كێشە و گێچەڵی پەكەكە بە تەواوی هێزە سیاسییەكانی ناو بزووتنەوەی رزگاریخوازیی كوردستان، كێشەیەكی تازە نییە، ئەم حزبە هەر لە سەرەتای دروستبوونیەوە ئایدیۆلۆژیەتێكی توندڕەوی ستالینی و پۆل پۆتی پیادە كردووە و ئەوەی لە دەرەوەی ئایدیۆلۆژیەتەكەی خۆی بێت، بە دوژمنی دەزانێت و چەندی بۆی بكرێت بە دڕندانە مامەڵەی لەگەڵ دەكات. لەدوای دامەزراندنی یەكەم پەرلەمان و حكومەتی كوردستان لە هەرێمی كوردستان، پەكەكە بە هەموو شێوەیەك هەوڵیداوە ئەم ئەزموونە لەبار بەرێت و چەندین جار شەڕی خوێناوی لەگەڵ ئەو هێزە سیاسییانە كردووە كە پارێزگارییان لە یەكەم ئەزموونی حوكمڕانیی كوردستانی كردووە و، چەندین جاریش هێزە سەرەكییەكانی هەرێمی كوردستان بەگشتی و پارتی و یەكێتی بەتایبەتی هەوڵیانداوە كێشەو گێچەڵی پەكەكە بە دیالۆگ و چارەسەری ئاشتییانە چارەسەر بكەن، بەڵام رۆژ لەدوای رۆژ پەكەكە زیاتر شووڵی لێ هەڵكێشاوە و زیاتر هەڕەشەی لە ئەزموونی حوكمڕانیی كوردستان كردووە، هەتا گەیشتۆتە ئەوەی بەم دواییە هێزێكی چەكداری پێكهێناوە و دەیەوێت شەڕی حكومەت و پەرلەمانی كوردستان بكات، بۆ قسەكردن لەسەر كێشە و گێچەڵەكانی پەكەكە بە هەرێمی كوردستان، ئەم دیمانەیەمان لەگەڵ بۆتان ئەحمەد سیاسەتمەداری باكوور ئەنجامداو بەمجۆرە وەڵامی پرسیارەكانی گوڵانی دایەوە.

* لەگەڵ ئەوەی پەكەكە بە درێژایی تەمەنی خۆی نەیتوانیوە تەنیا گوندێكی كوردستانی توركیا ئازاد بكات، بەڵام لە ئێستادا هەڕەشە لە هەرێمی كوردستان دەكات، ئایا بە بۆچوونی ئێوە دۆخی پەكەكە ئێستا لە كوردستانی توركیا چۆنە؟
- بە تێڕوانینی من وەزعی پەكەكە لەناو كوردانی باكووردا زۆر خراپە، بەشی زۆری ئەو بەرپرسانەی كوردی باكوور لە شەڕەكانی پەكەكەدا كوژراون و تەنانەت دەوڵەتی توركیا دەڵێت: «تەنیا 700 چەكداری پەكەكە ماون»، ئەمەش مانای ئەوەیە دەوڵەتی توركیا بارودۆخەكەی كۆنتڕۆڵ كردووە و پەكەكەش توانای جووڵەی سەربازی لە باكووری كوردستان نەماوە، ئەمەش مانای ئەوەیە رووی سەربازییەوە پەكەكە لە باكوور لە كەماسیەكی گەورەدایە، هۆكاری ئەم كەماسیەشی دەگەڕێتەوە بۆ ئەوەی پەكەكە دوو شەڕی خەندەقی كرد، هەموو كەس دەزانێت ئەو شەڕانە زۆر بێ مانا بوون، لەبەر ئەوەی لانیكەم 8-10 هەزار گەنجی كوردی بە كوشتن دا، بۆیە لە ئێستا كوردی باكوور بە هیچ شێوەیەك پشتگیری پەكەكە ناكەن، هەروەها كوردی باكوور لە پەكەكە نیگەرانن، لەبەر ئەوەی لەوە تێگەیشتوون ئامانج و ستراتیژیەتی پەكەكە هیچ پەیوەندی بە كورد و كوردستانەوە نییە و ئەوان رەچاوی هیچ بەرژەوەندییەكی كورد و كوردستان ناكەن و، ئەوەی دەیكەن بریتییە لە وێرانكردنی گوندو شارەكانی كوردستان و بە كوشتدانی گەنج و لاوی كورد، دیارە هەموو ئەو شەڕانەش كە پەكەكە دەیكات، تەنیا بۆ ئەوەیە خۆی لەو تەنگژەیە رزگار بكات كە ئێستا تێی كەوتووە، بەڵام وێڕای هەموو ئەمانەش ئەم نیگەرانییەی كوردانی باكوور لە پەكەكە نەبۆتە هۆكاری ئەوەی كوردی باكوور بێدەنگ بێت، بەڵكو لە بۆنەكانی وەك هەڵبژاردن و نەورۆز دەبینین بە سەدان هەزار كورد دێنە دەرەوە و بەشداری بۆنە نیشتمانییەكان دەكەن و بە فراوانی بەشداریی هەڵبژاردنەكان دەكەن، ئەمەشی كە دەیكەین، خۆشەویستییە بۆ خاك و نیشتمان، نەك وەڵامدانەوەی خواستەكانی پەكەكە بێت. ئێستا پەكەكە لەم حاڵەتە خراپ و پەراوێزخراوەدایە لەناو كوردانی باكوور و ناتوانێت لە باكوور تەنیا یەك هەنگاویش هەڵبگرێت، بەڵام لەبەر ئەوەی پەكەكە پێویستی بە كەشێكی فەوزا و ناسەقامگیری هەیە، بۆ ئەوەی شكستەكانی خۆی پێ بشارێتەوە، ئێستا هەوڵدەدات لە هەرێمی كوردستان ئاژاوە و ناسەقامگیری دروست بكات. پەكەكە بە جۆرێك پڕۆپاگەندەی ژەهراوی دژی پارتی دیموكراتی كوردستان دەكات، كە دوژمنانی كوردستانیش پڕوپاگەندی وایان نەكردووە و ئامانجەكەیان دوورە لە ئەقڵانییەت و كوردایەتی، بێگومان ئامانجی پەكەكە لەم پڕوپاگەندە ژەهراوییانەشی دژی پارتی، بۆ ئەوەیە شەڕێكی دیكەی نێوان كورد و كورد هەڵبگیرسێنێت، لەوانەیە پشتر خەڵكانێك بە گومان بوون لەو سیاسەتە قێزەونەی كە پەكەكە پیادەی دەكات، بەڵام ئێستا كوردانی باكوور و باشووریش گەیشتوونەتە ئەو قەناعەتەی پەكەكە بۆیە ئەم سیاسەتە قێزەونە پیادە دەكات، بۆ ئەوەی خۆی لەو تەنگژەیە قوتار بكات كە تێی كەوتووە.
* ئاماژەت بەوە كرد كە پەكەكە وەك هێزی سەربازی ئەو توانایەی نییە كە شەڕی بەرەیی لەگەڵ هەرێمی كوردستان بكات، پرسیار لێرەدا ئەوەیە، ئەی ئەو هەڕەشانەی ئێستا مانای چییە؟
- پێشتر پەكەكە لە ساڵانی نەوەدەكانی سەدەی رابردوو بەو ئامانجە شەڕی پارتی دیموكراتی كوردستان و یەكێتی نیشتمانی كوردستانی دەكرد، كە پێی وابوو هێزێكی گەورەی هەیە و دەتوانێت هەرێمی كوردستان لە دەستی پارتی و یەكێتی دەربهێنێت، بەڵام پەكەكە ئێستا دەزانێت ئەو هێزەی نییە كە شەڕی بەرەیی دژی حكومەتی كوردستان بكات، هەروەها دەشزانێت خۆی لە تەنگژەیەكی گەورەدایە، بۆیە كەوتۆتە بڵاوكردنەوەی پڕوپاگەندەی ژەهراوی بەوەی پارتی بۆتە پاشكۆی توركیا، لەم حاڵەتەشدا كە ناتوانێت شەڕی بەرەیی بكات، كەوتۆتە حاڵەتێكی بێ ئومێدی و پەنا دەباتە سەر شێوازی ناردنی دەستەی بچووك بچووك ( 8-10 ) كەسی بۆ ئەوەی كاری تێكدان و ئاژاوە و كوشتن ئەنجام بدەن، راشكاوانەتر واتە پەنابردنە بەر كاری تیرۆریستی بۆ ئەوەی سەقامگیریی هەرێمی كوردستان بشێوێنێت.
* ئەوەی لە پڕوپاگەندەكانی پەكەكە دەردەكەوێت، جۆرێك لە هەڵكشان و داكشانی پێوە دیارە و ماوە ماوە شێوازی پڕۆپاگەندەكانی دەگۆڕێت، ئایا ئەم پڕوپاگەندانەی پەكەكە خۆی هۆكارێك نییە بۆ هاندانی توركیا بۆ ئەوەی توركیا بێتە ناوخاكی هەرێمی كوردستانەوە؟
- هەر هۆكارێك ببێتە ئەگەری دروستبوونی ناسەقامگیری، پەكەكە پەنای بۆ بردووە، ئاشكرایە پەكەكە لە رووی خەباتی سیاسییەوە و لەژێر ناوی جۆراوجۆری رێكخراوەكاندا لە هەرێمی كوردستان رێگری لێ نەكراوە، هەربۆیە ئەگەر سەرنج بدەین، ئەو رێكخراوانەی پڕوپاگەندەیان بۆ پەكەكە دەكرد، لە بەهاری ئەمساڵ بانگەشەیان بۆ ئەوە دەكرد، ئەوان ئامادەن دژی دەوڵەتی توركیا شەڕ بكەن، دەوڵەتی توركیا بۆ وەڵامدانەوەی پەكەكە هاتە ناو خاكی هەرێمی كوردستان، ئەمەش واتە پەكەكە خۆی بانگەشەی بۆ ئەوە كردووە، سوپای توركیا بێتە ناو خاكی هەرێمی كوردستان، ئەوجا دوای ئەوەی توركیا هاتە ناو خاكی هەرێمی كوردستان، پەكەكە پڕوپاگەندەی ئەوە دەكات كە ئەمە خەتای پارتییە، ئەمەش مانای ئەوەیە پەكەكە رووی خۆی لە توركیا وەرگێڕاوە و كەوتۆتە گیانی پارتی. سەبارەت بە پڕوپاگەندەكانیشیان دژی پارتی یەكەم جار دژی بەڕێز نێچیرڤان بارزانی دەستیان پێكرد و وایان پیشان دا كە بەڕێز سەرۆك بارزانی لەو بابەتە ئاگادار نییە، بەڵام لەم 10-12 رۆژەی دوایی كە زانییان ناتوانن دووبەرەكی لەناو پارتی دروست بكەن و پارتی لەوە گەورەترە بە پڕوپاگەندەی ئەوان دووبەرەكی تێ بكەوێت، ئێستا هەموو ئەندامێكی پارتی تاوانبار دەكەن، لەمەش زیاتر ئێستا دەزانن پارتی رێككەوتنی پێكهێنانی حكومەتی لەگەڵ بزووتنەوەی گۆڕان هەیە، پەكەكە هێرش دەكاتە سەر گۆڕانیش، هەروەها پشتر دەیانگوت یەكێتی دژی ئەو سیاسەتەیە كە پارتی پیادەی دەكات، بەڵام دوای رێككەوتنی یەكێتی و پارتی بۆ پێكهێنانی حكومەت، ئێستا هێرش دەكەنە سەر یەكێتی و دەڵێن: نیوەی یەكێتی دژی سیاسەتی پارتین و نیوەكەی دیكەیان لەگەڵ پارتی بوونەتە یەك بەرە، بۆیە هێرش دەكەنە سەر یەكێتی نیشتمانی كوردستانیش، هەموو ئەم پڕوپاگەندانەی پەكەكە بۆ ئەوەیە بڵێت: مادام دەوڵەتی توركیا بە تەواوەتی كۆنتڕۆڵی هەرێمی كوردستانی كردووە و ئەو حكومەتەشی لە هەرێمدا هەیە، پاشكۆی دەوڵەتی توركیایە، بۆیە لەسەر بنەمای ئەم پڕوپاگەندە بێ بنەمایە بانگەشەی ئەوە دەكەن، مادام حكومەتی هەرێمی كوردستان پاشكۆی دەوڵەتی توركیایە، ئەوا ئەوان دەیانەوێت هەرێمی كوردستان رزگار بكەن، ئەمەش مانای ئەوەیە وازیان لە شەڕی دژی توركیا هێناوە و دەیانەوێت شەڕێك لە دژی هەرێمی كوردستان هەڵبگیرسێنن. بێگومان شەڕی پەكەكە ناسەقامگیری لە كوردستان دروست دەكات، پەكەكە هەتا ئێستا لە قووڵایی 25كیلۆمەتر لەناو خاكی باشووری كوردستان شەڕ و ئاژاوەی دروست كردووە و بە سەدان گوندی ناچار كردووە كە چۆڵ بكرێن، هەروەها بە بەردوامی لەناو خاكی هەرێمەوە ئیستفزازی توركیا دەكەن و ئەوانیش دێن ئەو ناوچانە بۆردومان دەكەن و هاووڵاتیانی سڤیل دەبنە قوربانی، بێگومان دەوڵەتانی دراوسێی هەرێمی كوردستانیش سوودێكی زۆر لەم ئاژاوەگێڕییەی پەكەكە وەردەگرن و حەزدەكەن سەقامگیریی هەرێمی كوردستان بشێوێت، بۆیە پەكەكە ئەم هەوڵەی بۆ دروستكردنی ئاژاوە لە هەرێمی كوردستان، شەڕێكی بەوەكالەتە و بۆ دوژمنانی كوردستان بەڕێوەی دەبات.
* پەكەكە لە سەرەتا خۆی وەك ئاڵاهەڵگری بیری نەتەوەیی پیشان دەدا و داوای دامەزراندنی دەوڵەتی كوردستانی گەورەی دەكرد، بەڵام ئێستا خۆی دژی دەوڵەتی كوردستان قسە دەكات، ئایا ئەم دووفاقیە لە سیاسەتی پەكەكە چ مانایەكی هەیە؟
- پێشتر عەبدوڵا ئۆجەلان بە ئێمەی دەگوت، هەر جووڵانەوەیەك بۆ ماوەی 15ساڵ خەباتی كردو سەرنەكەوت، ئەوا لەوە دوا تێكدەشكێت، ئەگەر لەسەر ئەم قسەیەی ئۆجەلان سەیری ئێستای پەكەكە بكەین، ئەوا پەكەكە نزیكەی 40 ساڵ تەمەنیەتی و هیچی بە هیچ نەكردووە، پەكەكە لە سەرەتایدروستبوونی دەیگوت: ئێمە دەوڵەتی سەربەخۆ بۆ هەر چوار پارچەی كوردستان دروست دەكەین، ئەوكات دروشمی پارتی دیموكراتی كوردستان، ئۆتۆنومی بوو، پەكەكە لەبەرامبەر ئەمە دەیگوت داواكردنی ئۆتۆنومی خیانەتە. بەڵام كاتێك سەرۆك مسعود بارزانی و پارتی هەوڵیاندا دەوڵەت دروست بكەن، ئینجا پەكەكە دەیگوت، ئەوەی هەوڵبدات دەوڵەتی كوردستان دابمەزرێنێت، دوژمنی خەڵكی كوردستانە، ئەمەش مانای ئەوەیە بە تەواوەتی هەڵوێستی پێچەوانەی ئەو قسانەی بوو كە پێشتر دەیكردن، هەر بۆیە لە دەستپێكی جووڵانەوەی پەكەكەدا خەڵكی كوردستان بەو هەست و گیانە چوونە ریزەكانی پەكەكە بۆ ئەوەی لە پێناوی بەدیهێنانی دەوڵەتی كوردستان خەبات بكەن، بە راستی ئێمەومانان كە بۆمان دەركەوت پەكەكە لەدروشمی سەربەخۆیی كوردستان پاشگەز بۆتەوە، بۆیە لە پەكەكە جیابووینەوە، ئەمەش لە پێناوی ئەوە بوو كە خەڵك بزانن لەناو پەكەكە، هەستی كوردبوون و كوردستانیبوون بوونی نەماوە. هەر لەم چوارچێوەشدا ئەگەر سەرنج بدەین، دەبینین پەكەكە دژایەتی هەموو حزبە كوردییەكانی لە هەر چوارپارچەی كوردستان كردووە و لەكوێ هەستی كردبێت، هەست و گیانی كوردایەتی لای لایەنێكی سیاسی برەوی پێ دەدەرێت، پەكەكە هێرشی كردۆتە سەر و شەڕی لەگەڵدا كردووە، بەمەش بۆتە باشترین چەك بەدەستی دوژمنانی كوردستانەوە.
* پەكەكە لەماوەی شەڕی دژی داعش بانگەشەی بۆ ئەوە دەكرد، گوایە پێشمەرگە ناتوانێت كوردستان بپارێزێت، بۆیە چووەتە شنگال، بەڵام دواتر شنگالی تەسلیمی حەشدی شەعبی كرد، تێڕوانینتان لەسەر ئەم قسانەی پەكەكە چییە؟
- ئێستاش پەكەكە هەر بەو بیانووە قسەدەكات و دەڵێت، پێشمەرگە ناتوانێت كوردستان بپارێزێت، بۆیە ئێمە هێزێك دروست دەكەین بۆ ئەوەی كوردستان بپارێزین. توركیا دەڵێت، پێشمەرگە ناتوانێت سنوورەكانی بپارێزێت، بۆیە ئێمە دێینە ناو خاكی هەرێم بۆ ئەوەی تیرۆریستان دەربكەین، پەكەكە لە دروستكردنی ئەم زەمینەیە بەرنامەیەكی سەیر و ترسناكی هەیە و هەموویشی دژی بەرژەوەندییەكانی كورد و كوردستانە، فەرموو ئەوەتا رێگەی نەدەدا قایمقامی شەرعیی شنگال دەوامی ئاسایی خۆی بكات، بەڵام پاشان شنگالی تەسلیمی حەشدی شەعبی كرد، خۆ ئەگەر سبەیش پێشمەرگە بۆ پاراستنی (ئاڤاشین و خواكوڕكوك و زاب و قەندیل) بخوازێت بچێتە سنوورەكان و بپارێزێت، بە دڵنیاییەوە پەكەكە شەڕی پێشمەرگە دەكات و شەڕی نێوان كورد و كورد هەڵدەگیرسێنێت، بەمەش دەیەوێت بێ ئومێدی لەناو گەلی هەرێمی كوردستان دروست بكات و متمانە لەنێوان خەڵك و حكومەتی كوردستاندا نەهێڵێت، هەروەها دەخوازێت كارێك بكات كە هانی حكومەتی عێراق بدات، بە بیانووی پاراستنی هەرێمەوە هێزەكانی بێنە ناو هەرێمی كوردستانەوە، سەرانی پەكەكە بەوجۆرە بیر دەكەنەوە، گرنگ نییە كوردستان بە دەست چ داگیركارێكەوە بێت، بەڵام نابێت بە دەستی رۆڵەی ئەم نیشتمانەوە بێت، بەتایبەتیش نایەوێت رێبازی بارزانی و پارتی ئەو شكۆیەی ئێستایان هەبێت، هەر بۆیەشە بە پلەی یەكەم دژایەتی پارتی و رێبازی بارزانی دەكات. لەم بارودۆخەدا گرنگە حكومەت رێگری لەوە بكات ئەم شەڕفرۆشتنەی پەكەكە ببێتە شەڕی نێوان پەكەكە و هەر حزبێكی دیكە لە هەرێمی كوردستان، بۆیە پێویستە ئەو حزبانەی لە حكومەتی هەرێمی كوردستان بەشدارن، خاوەنی یەك گوتار و یەك ئیرادە بن، بۆ ئەوەی پیلانەكانی پەكەكە پووچەڵ بكەنەوە، ئەگەر بەمجۆرە بڕیار بدەن، ئەوا بە دڵنیاییەوە پیلانەكەی پەكەكە بۆ خەڵك ئاشكرا دەبێت و بە ئاسانی پووچەڵ دەبێتەوە.
* لە دوای راپەڕینەكانی گەلانی سووریا، كوردانی رۆژئاوا دەرفەتێكی باشیان بۆ هاتەپێشەوە بۆ ئەوەی خۆیان خۆیان بەڕێوەبەرن، بەڵام پەیەدە لەژێر كاریگەریی سیاسەتەكانی پەكەكە رەوتێكی تاكڕەوی و دیكتاتۆریەتی پیادە كرد، كە وای كرد نزیكەی یەك ملیۆن كوردی رۆژئاوا دەربەدەر بن، كە لە ئێستادا نزیكەی 300 هەزاریان لە هەرێمی كوردستانن، ئایا بۆچی پەكەكە بە سیاسەتی هەڵە خەڵكی رۆژئاوای دەربەدەر كرد؟
- كوردانی رۆژئاوا وەك خەڵكانێكی مەدەنی كە سەر بە هیچ پارتێكی سیاسیش نەبوون، لەژیر كاریگەری سیاسەتە هەڵەكانی پەكەكە لەسەر پەیەدە زیاتر لە یەك ملیۆن كەسیان وڵاتی خۆیان بەجێهێشتووە، كە زیاتر لە 300 هەزاریان چوونەتە توركیا و هێندەشیان لە هەرێمی كوردستانن و ئەوەندەی دیكەشیان چوونەتە هەندەران، هەروەها (ئەنەكەسە و لەشكری رۆژ)یش كە ئەوانیش دوو هێزی كوردانی رۆژئاوان، هەوڵیانداوە هیچ رووبەڕووبوونەوەیەك لە سیاسەتی پەكەكە و پەیەدە دروست نەكەن، بۆ ئەوەی رەوشەكە لەوە خراپتر نەبێت، بەڵام لەبەرامبەر ئەمەدا پەیەدە ئەوكات لە ژێر كاریگەریی پەكەكە كانتۆنیان دروستكرد، بەڵام شێوازێكی دیكتاتۆری زۆر توندیان پیادە كرد، پەیەدە سوودێكی زۆری لە شەڕی دژی داعش وەرگرت، ئەوكات بەهۆی ئەو شەڕەوە هەوڵیدا خۆی بەهێز بكاتەوە، بەڵام دوای ئەوەی شەڕەكە تەواو بوو، خەڵك لە حاكمییەتی پەیەدە ناڕازی بوو، بۆیە ئەمریكا و فەرەنسا هاتنە سەرخەت بۆ ئەوەی باشوور لەسەر رۆژئاوا كاریگەری هەبێت، بۆیە لەم حاڵەتەدا تا راددەیەكی زۆر دەبێت پەیەدە لە ژێر كاریگەریی پەكەكە خۆی رزگار بكات، بۆیە ئێستا پەكەكە لە رۆژئاوا خەریكە كۆتایی دێت، بۆیە دەیەوێت لە هەرێمی كوردستان شەڕێك هەڵبگیرسێنێت، بەڵام هەرچۆنێك بێت، دەبێت بارودۆخی رۆژئاوا گۆڕانكاری بەسەردا بێت و بە شێوەیەكی فرەلایەنی حوكمڕانی بكرێت و هەموو حزبەكان بەشداری بكەن، بۆ ئەوەی زەمینەیەك بێتەئاراوە كە ئەو خەڵكە ئاوارەیە بۆ شوێنی خۆیان بگەڕێنەوە، ئاشكراشە هێزی ئەنەكەسە و لەشكری رۆژ، ئەو خەڵكانەن كە رۆژئاوایان بەجێهشتووە، بە گەڕانەوەی ئەو خەڵكەش كاریگەریی هێزە سیاسییەكانی دیكەش زیاتر دەبێت.
* لە هەڵبژاردنەكانی ساڵی 2015ی توركیا، هەلێكی زێرین بۆ هەدەپە هاتەپێشەوە و زیاتر لە 80 كورسی لە پەرلەمانی كوردستان بەدەستهێنا و بۆ یەكەمین جار بەربەستی 10% بۆ چوونە ناو پەرلەمانی توركیای بەزاند، بەڵام سیاسەتی هەڵەی پەكەكە وایكرد، كورد نەتوانێت سوود لەم هەلە وەربگرێت و رۆڵیكی گرنگ لە پرۆسەی سیاسیی توركیادا بگێڕن، ئایا بۆچی هێندە هەدەپە كەوتۆتە ژیر كاریگەریی سیاسەتە هەڵەكانی پەكەكە؟
- دوای ئەو سەركەوتنەی كە هەدەپە زیاتر لە 80 كورسیی پەرلەمانی توركیای بەدەست هێنا، دەیانتوانی لە پرۆسەی سیاسیی توركیا رۆڵێكی گەورە بگێرن و ببنە شەریك و هاوبەش لە حكومەتی توركیادا، بەڵام بەداخەوە پەكەكە بواری ئەمەی نەدا و شەڕی خەندەقی هەڵگیرساند كە بە هەموو مانایەك شەڕێكی بێ مانا بوو، لە ئاكامی ئەم شەڕە بە هەزاران لە ئەندامانی هەدەپە كەوتنە زیندانەوە و هەدەپەش كەوتە ناو دەستی چەپی توركیا، بەمەش وایلێهات گیانی كوردایەتی كە لەناو هەدەپە بوو، تەنیا ئەو ئەو كەسانە بوون كە ئێستا یان لە زیندانن، یان لەدەرەوەی هەدەپەن.
* وەك دواپرسیار بە بۆچوونی ئێوە بۆچی پەكەكە لە هەر شوێنێك كورد سەركەوتنێك بەدەست بهێنێت، هەوڵدەدات لە باری بەرێت؟
- ماوەیەكی زۆرە پەكەكە وەك كلاینت (وەكیل یان بەڵێندەر) كار بۆ دەوڵەتانی داگیركاری كوردستان دەكات، بۆیە ئەو دەوڵەتانە چی بخوازن بە پەكەكە جێبەجێی دەكەن و پەكەكەش بۆیان جێبەجێ دەكات. پەكەكە بۆ جێبەجێكردنی ئەم كارانە كوردایەتی كردۆتە پەردەیەك و لەژێر ئەو پەردەیەوە دژایەتی كورد و كوردستان دەكات، دیارە پەكەكە ماوەی 40 ساڵە ئایدیۆلۆژیەتێكی هاوشێوەی (ستالین و پۆل پۆت و سەدام) پیادەكات، لێرەدا جێگەی خۆیەتی ئاماژە بەوە بكەم كە ئێمە لە ساڵانی دوای 2000 سەردانی (مووسڵ)مان كردو لەگەڵ یەكێك لە ژەنڕاڵەكانی سوپای عێراق كۆبووینەوە، لەوێ پێمان وت: ئێوە بۆ لەگەڵ كوردی خۆتان رێكناكەون؟ ئەگەر رێكبكەون ئەمریكا ناتوانێت هێرش بكاتە سەر عێراق. لە وەڵامدا ژەنڕاڵەكەی سوپای عێراق پێی گوتین: ئەمریكا دەتوانێت تەنیا لە ئاسمانەوە بۆمببارانمان بكات و ناتوانێت لەسەر زەوییەوە هێرشمان بكاتە سەر، لەبەر ئەوەی ئەگەر هێرش بكات، تەنیا پێنج سەربازی ئەمریكی بەدیل بگرین و سەریان ببڕین و گۆشتەكەیان ببرژێنین، ئەوا ئەوانی دیكە هەموویان هەڵدێن و شەڕ ناكەن، دیارە سەدام بەو ئەقڵە سیاسەتی كرد، بۆیە سەرەنجام هەموو شتێكی لەدەستداو خۆی و كوڕەكانیشی كوژران، ئێستا پەكەكەش بە هەمان ئەقڵییەتی سەدام و بەعس سیاسەت دەكات، بە هیچ شێوەیەك بەرژەوەندیی كورد و كوردستانی مەبەست نییە، ئەوەی مەبەستێتی ئەوەیە كەس رەقیبی نەبێت. پەكەكە ئەمڕۆ پارتی بە رەقیبی خۆی دەزانێت و دەیەوێت كێشەی بۆ دروست بكات، سبەی لایەنێكی دیكە هەبێت كێشە بۆ ئەویش دروست دەكات، لەسەر ئەو بنەمایە سیاسەت دەكات، ئەگەر هەمووی بۆ خۆی نەبوو، دەبێت لەوانی دیكەش تێكی بدات.