان لە حاڵەتی لاوازیدان، لەوانەیە لەنێوان توركیا و ئێران ئاڵۆزی دروست بێت، بەڵام ئەوانیش جارێكی دیكە ئەو توانایەیان نەماوە كە لەسەر پرسی كورد رێكبكەون، لەمەش زیاتر گوشارێكی گەورەی نێودەوڵەتی لەسەر ئێران و توركیا هەیە و دەیانەوێت سنووریان بۆ دابنێن. لە بارودۆخی ئێستادا توركیا هەستی بەم مەترسییە كردووە، بۆیە بە هەموو شێوەیەك هەوڵدەدات خۆی زیاتر پڕچەك بكات و تەنانەت پەنای بردۆتە بەر كڕینی رۆكێتی 400 ئێسی رووسی كە لە دەرەوەی سیستمی بەرگریی ناتۆیە، ئامانجیشی لە خۆپڕچەككردن بەم رۆكێتە، لەبەر ئەوەیە كە ناكەوێتە ژێر هیچ پابەندبوونێك و چ كاتێك بیەوێت، دەتوانێت بەكاری بهێنێت. لەلایەكی دیكەش وەك دەبینین ئێران و ئەمریكا لەو پەڕی ئاڵۆزیدان، لەلایەك ئەمریكا لە رێككەوتنەكە هاتۆتە دەرەوە و لەلایەكی دیكەش بەرپرسانی ئێرانی بە ئاشكرا رایدەگەیەنن كە پەرە بە بەرنامەی ناوكی و دروستكردنی چەكی ئەتۆمی دەدەن، ئەمە وایكردووە رۆژئاوا لەم دوو دەوڵەتە بترسێت، بۆیە هەوڵەكانیان بۆ ئەوەیە سنووریان بۆ دابنێن. لەم بارودۆخە ئاڵۆزەدا كوردستان رەوشێكی تایبەتی هەیە، هەردوو بەشە بچووكەی، مەبەستم كوردستانی رۆژئاوا و باشوور، بەپشتگیری هێزی نێودەوڵەتی بەرەو دەوڵەتبوون هەنگاو هەڵدەگرن، بەتایبەتیش باشووری كوردستان كە ئێستا دوای هەڵبژاردنی بەڕێز نێچیرڤان بارزانی بۆ سەرۆكی هەرێمی كوردستان و بەڕێز مسرور بارزانی بۆ سەرۆكی حكومەت، سەركردایەتییەكی تازە دەركەوتووە و ئەم گۆڕانكارییەش رەوشەكە زیاتر بەرەو پێشەوە دەبات. ئاشكرایە باشووری كوردستان ناوەندی بزاڤی رزگاریخوازیی كوردستان بووە و مەلا مستەفا بارزانی شۆڕشی سەرتاسەری دەست پێكرد، هەر لە سەر ئەم پرسە من توێژینەوەیەكم كردووە و ئاماژەم بەوە كردووە كە (ناوی بارزانی بزووتنەوەی رزگاریخوازیی كوردستانی دروست كرد و شۆڕش بە بارزانی گەورە بوو، پێویستە بە ناوی بارزانی-یش بگاتە ئەنجام)، لەم بارودۆخەی ئێستای كوردستان گرنگە ئەو راستیانە بڵێین كە ناوەڕۆكی بزاڤی نەتەوەییمان . ماڵباتی بارزانی-یە. زۆر ماڵباتی گەورەش لەجیهاندا كاریگەرییان لەسەر دەوڵەتی نەتەوەیی هەبووە و ئێستا پادشای ئەو وڵاتانەن، بۆیە بۆ ئێمەش پادشای كوردستان ماڵباتی بارزانی-یە. لە ساڵی 1914 ـەوە ماڵباتی بارزانی لە سەردەمی شێخ عەبدولسەلام و شێخ ئەحمەد بارزانی شۆڕشیان دەست پێ كردووە و مەلا مستەفا شۆڕشەكەی گەورە كردو مسعود بارزانی بەردەوامی بە شۆڕشەكە داو زیاتر گەورەی كرد، ئێستا نێچیرڤان بارزانی و مسرور بارزانی شۆڕشەكە بەرەو چارەسەری دەبەن و سەركردایەتییەكی تازەیان گرتۆتە دەست، ئەمەش هەقیقەتە، ئێمە هەموومان بینیمان كە دوای ریفراندۆمەكەی 2017 هەموو دەوڵەتانی داگیركاری كوردستان و جیهانیش گوشاریان خستە سەر كوردستان بۆ ئەوەی خەڵكی كوردستان لە ئیرادەی خۆی پەشێمان بكەنەوە و ئیرادەی خەڵكی كوردستان تێكبشكێنن، بەڵام سەرۆك بارزانی مقاوەمەتی كرد و بریاری خۆی دا و ئیرادەی خەڵكی كوردستان لە ریفراندۆمەكە پیشان درا. ئەو كات هەموو گوشارێكیان بەكار هێنا بۆ ئەوەی ئەو ئیرادەیە بشكێنن، بۆ ئەمەش نەوتیان راگرت، مووچەی فەرمانبەرانیان بڕی، تەنانەت لە دوو مانگی یەكەمدا ئەوروپا پشتی تێ كردین، بەڵام نێچیرڤان بارزانی ئەو دەوڵەتمەدارە گەورەیە بوو كە توانی لە ماوەیەكی كورتدا تەواوی پەیوەندییە دیپلۆماتییەكان لەگەڵ فەڕەنسا و ئەڵمانیا و بەریتانیا و هەموو وڵاتان ئاسایی بكاتەوە، بۆیە دەتوانم بڵێم: ئەو دیپلۆماتیەتەی نێچیرڤان بارزانی نەبوایە لەوانە بوو هەرێمی كوردستان تیابچووایە، لەلایەكی دیكە كاك مسرور بارزانی كە بووەتە سەرۆكی حكومەت كەسایەتییەكی جیاوازە و مرۆڤێكە خاوەنی بڕیارە و بڕیار بە دروستی دەدات و بە دروستییش جێبەجێی دەكات، ئێستا لە هەوڵی ئەوەدایە بە هاوكاری لەگەڵ كاك قوباد سیستمێكی رێكوپێك بۆ كوردستان بونیاد بنێت و گەندەڵی نەمێنێت و هەوڵی بۆ ئەوەیە كە دوو ئیدارەیی لە كوردستان نەهێڵێت و یەك هێزی پێشمەرگە و یەك هێزی ئاسایش و پۆلیس لە هەموو كوردستاندا هەبێت، ئەم هەرێمە جێگەی شانازیی هەموو كوردێكە لە هەرچوارپارچەی كوردستان و دەبێت وەك چاوی خۆمان بیپارێزین.
* بەڵام پەكەكە هەموو هەوڵی بۆ ئەوەیە كە ئەم هەرێمە تێكبدات و دوو هەفتەی رابردووش هەوڵیدا بە رێگەی كارێكی تیرۆریستی ئارامیی پایتەختی كوردستان بشێوێنێت، ئایا بۆچی پەكەكە دژایەتی هەرێمی كوردستان دەكات؟
-ئێمە هەموو دەزانین ئەو زەمینەیەی لە هەرێمی كوردستان هاتۆتە ئاراوە هەنگاو بەرەو دەوڵەتبوون هەڵدەگرێت، ئەمەش جێگەی شانازییە بۆ هەموومان، بەداخەوە پەكەكە هەوڵی بۆ ئەوەیە كە سەقامگیری و تەناهی ئەم هەرێمە تێكبدات، هەر وەك چۆن هەفتەی رابردوو ئەو كارەی كرد، دیارە پەكەكە هەتا ئێستاش دەڵێت، ئێمە ئەو كارەمان ئەنجام نەداوە، بەڵام كێ ئەو كارەی كرد؟ ئەمەیان جێگەی پرسیارە؟ لەبەر ئەوەی ئاماژەكان هەموویان بەو ئاراستەیەن كە پەكەكە ئەو كارەی ئەنجام داوە، پێش ماوەیەكیش پەكەكە (هێزی جەوهەری پاراستنی باشووری كوردستان)ی دروستكرد، ئایا ئامانج لە دروستكردنی ئەم هێزە چییە؟ بۆیە پەكەكە ددان بەوەدا بنێت كە ئەو كارەی كردووە، یان ئینكاری بكات، بەوەی نەیكردووە، بەرپرسیاریەتیی ئەو كارە لە ئەستۆی پەكەكەیە، دیارە پەكەكە ئێستا لە رووی سەربازییەوە زۆر لاواز بووە و ناتوانێت هیچ كردەوەیەكی سەربازی ئەنجام بدات، بۆیە بەم كارانەی دەیەوێت سەقامگیریی باشووری كوردستان تێكبدات، هەر بۆیە ئەگەر پەكەكە هەوڵی تێكدانی سەقامگیری باشوور نادات، ئەی دروستكردنی هێزی جەوهەری پاراستنی باشووری كوردستان بۆ چییە؟ ئەمە لە كاتیكدا لە كوردستان هێزی پێشمەرگە هەیە و سەلماندوویەتی كە دەتوانێت وڵاتی خۆی بە باشی بپارێزێت. بۆیە ئەو هەنگاوانەی پەكەكە لە باشوور هەڵیان دەگرێت، هەموویان هەنگاوی هەڵەن و هیچ ئاكامێكی نابێت، هەروەها دەبێت خۆی هۆشیار بكات كە جارێكی دیكە كردەوەی هاوشێوەی دوو هەفتەی پێشوو لە هەولێر دووبارە نەكاتەوە.
* ماوەیەكی زۆرە پەكەكە دژایەتی بیری نەتەوەیی و دامەزراندنی دەوڵەتی كوردستان دەكات، ئایا دووركەوتنەوەی پەكەكە لە دیدوتێڕوانینی نەتەوەیی هۆكار نییە بۆ ئەوەی بەمجۆرەی ئێستا رەفتار بكات؟
- ئایدیۆلۆژیەتی پەكەكە، ئایدیۆلۆژیەتێكی چەپی ستالینییە، ئەمەش دیدوبۆچوونێكی هەڵەیە و هەموو ئەو حزبانەشی خۆیان بە چەپ دادەنێن لە بیری نەتەوەیی دوور دەكەونەوە، جارێكیان لە یەكێك لە كۆبوونەوەكانی پەكەكە، ژنێك هەستا پرسیارێكی كرد و گوتی: ئایا ئێوە لەگەڵ بە دیهێنانی مافەكانی مرۆڤن، یان بەدیهێنانی مافەكانی كورد؟ هەر خۆی وەڵامی خۆی دایەوە و بەبێ دوو دڵی گوتی: من لەگەڵ بەدیهێنانی مافەكانی مرۆڤم، نەك بەدیهێنانی مافەكانی كورد، ئەم ئاخاوتنە ئەوەمان پێ دەڵێت كە پەكەكە لەژێر دروشمی گشتیدا، مافی نەتەوەیی رەدەكاتەوە. بێگومان ئەوەش شتێكی بەڵگەنەویستە كە بیری ماركسی و لینینی، بیری نەتەوەیی رەتدەكاتەوە، هەر لەسەر ئەم بنەمایەش جەنابی مەلا مستەفا لەگەڵ ئەوەی چەند ساڵ لە سۆڤیەت بوو، بەڵام گەیشتە ئەو قەناعەتەی كە بیری ماركسی و لینینی كێشەی نەتەوە چارەسەر ناكات، بۆیە لەو فیكرە دوور كەوتەوە، بارزانیی نەمر ئەگەر بیزانیایە فیكری ماركسی لینینی بەكەڵكی كێشەی نەتەوەیی دێت، لەو قەناعەتەم پێش هەموومان حزبێكی ماركسی لینینی دروست دەكرد، بەڵام ئەو خۆی لەوێ ژیابوو، واقیعەكەی بە چاوی خۆی بینیبوو، دەیزانی كە دیموكراتیەت كێشەی نەتەوە چارەسەر دەكات، نەك سۆشیالیزم، ئێستا پەكەكەش كە دوای فیكری چەپ كەوتووە و وازی لە فیكری نەتەوەیی هێناوە، ئەوە ئاكامەكەیەتی كە دەیبینین.
* بەڵام ئەو ئایدیۆلۆژیەتە چەپەی پەكەكە كاریگەری نەرێنی لەسەر بەشەكانی دیكە كوردستانی دروست كردووە، هەر بۆ نموونە ئێستا لە باشووری كوردستان بە سەدان گوند چۆڵ بوون و دەست ئاوەدانكردنەوە نایانگاتێ لەبەر پەكەكە، ئایا دەبێت چۆن مامەڵە لەگەڵ پەكەكە بكرێت؟
- پێشتر ئاماژەم بەوە كرد، ئەو كردەوەی پەكەكە لە هەولێر كردی، كارێكی هەڵە بوو، بۆیە پێویستە نەتەوەی كورد دادگایەكی هەبێت، لەو دادگایەدا هەڵوێستی راشكاوانەی خۆی بەرامبەر پەكەكە دەستنیشان بكات، بەتایبەتی كە ئێستا بە سەدان گوند لە باشوور، دانیشتووانەكەی لە ترسی پەكەكە چۆڵیان كردووە و خەڵكەكە ناتوانن لەسەر ژیانی ئاسایی خۆیان بەردەوام بن. پرسیارەكە ئەوەیە: بۆچی ئەم گوندانە چۆڵ كراون؟ دیارە ئامانجی پەكەكە ئەوەیە چالاكی بكات و پەلی سوپای توركیا بگرێت و بیهێنێتە ناو كوردستانەوە. ئەوجا پەكەكە تەنیا لەباشوور بەمجۆرە رەفتار ناكات، ئێستا لە رۆژئاوا سیستمێك دروست بووە و ئەمریكا دەیەوێت كورد بپارێزێت، پەكەكە دەچێت لە سنووری رۆژئاوا لەدژی توركیا چالاكییەك دەكات، بۆ ئەوەی سوپای توركیا هێرش بكاتە سەر رۆژئاوا، هەر ئەم هۆكارەش بوو وایكرد توركیا عەفرین داگیر بكات. كاتی خۆی لە كۆبوونەوەی سەركردایەتیی پەكەكە گوتمان پێویستە پەكەكە بۆ ماوەیەك خەباتی چەكداریی خۆی رابگرێت و تەنیا خەباتی سیاسی بكات، گوتمان كوردستان لە بەردەم گۆڕانگارییەكی گەورەدایە و لە باشوور و رۆژئاوا بارودۆخێكی باش هاتۆتەپێشەوە، با هاوكار بین ئەو بارودۆخە رێك بخەین، بۆیە ئاماژەمان بەوەكرد ئەگەر پەكەكە چالاكییە سەربازیەكانی خۆی رابگرێت، لەوانەیە دەرفەتێك بۆ باكووریش دروست بێت، هەر لەو كۆبوونەوەیە ئاماژەمان بە ئەزموونی باشووری كوردستان كرد و گوتمان: فەرموو حزبەكانی باشوور لە ساڵی 1991- 2003 هەموو چالاكییەكی سەربازیی خۆیان دژی بەعس و هێزەكانی سەدام حوسێن راگرت، ئەوە بوو لە 2003 بارودۆخێك هاتە ئاراوە و كوردستان لەدەستی سەدام رزگاری بوو، بۆیە گرنگە ئێمەش بۆ ماوەیەك سوود لە ئەزموونی باشوور وەربگرین، بەڵام ئەوان ئەم پێشنیارەی ئێمەیان رەتكردەوە و سەرەنجامیش بە درێژەدان بەو سیاسەتە هەڵەیە، جیا لەوەی زیانێكی زۆریان بە كوردستانی باكوور گەیاند، لە باشووری كوردستانیش بەسەدان گوند دانیشتوانەكەی چۆڵیان كردووە و لە رۆژئاواش بیانووی دایە سوپای توركیا كە عەفرین داگیر بكات. ئەوجا ئەگەر لێرەوە باس لە هێرشكارییەكانی توركیاش بۆ سەر باشووری كوردستان بكەین، ئەوا دەگەینە ئەو قەناعەتەی كە پەكەكە لە دژی كۆماری توركیا شەڕ ناكات، بەڵكو میكانیزمێكە خزمەتی سیستمی توركیا دەكات، هەر بۆیەشە كاتێك بە حیساب پەكەكە چالاكیەك دژی سوپای توركیا لە سنوور دەكات، توركیا ئەمەی پێ خۆشە وەك بیانوویەك بۆ هێرشكردنە سەر باشوور و رۆژئاوا بەكاری بهێنێت، بۆیە بە قەناعەتی من پەكەكە لە خۆیەوە شەڕ ناكات، بەڵكو داردەستێكە بە شێوازی دیكە بۆ ئامانجەكانی توركیا شەڕ دەكات، هەوڵدەدات كێشە لە هەردوو پارچەی رۆژئاو باشووری كوردستان دروست بكات.
* دیارە لەدوای زیندانیكردنی عەبدوڵا ئۆجەلان، ئیدی لەناو سەركردایەتیی پەكەكە سیستمێك نییە كە ستراتیژیەتی پەكەكە ئاراستە بكات، ئایا زیندانیكردنی ئۆجەلان چ كاریگەرییەكی نەرێنی لەسەر پەكەكە دروستكردووە؟
- ئۆپەراسیۆنی دەستگیركردنی بەڕێز عەبدوڵا ئۆجەلان، ئۆپەراسیۆنێكی گەورە بوو، ئامانجیش لەم ئۆپەراسیۆنە ئەوە بوو كە پەكەكە بكەنە خزمەتكاری داگیركەران و بیكەنە هێزێك كە دەوڵەتانی ناوچەكە بەپێی بەرژەوەندیی خۆیان بەكاری بهێنن، هەر بۆیە دوای زیندانیكردنی ئۆجەلان، زۆر شتی تازە هاتەپێشەوە، من وەك عوسمان ئۆجەلان كە كەسێكی وڵاتپارێز بووم، هەر لەمنداڵییەوە بە ناوی بارزانی ئاشنا بووم و لەناو پەكەكە هەر بە كوردایەتی پەروەردە كرام، ئێمە هەموو هەوڵمان بۆ ئەوە بوو كە فیكری نەتەوەیی لەناو پەكەكە بەرەو پێشەوە بەرین و لە فیكری چەپ دووری بخەینەوە، لەسەر ئەم پێداگرییەی ئێمە و رازینەبوونی سەركردایەتی پەكەكە بەم ئاراستەیە، هەزارانی وەك من لە پەكەكە جیابووینەوە، بەمەش فیكری چەپ بەسەر پەكەكە زاڵ بوو، لەمەش زیاتر دوای ئەوەی ئێمە لە پەكەكە جیابووینەوە، سەركردایەتیی پەكەكە ئۆپەراسێۆنێكی دژی ئەو خەڵكە وڵاتپارێزە دەستپێكرد كە بڕوایان بە فیكری نەتەوەیی هەبوو، هەموویان پاكتاوكردن، بۆیە من بە راشكاوی دەڵێم ئۆپەراسیۆنی دەستگیركردنی عەبدوڵا ئۆجەلان، ئۆپەراسیۆنێكی گەورە بوو كە هەموو دەوڵەتانی داگیركاری كوردستان بەشداری بوون، ئامانجیش لەم ئۆپەراسیۆنە ئەوە بوو كە پەكەكە لە فیكری نەتەوەیی دابماڵن. ئێستا وەك دەبینین هەموو دەوڵەتانی ناوچەكە پەكەكە وەك هێزێكی چەپ بۆ خۆیان بەكار دێنن.
* ئایا ئەو كەسانە كێن كە ئێستا لە سەركردایەتیی پەكەكەدا بەم ئاراستەیە پەكەكە هەڵدەسووڕێنن؟
- كەسە دیارەكانیان بریتین لە (جەمیل بایك، دۆران كەلكان، مستەفا قەرەسوور، موراد قەیلان و .. هتد)، ئەمانە كەسایەتیی كەسیی خۆیان چۆنە، هەر بەو شێوەیەش سیاسەت دەكەن، ئەمەش واتە سیاسەتەكانیان رەنگدانەوەی كەسایەتیی كەسیی خۆیانە، ئەوان سیستمێكیان بۆ پەكەكە داڕشتووە كە خزمەتی دەوڵەتانی داگیركەری كوردستان دەكات و ئەو دەوڵەتانە ئامانجەكانی خۆیان لەناو ئەو سیستمەی پەكەكە جێبەجێ دەكەن، ئێستاش گەیشتۆتە ئەو ئاستەی كەسیان ناتوانن ئەو سیستمە رەدبكەنەوە و ناچارن خزمەتی ئەو سیستمە بكەن كە گەوهەری كوردایەتی رەتدەكەنەوە، لەلایەكی دیكە ئەم سەركردانە گومان لەسەر كوردبوونیان هەیە، هەر بۆ نموونە كەس نازانێت (دۆران كاڵكان) سەر بە چ نەتەوەیەكە، بەڵام دەزانین كورد نییە. مستەفا قەرەسوور هەزار شاهیدی پێویستە بۆ ئەوەی بزانرێت كوردە یان كورد نییە، زیاتر لە 30 ساڵە لەناو پەكەكەیە، هێشتا چوار وشەی كوردی نازانێت و ناتوانێت كۆبوونەوەیەك بە كوردی بكات، جەمیل بایك خۆی بە كورد نازانیت و خۆی بە عەلەوی دەزانێت، موراد قەرەیلان تەنیا خزمەتی چەپ دەكات و بڕوای بە نەتەوەیی نییە، بۆیە دەتوانم زۆر راشكاوانە بڵێم كە پەكەكە لە فیكری نەتەوەیی داماڵدراوە، سیتمێكی هەیە لەدەست دەرچووە و كۆنتڕۆڵ ناكرێت، شێوازی كاری رێكخراوی لەهەر كاتێكی دیكە ترسناكترە بۆ ئەنجامدانی كاری تێكدان و تیرۆریستی.
* ئێستا باس لەوە دەكەن كە پەكەكە لە دابونەریتی كوردەواریش دوور كەوتۆتەوە، ئەو كارانەی بە درێژایی بزووتنەوەی رزگاریخوازیی كوردستان هیچ هێزێكی سیاسی پەنای بۆ نەبردووە، پەكەكە هەموو ئەوكارانە دەكات، ئایا سروشتی ئەم حزبە چۆن ئەم هەموو شتانە قبووڵ دەكات؟
- پەكەكە ئێستا سیاسەتی خۆكوژ پیادە دەكات و ژیان رەدەكاتەوە. لەدوای دەستگیركردنی ئاپۆ، هەموو دەمانپرسی چی بكەین؟ ئەوە بوو پەكەكە دەیگوت لە ماڵبات دەربكەون، واتە ژیان رەدبكەنەوە، فیكری نەتەوەیی رەد بكەنەوە، بۆ جێبەجێكردنی ئەم سیاسەتە هەڵەیەش پەكەكە هەموو كەس بەكار دەهێنێت، هەر لە مێرمنداڵی 10-15 ساڵ تا هەموو تەمەنەكانی دیكە، هەر بۆیە لە دوای دەستگیركردنی ئۆجەلان، پەكەكە بە هەڵە خۆی بونیاد نایەوە و لەسەر ئەو هەڵەیەش بەردەوام بوو، كاتی خۆی كە من بەرپرسیاری پەكەكە بووم، داوام كرد كۆبوونەوەیەكی نەتەوەیی لە نێوان هەموو هێزە سیاسییەكانی كوردستان رێكبخەین، بۆ ئەوەی لەم كۆبوونەوەیەدا یاسا و رێسایەك چاك بكەین و كەس بە كەیفی خۆی رەفتار نەكات، بەڵام پەكەكە ئەمەی قبووڵ نەكرد، بۆیە منیش دەستم لەكار كێشایەوە، ئەمە مانای ئەوەیە پەكەكە هەر دەیەوێت بەو شێوە كار بكات كە خۆی دەیەوێت.
* ئەگەر جارێكی دیكە بگەڕێینەوە سەر رۆژئاوای كوردستان، ئێستا باس لەوە دەكرێت كە پەیەدە هەوڵدەدات چیدیكە گرێدراوی سەركردایەتیی پەكەكە لە قەندیل نەبێت، ئایا ئەمەی بۆ دەكرێت؟
- پەیەدە دەبوو هەندێك تایبەتمەندیی خۆی هەبێت، پێش گرتنی عەبدوڵا ئۆجەلان پەكەكە هەنگاوی هەڵگرت بۆ دروستكردنی (پەیەدە و پژاك) ئەم ئەركە من جێبەجێم دەكرد و بە دوو ئالیەتی جیاواز پەیەدە و پژاكم دروست كرد، قەناعەتی من بەو جۆرە بوو كە دەبێت ئەم دوو هێزە تازەیە وەك هێزێكی نەتەوەیی لە خزمەتی كوردایەتی و كوردستاندا بن. هەروەها ئامانجمان ئەوە بوو پشتگیرییان بكەین بۆ ئەوەی ببنە هێزی سەربەخۆ و گرێدراوی پەكەكە نەبن و بەپێی تایبەتمەندیی كوردستانی خۆیان خەبات بكەن، بەڵام سەركردایەتیی پەكەكە لە قەندیل پێیان داگرت كە دەبێت (پەیەدە و پژاك) گرێدراوی قەندیل بن، هەر بۆیە ئەگەر (پەیەدە و پژاك) هەڵەیەكیشیان هەبێت، هەڵەكە هەڵەی پەكەكەیە، بەڵام وێڕای هەموو ئەمانەش (پەیەدە و پژاك) هەندێك تایبەتمەندیی خۆیان هەیە، ئەگەر ئیمكانیەت و بواریان بۆ هەڵبكەوێت، دەتوانن خزمەتی نەتەوەیی بكەن، بەڵام پەكەكە هەوڵدەدات ئەم دووهێزە هەر لەژێر هەژموونی خۆیدا بێت.