زۆرن ئەوانەی لە ریزەكانی پەكەكە خەباتیان بۆ كوردستانێكی سەربەخۆ كرد و لە پێناوی ئەم ئامانجە بە كوشتن دران، بەڵام ئێستا سەركردایەتیی پەكەكە زۆر بە راشكاوی دەڵێن: دەوڵەتی كوردستان ئامانجی ئێمە نییە و ئەوەشی هەوڵ بۆ دامەزراندنی دەوڵەتی كوردستان بدات، دوژمنی ئێمەیە، ئەمەش مانای ئەوەیە پێش ئەوەی هیچ لایەنێك وەسفی پەكەكە بكات، خۆیان بە راشكاوی دەڵێن ئێمە خۆمان لە بیری نەتەوەیی و نیشتمانی داماڵیوە و ناشمانەوێت هیچ كەسێكی دیكە برەوی پێ بدات، هەر لەسەر ئەم بنەمایەش سیاسەتێكی رادیكاڵی دژی ئەو گەنج و مێرمنداڵانە پیادە دەكەن، كە لە ناوچە جیاوازەكانی كوردستان فریویان دەدەن و بەو تەمەنە منداڵییە چەكداریان دەكەن، لەسەر ئەم پرسەش ئەوانەی لە ریشەوە سیاسەتی پەكەكە دەناسن، جەخت لەسەر ئەوە دەكەنەوە، كە پەكەكە لە سەر بنەمای خەباتی بزووتنەوەی رزگاریخوازیی كوردستان ناڕوات و هەرچی دابونەرێتی كوردانە هەیە، فەرامۆشی كردووە و بۆتە داردەستی ئەو دەوڵەتانەی مەبەستیانە سەقامگیری و ئارامیی كوردستان بشێوێنن. بۆ قسەكردن لەسەر سیاسەتی رادیكاڵی و نانیشتمانیی پەكەكە، ئەم دیدارەمان لەگەڵ خەلیل ئاتاج سیاسەتمەداری باكووری كوردستان ئەنجامدا كە ماوەی زیاتر لە 30 ساڵ خزمەتی پەكەكەی كردووە و ماوەی زیاتر لە 16 ساڵیش لە سەركردایەتیی پەكەكە بووە، بەمجۆرەش وەڵامی پرسیارەكانی گوڵانی دایەوە.

پەكەكە بڕوای بە دابونەریتی كوردەواری نییە و كەسیش لەناو ئەو حزبە خاوەنی ئیرادە و
كەسێتی خۆی نییە


* ماوەیەكە پەكەكە راگەیاندێكی دوژمنكارانەی دژی قەوارەی سیاسیی هەرێمی كوردستان راگەیاندووە و بانگەشە بۆ ئەوە دەكات سەقامگیریی ئەم ناوچەیە بشێوێنێت، ئایا پەكەكە چ سیاسەت و ستراتیژییەكی هەیە كە وا هەڕەشە لەم قەوارە سیاسییەی كوردستان دەكات؟
- پەكەكە ستراتیژییەتی تێكچووە و سیاسەتی رۆژانە پیادە دەكات، هەڵەو كەموكوڕییەكانی خۆیشی دەخاتە سەر پارت و لایەنە سیاسییەكانی دیكەی دەوروبەری، لە باشووریش هەڵە و كەموكوڕییەكانی خۆی دەخاتە سەرشانی پارتی دیموكراتی كوردستان و یەكێتی نیشتمانی كوردستان و دەیەوێت هەڵەكانی خۆی بەمجۆرە سیاسەتە بشارێتەوە. لەسەر ئاراستەی ئەم سیاسەتەی پەكەكە پیادەی دەكات، پەكەكە وای دەبینێت، ئەگەر پارتی دیموكراتی كوردستان بەهێز بێت، ئەو لاواز دەبێت، بۆیە هەوڵدەدات پارتی لاواز بكات، بۆ ئەوەی خۆی بەهێز بێت، ئەمڕۆش بەهۆی ئەوەی پەكەكە لە باكوور لاواز بووە و ناتوانێت لەو بەشەی كوردستان خەباتی خۆی بكات، پاشەكشەی كردووە و هاتۆتە باشوور، دەوڵەتی توركیاش بە بیانووی ئەوەی كە بوونی پەكەكە لە باشوور، هەموو كات هۆكارێكە بۆ ناسەقامگیریی توركیا، بۆیە فشاری گەورە بەكاردەهێنێت، بۆ ئەوەی پەكەكە لە باشوور وەدەرنێت، پەكەكەش لەبەر ئەوەی لەژێر گوشارێكی گەورەدایە و گەیشتۆتە خاڵی كۆتایی، ئەوا بۆ شاردنەوەی ئەو لاوازی و كەموكورتییانەی دەیەوێت ئۆباڵەكەی بخاتە ئەستۆی هەرێمی كوردستان، بۆیە هەڕەشە لە باشووری كوردستان دەكات، لە كاتێكدا هەرێمی كوردستان بۆ ئێستا لە پێش هەموو پارچەكانی دیكەوەیە و قەوارەیەكە لە چوارچێوەی فیدراسیۆنێكدا و بەرەو ئەو ئاراستەیە دەڕوات كە ببێتە دەوڵەتێكی سەربەخۆ.
* لە ئێستای رۆژهەڵاتی ناوەڕاستدا لەگەڵ ئەوەی بارودۆخەكە جۆرێك لە هەستیاری و ئاڵۆزی لەخۆی گرتووە، بەڵام بە دیوێكی دیكەشدا كۆمەڵێك هەلی گرنگی بۆ كورد هێناوەتە پێشەوە، ئایا لەم بارودۆخەدا لە بری ئەوەی هێزە سیاسییەكانی كوردستان لە چوارچێوەی یەك ستراتیژدا یەكبگرنەوە و سوود لەم دەرفەتە وەربگرن، بۆچی پەكەكە خۆی دوژمنایەتی هێزەكانی دیكەی كوردستان دەكات؟ ئایا ئەم رەفتارانەی پەكەكە چەند زیان لەو هەل و دەرفەتانە دەدات كە بۆ كورد دینەپێشەوە؟
- ئێستا لە هەموو پارچەكانی كوردستان بەرەوپێشەوەچوون هەیە، لە باكوور لەگەڵ ئەوەی دەوڵەتی توركیا هەر لە سەرەتای دروستبوونیەوە هەتا ئێستا، كوردی وەك دوژمنی سەرەكیی خۆی سەیر كردووە و هەرچی لە دەستی هاتووە لە كوشتن و گرتن و كاولكاری درێغی نەكردووە، بەڵام وێڕای ئەوانەش سیاسەتی توركیا سەركەوتوو نەبووە، راستە ئێستا كوردی توركیا تەنیا لە ماڵەكانی خۆیاندا بە كوردی قسە دەكەن و لە دەرەوەی ماڵەكانی خۆیان ناتوانن بە كوردی قسە بكەن، بەڵام میللەتی كورد كۆڵی نەداوە و هەر بە زیندوویی ماوەتەوە، لە رۆژهەڵات مەزندەیەك هەیە كە كوردی ئەوێیش راپەڕن، لە رۆژئاوا جۆرێك لە بەرەوپێشەوەچوون هەیە، ئێستا ئەمریكاو فەرەنسا لێ ناگەڕێن كە رۆژئاوا بەرەو پاشەوە بگەڕێتەوە، لە باشووریش وەك دەبینین سەرۆك مسعود بارزانی رۆڵێكی گەورە دەگێڕێت بۆ ئەوەی یەكهەڵوێستی و یەكڕیزی لەنێوان هێزە سیاسییەكانی كوردستان دروست بێت، هەروەها ئێستا لە هەرێمی كوردستان سەرۆكایەتیی هەرێمی كوردستان لەلایەن نێچیرڤان بارزانی سەرۆكایەتی دەكرێت و سەرۆكی ئەنجومەنی وەزیرانیش مسرور بارزانی-یە، بۆیە ئەوانیش وەك سەرۆكایەتیی هەرێم و ئەنجومەنی وەزیرانی كوردستان دەتوانن رۆڵ و كاریگەریی خۆیان لە پارچەكانی دیكەش بگێڕن، بەڵام بەداخەوە لە هەموو ئەم بارودۆخەدا پەكەكە سیاسەتێكی هەڵە پیادە دەكات و لە بری ئەوەی هاوشانی هێزە سیاسییەكانی دیكە هەوڵبدات ئەو یەكڕیزییەی پێویستە بۆ كورد لەم قۆناخە فەراهەمی بكات، ئاستەنگی بۆ دروست دەكات و دەیەوێت كورد ئەم دەرفەتە لەدەست بدات.
* پەكەكە لە سەرەتای دروستبوونیەوە بانگەشەی بۆ دەوڵەتی سەربەخۆ و كوردستانی گەورە دەكرد، بەڵام ئێستا دەركەوتووە كە خەتی ستراتیژیی پەكەكە سیاسەتێكی نەتەوەیی نییە، ئایا هەر لە سەرەتای دروستبوونیەوە پەكەكە خۆی لە سیاسەتی نەتەوەیی دوور خستۆتەوە؟
- پێش ئەوەی پەكەكە دابمەزرێت، ئێمە لە ساڵی 1975 گرووپێكی 10 كەسی بووین، لەسەر بنەمایەكی نەتەوەیی بیرمان دەكردەوە، كە پەكەكە دامەزرا و داوای سەربەخۆیی كوردستانی كرد، ئێمەش پەیوەندیمان بە پەكەكەوە كرد، ئەوجا لەگەڵ ئەوەی ئێمە بە ئامانجی سەربەخۆیی كوردستان دوای پەكەكە كەوتین، بەڵام بۆمان دەركەوت كە پەكەكە هەر لە سەرەتای دروستبوونیەوە لەسەر بنەمای فیكرێكی نەتەوەیی دروست نەبووە، بەڵكو زیاتر پابەندی ئایدیۆلۆژیەتێكی چەپی سۆشیالیزمی بووە و بە پلەی یەكەم بایەخی بە خەباتی چینایەتی داوە و بە پلەی دووەم و سێیەم باسی كوردستانی كردووە، لەسەر ئەم پرسە عەبدوڵا ئۆجەلان خۆی دەڵێت: «من لە بری پرسی كورد، فێری سۆسیالیزم بووم..»، ئەمەش بووە ئاراستەی سیاسەتی پەكەكە، بۆیە كاتێك هەڵسەنگاندن بۆ پەكەكە دەكەین دەبینین لە رووی بیری نەتەوەییەوە زۆر لاوازە، لەسەر ئەم بنەمایە من وەك پێشتریش ئاماژەم بەوە كرد كە هەر لەسەرەتاوە ستراتیژییەتی پەكەكە شاش بووە، دەبوو بیری نەتەوەیی بخرایەتە پێش هەر شتێكی دیكە، بەڵام ئەم سیاسەتە شاشەی پەكەكە وایكردووە كە هەموو نەتەوەی كورد بە ناوی هۆز و فیودالیزم بكاتە دوژمنی خۆی، بەڵام ئەگەر لەسەر بنەمای بیری نەتەوەیی سیاسەتی بكردایە، ئەوا ئاسۆیەكی گەورەی لەبەردەم دەكرایەوە و هەموو خەڵكی كوردستانی بە دوژمنی خۆی نەدەزانی، هەروەها لەسەر ئاستی پارچەكانی دیكەی كوردستانیش پەكەكە بەهەمان شێوە تەواوی هێز و لایەنە كوردستانییەكانی بە دوژمنی خۆی زانیوە، ئەگەر لەسەر بنەمایەكی نەتەوەیی بیری بكردایەتەوە، هەمووانی وەك دۆستی خۆی سەیر دەكرد. پەكەكە هەر لەسەرەتای دامەزراندیەوە هەوڵیداوە خۆی لە مێژووی بزووتنەوەی رزگاریخوازیی كوردستان داببڕێت و زیاتر بایەخی بە رووە گشتییەكەی مێژوو داوە، هەر بۆیە هەرگیز لە ناو ئەدەبیاتی سیاسیی پەكەكەدا باسی مێژووی بزاڤی رزگاریخوازیی كوردستان نەكراوە، یان باسی هێز و لایەنە سیاسییەكانی كوردستان نەكراوە، ئەمەش مانای ئەوەیە پەكەكە خۆی لە مێژووی بزاڤی رزگاریخوازیی كوردستان داماڵیوە و هەوڵیداوە بەو شێوەیە سیاسەت بكات، كە مێژووی بزووتنەوەی رزگاریخوازیی كوردستان لەگەڵ ئەودا دەستی پێ كردووە. تەنانەت لە ساڵی 1985یش كاتێك پەكەكە لەسەر سنوور چالاكی دەكرد، ئەو چالاكییانەی پەكەكە ئامانجی ئەوە بوو كە لەو ناوچانە چەندین هۆزی كوردی هەن، خۆیان بە لایەنگیری پارتی دەزانی، ئەو لەمیانەی ئەو چالاكیانەی ئامانجی ئەوە بوو ئەوان تێوەبگلێنێت، بۆیە لە میانەی ئەم چالاكییانە شەڕێك لەنێوان پەكەكە و حزبی شیوعی عێراق دروست بوو، پارتی داوای لە پەكەكە كرد كە لەو ناوچانە بكشێتەوە، بەڵام پەكەكە ئەو داوایەی رەتكردەوە، بەمەش جۆرێك نیگەرانی لەنێوان پارتی و پەكەكە دروست بوو، بەڵام شەڕ دروست نەبوو. پەكەكە ئامانجی ئەوە بوو، بە هەر جۆرێك بێت، خۆی لە هێزە سیاسییەكانی دیكە بەهێزتر بكات، بەڵام لە ساڵی 1991 دوای سەرهەڵدانی باشوور كە هێزەكانی باشوور زۆر بەهێز بوون، بەتایبەتی پارتی و یەكێتی، پاشانیش هەڵبژاردن كرا و حكومەت و پەرلەمانی كوردستان دامەزرا، پەكەكە ئەم بەهێزییەی باشووری بە مەترسی بۆ سەرخۆی لەقەڵەم دا، بۆیە دژایەتیی خۆی بۆ پەرلەمان و حكومەتی هەرێمی كوردستان راگەیاند، هەروەها پارتی ئازادیی كوردستانی لە باشوور دامەزراند، ئەمەش رەنگدانەوەیەكی دیكەی ئەو گرژی و ناكۆكییە بوو كە لەنێوان پەكەكە و پارتیدا هەبوو، پاشان ئەم گرژییانە هەڵكشان و شەڕ هەڵگیرسا، پەكەكە لە ساڵانی 1992، 1995، 1997 چەند جارێك لە باشوور شەڕی هەڵگیرساندووە، بەڵام پارتی هەموو كات هەوڵیداوە كە لەگەڵ پەكەكە بە دیالۆگ و رێككەوتن كێشەكان چارەسەر بكات، بۆیە سەرەنجام پەكەكە كاتێك زانی لاواز بووە، ناچار بوو لەگەڵ پارتی رێككەوتن بكات، بەپێی ئەم رێككەوتنە پەكەكە دەبوو گۆڕەپانی خەباتی خۆی بباتەوە بۆ باكوور، بەڵام نەیتوانی لە باكوور هیچ بكات.
* لایەنێكی دیكەی سیاسەتی پەكەكە، چەكداركردنی نەوجەوان و گەنجی خوار تەمەنی 18 ساڵی كوردستانە، لەمەش خراپتر، كاتێك ئەم مێرمنداڵانە دەبنە چەكداری پەكەكە، رێگرییان لێ دەكات كە پەیوەندی بە كەسوكاریانەوە بكەن، یان رێگە نادات باوك و دایكیشیان سەردانیان بكەن، ئایا لەناو بزووتنەوەی رزگاریخوازیی كوردستاندا، هیچ لایەنێكی دیكە بێجگە لە پەكەكە بەمجۆرە سیاسەتی كردووە؟
- پەكەكە لەناو بزووتنەوەی رزگاریخوازیی كوردستاندا حاڵەتێكی جیاوازە، هەر كەسێك كە پەیوەندی بە پەكەكەوە كرد، ئیدی نابێت خێزان و كەسوكار و بنەماڵەی هەبێت، پەكەكە دەڵێت ئەوە موڵكی منە و دەبێت لەژێر فەرمانی مندا بێت، من ماوەی 30 ساڵ خزمەتی پەكەكەم كرد، لەسەر ئەو بنەمایەش پەكەكە بووم، لەبەر ئەوەی دەیگوت من دەوڵەتی سەربەخۆیی كوردستان دادەمەزرێنم، بەڵام كاتێك پەكەكە دەستی لە كوردستانیبوون و دەوڵەتی نەتەوەیی بەردا، ئێمە وتمان لەناو پەكەكە چی بكەین؟ بۆچی بە فەرمانی ئێمە گەنجی كورد بە كوشتن بدەین و ئامانجەكەشی كورد و كوردستان نەبێت؟ بۆیە ئێمە وەك هێزێكی گەورە لە پەكەكە جیابووینەوە، بەڵام دوای ئەوەی ئێمە 30 ساڵ خزمەتی پەكەكەمان كرد، ئێستا بە ئێمە دەڵێن ئێوە خائینن، پرسیار لێرەدا ئەوەیە، ئایا ئێمە خیانەتمان لەچی كردووە و چ خیانەتێكمان كردووە؟ بۆیە ئەمە راشكاوانە مانای ئەوەیە كەس لەناو پەكەكە خاوەنی ئیرادەی كەسیی خۆی نییە، پەكەكە دەڵێت: (تۆ هی منیت، كە لەگەڵ من نەمایت، ئیدی نابێت بوونت هەبێت). لەمەش زیاتر سەبارەت بەو گەنجانەی كە تەمەنیان لەنێوان 12-17 ساڵە و پەكەكە چەكداریان دەكات، پەكەكە بۆ ئەمانیش یاسای خۆی هەیە، رێگە نادات نە ئەو گەنجانە پەیوەندی بە كەسوكاریانەوە بكەن، نە كەسوكاریشیان بیانبینن، هەر بۆ نموونە ئەگەر باوكێك سەردانی رۆڵەكەی خۆی بكات و داوا بكات كە بیبینێت، رێگە نادەن باوك رۆڵەكەی خۆی ببینێت و پێی دەڵێن كوڕی تۆ لای ئێمە نییە، بۆیە زۆر جار دەڵێن ئەمە دژی دابونەریتی كوردانەیە، بەڵام پەكەكە بڕوای بە دابونەریتی كوردانە نییە.
* هەندێك لەوانەی لە نزیكەوە شارەزای سیاسەتی پەكەكەن، جەخت لەسەر ئەوە دەكەنەوە كە پەكەكە شەڕی بەوەكالەت بۆ هەندێك دەوڵەتی ئیقلیمی دەكات، لەو بارەوە رات چییە؟
- من پرسیارێك دەكەم، پەكەكە ئیشی چی بوو لە شنگال؟ ئایا شنگال چ گرنگییەكی بۆ پەكەكە هەیە؟ بێگومان پەكەكە بە دەستی حەشدی شەعبی لە شنگال بوو، هەروەها ئێران ئەوكات دەیویست لەو ناوچەیە كێشە هەبێت، بەدەستی ئێران و بە رێگەی حەشدی شەعبی پەكەكە ئەو رۆڵەی دەگێڕا، لەسەر ئەم بنەمایە ئەگەر سەیری سیاسەتی توركیا و ئێران لەسەر ئاستی رۆژهەڵاتی ناوەڕاست بكەین، دەبینین توركیا دەویەێت بە رێگەی شەڕ و هێزی سەربازی نفووزی خۆی زیاد بكات، بەڵام لەم كارە سەركەوتوو نەبووە، بەڵام ئێران بێدەنگە و بە شێوەیەكی سیاسی كارەكانی خۆی دەكات بۆیە لە توركیا سەركەوتووتر بووە، لەم چوارچێوەیەشدا ئێران توانیویەتی بەشێكی بەرنامەكانی خۆی لەم ناوچەیە لە رێگەی پەكەكەوە جێبەجێ بكات.
* شەڕی داعش زیانێكی گەورەی لە كوردانی رۆژئاوا دا، لە هەمانكاتدا پەیەدەش كە لەژێر كاریگەریی پەكەكە بوو، بووە هۆكاری ئەوەی خەڵكێكی زۆری رۆژئاوا ماڵ و حاڵی خۆیان بەجێبهێڵن، ئایا رۆڵی پەكەكە لە رۆژئاوا چۆن هەڵدەسەنگێنن؟
- گومانی تێدا نییە كە شەڕی داعش لە رۆژئاوا دەستی پێكرد، رۆژئاوا زەرەرو زیانێكی هێجگار گەورەی بەركەوت، تەنانەت شاری كۆبانی گەیشتە ئەوەی بە تەواوەتی داگیر بكرێت و لەدەست بچێت، ئاشكرایە ئەمریكا نەیدەویست كۆبانێ بكەوێت، چونكە ئەگەر كۆبانێ بكەوتایە، لەوانە بوو هەموو كوردستان داگیربكرێت، لەسەر ئەم بنەمایە و لەسەر بڕیاری سەرۆك مسعود بارزانی پێشمەرگە بە توركیادا چووە كۆبانێ و لەسەر لێواری داگیركردن ئەو شارە قوتار كرا، سەبارەت بە پەیوەندیی پەكەكە و پەیەدە، ئەوە هیچ گومانی تێدا نییە كە پەیوەندییەكی بەهێز لەنێوان پەیەدە و پەكەكە هەیە، بەڵام وەك یەك نین و جیاوازی هەیە، هەر بۆیە پەیەدە لە شەڕی دژی داعش شەڕێكی باشیان كردو هەروەها كارێكی باشیشیان كرد، ئەمەش بووە هۆكاری ئەوەی كە پەیەدە بەهێز بێت و بارودۆخێكی دیكە لە رۆژئاوا هاتەئاراوە، بۆیە دەتوانم بڵێم شەڕی دژی داعش لە سەرەتادا زەرەر و زیانێكی هێجگار گەورەی لە رۆژئاوا دا، بەڵام سەرەنجام بە قازانج بۆ دۆزی كورد و رۆژئاوا شكایەوە، كە بە جۆرێكە مرۆڤ ناتوانێت بە خەیاڵیش ئەو واقیعەی ئێستای رۆژئاوا ببینێت، بۆیە شەڕی داعش بووە هۆكارێك بۆ ئەو بارودۆخەی ئێستا لە رۆژئاوا هاتۆتە ئاراوە.
* كەواتە لەمیانەی ئەم قسانەت دەكرێت بڵێن، بە ئایندەی رۆژئاوا گەشبینیت؟
- مەزڵووم كۆبانی كە ئێستا رۆڵی كاریگەری لەناو پەیەدە لە رۆژئاوا هەیە، لە نزیكەوە دەیناسم و چەندین ساڵ لە شاخ پێكەوە بووین، مەسەلەكە تەنیا پەیوەست نییە بە پەیەدە، بەڵكو پەیوەستە بەو هێزە سەرەكییانەی رۆڵیان هەیە لە رۆژئاوا، ئێوە خۆتان دەزانن توركیا لە رۆژئاوا ئامانجی خۆی هەیە، كاتیك لە باشوور هەوڵدەدات پەكەكە لە خواكورك و قەندیل تێكبشكێنێت، ئەوا لە رۆژئاواش لە هەوڵی ئەوەدایە بە چەند هێڵێك رۆژئاوا لە یەكتری جیا بكاتەوە، هێڵی یەكەمی لە جرابلوسەوە دەست پێكرد، پاشان ئەوەی پێدەڵێن رۆژهەڵاتی فورات، ئێستاش دەیەوێت هێڵێك لە كۆبانێوە لێبدات كە (گرێ سپی هەتا شنگال ) ببات و هێڵێكیش هەتا (عین عیسا) ببات، توركیا ئەگەر بۆی بچێتەسەر، ئەمە ئامانجیەتی، بۆ ئەمەش پێویستی بەوەیە، یەكەم رووسیا رازی بكات، دووەم ئەمریكا رازی بكات، بۆ ئەوەی تەفویز بدات بە توركیا، بەڵام هەتا ئێستا ئەم رێككەوتنە دیار نییە، بۆیە ئایندەی رۆژئاواش جارێ نازانرێت چۆن دەبێت.
* ئەگەر دیسانەوە باس لە هەڕەشەكانی پەكەكە بكەینەوە بۆ هەرێمی كوردستان، ئایا پەكەكە لەو ئاستەدایە كە شەڕی هەرێمی كوردستان بكات؟
- مەسەلەكە راستەوخۆ پەیوەست نییە بە پەكەكە، هەندێك دەوڵەتی دراوسێی هەرێمی كوردستان ئەگەر بەرژەوەندییان لەوەدا بێت، كێشە و ئاڵۆزی لەم ناوچەیە دروست بكەن، ئەوا بە رێگەی پەكەكە دروستی دەكەن، بەڵام ئەگەر بەرژەوەندییان لە سەقامگیریی ئەم ناوچەیەدا بێت، پەكەكە ناتوانێت هیچ بكات، ئێستا پەكەكە خۆی لە تەنگژەیەكی گەورەدایە و لە ژێر گوشارێكی هێزی ئاسمانی توركیادایە و ناتوانن سەری خۆیان هەڵبڕن، بۆیە بە ناچاری خۆیان خزاندۆتە ناو گوندە سنوورییەكانی باشوورەوە و بەهۆی ئەوانیشەوە رۆژانە بۆمبباران دەكرێن، بۆیە ئەگەر پەكەكە هەوڵبدات كێشە و تەنگژە بۆ باشوور دروست بكات، بە پلەی یەكەم خۆی زەرەر دەكات، لەبەر ئەوەی ئێرەش دەكاتە دوژمنی خۆی، سەبارەت بەو هێزەشی كە رایگەیاندووە لە باشوور دروستی كردووە، ئەوانە زۆر كەمن لەنێوان 20-30 چەكدار دەبن، پەكەكە ئێستا هێزەكانی بڵاوە پێكردووە و هێزێكی ئەوتۆی نییە بتوانێت هێرش بكات، تەنیا ئەگەر بتوانن كاری تیرۆریستی ئەنجام بدەن، هێزی پەكەكە سێ جۆرە، یەكەمیان هێزی شەهیدەكانیەتی، دووەم هێزی ئەوانەی لە پەكەكە جیابوونەتەوە، سێیەم، ئەوانەی ئێستا لە چیان، راشكاوانە دەیڵێم، ئەو هێزەی ئێستای پەكەكە لە دوو هێزەكەی دیكە زۆر كەمترە، بۆیە پەكەكە ئێستا لە بارودۆخێكی زۆر خراپدایە، خۆی بە هەندێك دەوڵەتی ئیقلیمی وەك ئێران هەڵواسیوە، بەڵام ئێرانیش تەنیا لەو كاتانە كاری بە پەكەكەیە كە مەبەستی بێت ئەركەكانی خۆی پێ جێبەجێ بكات.