ناوچە دابڕێنراوەكان بەگشتی و كەركووك بە تایبەتی لە بارودۆخێكی خراپدان، پێشتر ئەم ناوچانە كە لەلایەن هێزی پێشمەرگە و بە هاوبەشی بەڕێوەدەبران، تا راددەیەكی زۆر لە ئارامی و سەقامگیریدا بوون، بەڵام لەدوای كارەساتی 16ی ئۆكتۆبەرەوە بارودۆخەكە بۆ عەسكەرتارییەكی تەواو گۆڕا، ئەو دۆخەش رۆژ لە دوای رۆژ خراپتر دەبێت. خەڵكی ئەو ناوچانە چاوەڕێی ئەوەن لەگەڵ دەستپێكی كابینەی داهاتووی حكومەتی هەرێمی كوردستان، چارەسەركردنی ئەم كێشانە بە دانوستان لەگەڵ حكومەتی بەغدا دەست پێ بكات و هەوڵ بدرێت لە چوارچێوەی دەستووری عێراقدا ئەو كێشانە چارەسەر بكرێن و ئارامی و سەقامگیری بگەڕێتەوە بۆ ئەو ناوچانە، بۆ قسەكردن لەسەر ئەم پرسانە و پرسی پێكهێنانی كابینەی تازەی حكومەتی كوردستان ئەم دیدارەمان لەگەڵ د.نەجمەدین كەریم پارێزگاری شەرعیی كەركووك ئەنجامدا و بەمجۆرە وەڵامی پرسیارەكانی گوڵانی دایەوە.

پرسی ماددەی 140 و ناوچە كێشەلەسەرەكان ئەولەوییەتی كاری كابینەی داهاتووی حكومەتی هەرێمی كوردستان دەبێت




* وەك پارێزگاری شەرعیی كەركووك (هەتا ئێستاش)، چۆن سەیری كێشەی دانانی پارێزگاری كەركووك دەكەیت؟ ئایا ئەو وەرچەرخانە دراماتیكە تراژیدییەی بەسەر وەزعی كەركووكدا هاتووە، بە دانانی پارێزگارێكی كەركووك چارەسەر دەكرێت؟
- بێگومان لەوەتی دەوڵەتی عێراق دروست بووە و لەو كاتەوەی كە كەركووك لە ساڵی 1927ەوە كە نەوتی تێدا دۆزارەوەتەوە، هەوڵ دراوە كۆمەڵێك هۆزی عەرەب لە موسڵ و خوار حەمرینەوە بهێننە كەركووك و لەو شارە نیشتەجێیان بكەن، بەڵام وێڕای ئەم هەوڵانەش ئەگەر سەیری ئەو سەرژمێرییانە بكەین هەر لە بیستەكانەوە هەتا ئاماری ساڵی 1957 دەبینین، بەردەوام ژمارەی دانیشتووانی كورد لە كەركووك زۆرینە بووە، بەردەوامیش بەرپرسی شارەكە كە ئەوكات ئەنجومەنی شارەوانی و موتەسەریف هەبووە، كورد بوون، لەدوای شۆڕش، یان كودەتاكەی ساڵی 1958یشەوە بەردەوام حكومەتە یەك لە دوایەكانی عێراق هەوڵیان داوە ئەم راستییە دیموگرافییەی كەركووك بگۆڕن و بەردەوام هەوڵیانداوە ئەو شارە بە عەرەب بكەن و كوردی كەركووك دەربكەن، ئەم واقیعە هەتا ساڵی 2003 درێژەی كێشا، كە لەو ساڵەدا بارودۆخی كەركووك گۆڕانكارییەكی گەورەی بەسەردا هات و جارێكی دیكە كورد گەڕایەوە و خزمەتی هەموو پێكهاتەكانی كەركووك كرا. بارودۆخی كەركووك هەتا پێش كارەساتی 16ی ئۆكتۆبەر رۆژ لە دوای رۆژ لەگەشەكردندا بوو، ئاڵای كوردستان بە فەرمی لەلایەن ئەنجومەنی پارێزگاوە بڕیار درا لە هەموو شوێنێكی كەركووك هەڵبكرێت، لەسەر ناسنامەی نیشتمانی ناوی (تەئمیم) لابرا و ناوی كەركووك دانرایەوە، پرۆژەیەكی یەكجار زۆری بۆ كرابوو، پرۆژەكان كاریان تێدا دەكرا، جووڵەی كار و جووڵەی بازاڕ بە تەواوەتی بووژابووەوە، تەنانەت لە ساڵی 2014 كە تیرۆریستانی داعش پەیدابوون و بە ئاسانی (موسڵ و تكریت)یان داگیركرد، كەركووك لەلایەن هێزی پێشمەرگەی كوردستانەوە پارێزگاری لێكرا. لێرەدا گرنگە ئاماژە بەوەش بكەم كە پێش هاتنی داعشیش، حكومەتی عێراق بەنیاز بوو لەژێر ناوی فەرماندەیی هێزی دیجلە هێزەكانی عێراق بنێرێتەوە بۆ كەركووك، بەڵام ئەوە بوو بە فەرمانی فەرماندەی گشتی هێزی پێشمەرگە كاك مسعود بارزانی پێشمەرگە ئامادەباشی خۆی وەرگرت و توانرا كەركووك بپارێزرێت، بۆیە هەموو خەڵكی كەركووك ئەو راستییە دەزانێت كە هەتا پێش كارەساتی 16ی ئۆكتۆبەری 2017، بێجگە لە كورد، عەرەب و توركمانەكانی كەركووك لەلایەن هێزی پێشمەرگەوە پارێزراو بوون، هەروەها زیاتر لە 700 هەزار عەرەبی سوننە كە بەهۆی هاتنی داعشەوە لە كەركووك ئاوارە بوون، ئەوانیش لەلایەن هێزی پێشمەرگەی كوردستانەوە پارێزراو بوون و پارێزگارییان لێ دەكرا. ئەم هەوڵانە هەمووی بۆ ئەوە بوون ناسنامەی كوردستانییەتی كەركووك بچەسپێندرێت، بەڵام بەداخەوە لە 16ی ئۆكتۆبەر خیانەت كرا و كەركووك رادەستی هێزی بیانی و هێزەكانی عێراق كرایەوە، كەركووك بێ دەسەڵات مایەوە، پارێزگارێك بەوەكالەت دانراوە، بۆیە ئێستا لایەنێك دەیەوێت هەموو كێشەی كەركووك بە دانانی پارێزگارێك لەو شارە چارەسەر بكەن. بە راستی ئەوانە دەیانەوێت كارەساتی 16ی ئۆكتۆبەر بشارنەوە، ئەوان خۆیان زۆر باش دەزانن كێشەی كەركووك بە دانانی پارێزگارێك چارەسەر نابێت، بەتایبەتی ئەو لایەنەی ئەمڕۆ سوورە لەسەر ئەوەی پارێزگارێكی كورد و یەكێتی دابنرێت، باشە خۆ پێشتر پارێزگاری كەركووك كورد و یەكێتیش بوو، یەكێتی لە كەركووك باڵا دەست بوو، ئەوان خۆیان كەركووكیان رادەست كردەوە و بوونە هۆكاری ئەو گۆڕانكارییە خراپەی ئەمڕۆ لەو شارەدا هەیە، خۆ ئەگەر دەشڵێن ئێمە لە كەركووك ماوینەتەوە و خەڵكی دیكە لەوێ نەماون، بەڵێ راستە، ئێوە تەسلیم بوون و بوون بە جاش بۆ ئەوان، بۆیە ئەوانیش هیچ مانعیان نییە ئێوە لەوێ بمێننەوە، كاتی خۆیشی لەسەردەمی سەدام حوسێن هەندێك حزبی كارتۆنی هەبوون وەك (پارتی دیموكراتی كوردستان و پارتی شۆڕشگێڕی كوردستان)، ئەوانیش مەجلیسی تەنفیزی و تەشریعییان هەبوو، بۆیە ئێوەش وەك ئەوانتان لێهاتووە. ئێوە خۆتان رۆژانە ئەو واقیعە تاڵەی كەركووك دەبینن و باش دەزانن كە ئەنجومەنی پارێزگای كەركووك بە بڕیار ئاڵای كوردستانی هەڵكردووە و تەنانەت دادگای فیدڕاڵیی عێراقیش دژی هەڵكردنی ئەو ئاڵایە بڕیاری نەداوە، بەڵام ئێستا بێجگە لەوەی لەسەر ئاڵای بارەگاكەی خۆتان ئاڵایەكتان هەڵكردووە، بەڵام لە هیچ شوێنێكی كەركووك ئاڵای كوردستان نابیندرێت، تەنانەت پەیكەری ئەو پێشمەرگەی ئاڵای كوردستانی بەدەستەوە بوو، ئێستا ئەو ئاڵایە داگیراوە و ئاڵای عێراقی بەدەستەوەیە.
* لەم قسانەتان ئەوە دەخوێندرێتەوە كە كێشەی كەركووك بە دانانی پارێزگارێكی كورد چارەسەر نابێت، ئەی كەواتە كێشەی كەركووك چۆن چارەسەر دەبێت؟
- هەتا باری ئاسایش و كارگێڕیی كەركووك چارەسەر نەكرێت و حكومەتی بەغدا دەست بە جێبەجێكردنی ماددەی 140 نەكات و ئەو هێزە سەربازییانەی هاتوونەتە ناو شار نەبرێنە دەرەوەی شار و پۆلیسی خۆجێی لە هەموو پێكهاتەكان (بە كورد و عەرەب و توركمان و كریستیانەكانەوە) هەر یەكەیان بەپێی قەوارەی خۆیان، جێگەی ئەو هێزانەی ئێستا نەگرنەوە، بە راستی بارودۆخی كەركووك ئاسایی نابێتەوە.، بۆیە گرنگە سەرەتا ئەم هەنگاوانە هەڵبگیرێن، ئەوجا دوای ئەمانە دەكرێت پارێزگارێك بۆ كەركووك دابنرێت كە دەسەڵاتی هەبێت و هەر خۆیشی دەبێتە سەرۆكی لیژنەی ئەمنیی شارەكە، بەڵام ئێستا پارێزگار هیچ رۆڵێكی لە لیژنەی ئەمنیدا نییە، بۆیە ئەگەر تۆ تەنیا هەموو ئامانجت ئەوە بێت پارێزگارێك دابنێیت، ئەوا لەسەردەمی سەدامیشدا پارێزگارەكانی سلێمانی و هەولێر و دهۆك كورد بوون، بەڵام چ مانایەكیان هەبوو؟
* پێش ئەوەشی بگەڕێیتەوە بۆ كوردستان و هەڵبژێردرێی بۆ پارێزگاری كەركووك، لە ئەمریكا زۆر سەرقاڵی دروستكردنی لۆبی بوویت بۆ ئەوەی ببنە هاوكاری كورد و ماددەی 140ی دەستووری عێراق جێبەجێ بكرێت، ئەوكات بارودۆخەكە جۆرێكیتر بوو، هەم هێزی پێشمەرگە بوونی هەبوو، هەمیش كورد سەنگێكی دیكەی لە ناوچە كێشە لەسەرەكان هەبوو، ئایا وەك كەسێكی شارەزا و بەئەزموون، چۆن سەیری بارودۆخی خراپی تەواوی ناوچە كێشەلەسەرەكان دەكەیت؟ ئایا لەم بارودۆخەدا دەبێت نەخشەڕێگەی پراكتیكی حكومەتی هەرێمی كوردستان بۆ جێبەجێكردنی ماددەی 140 چۆن بێت؟
- ئێمە لە دوای ساڵی 2007 كۆنفڕانسێكمان لە ئەمریكا كرد، بۆ ئەم كۆنفڕانسە بەڕێز د.كەمال كەركووكی بانگهێشت كرابوو كە ئەوكات سەرۆكی پەرلەمان بوو، یان جێگری سەرۆكی پەرلەمانی كوردستان بوو. لەو كۆنفڕانسەدا د.كەمال وتارێكی پێشكەش كرد، هەروەها بۆ كۆنفراسەكە كۆمەڵێك پارێزەری شارەزا لەسەر ئاستی جیهان كە تایبەتمەندبوون لەسەر ئەم جۆرە پرسانەی دەوڵەتی فیدڕاڵی و ناوچەی كێشە لەسەر، ئەوانیش بانگهێشت كرابوون، چەندین سیناتۆر و كۆنگریسمانیشمان بانگهێشت كردبوو، ئەوانیش لەو كۆنفڕانسەدا قسەیان كرد، ئەوەی ئێمە زۆر بەلامانەوە گرنگ بوو، ئەوە بوو دەستووری عێراق بە تەواوەتی جێبەجێ بكرێت، لەبەر ئەوەی ئێمە قەناعەتمان بەو جۆرە بووە كە كێشەی كەركووك بە هێز چارەسەر ناكرێت لە هیچ لایەكەوە، هەر بۆ نموونە رژێمی بەعس و رژێمەكانی پێش خۆیشی زۆر هەڵیاندا كەركووك بكەن بە عەرەب و كوردی تیا نەهێڵن، بە دڕندەترین شێوە ئەنفال و ژینۆسایدیان كردین، بەڵام سەرنەكەوتن، بەهەمان شێوە بۆ ئێمەی كوردیش هەر بەو جۆرەیە و كورد ناتوانێت بە زەبری هێز پێكهاتەكانی دێكەی كەركووك بێبەش بكات و بیانكاتە دوژمنی خەڵكی كوردستان، بۆیە راشكاوانە رامانگەیاند، گرنگە ئەمریكا پشتیوانی دەوڵەتی عێراق بكات بۆ جێبەجێكردنی ماددەی 140ی دەستووری عێراق.
* ئەی لە ئێستادا میكانیزمی پراكتیكی بۆ چارەسەری كێشەی كەركووك لە چیدا دەبینن؟
- پرسی ناوچە كێشە لەسەرەكان تەنیا كێشەی كەركووك نییە، ئێستا (دوز) بارودۆخی زۆر لە كەركووك خراپترە، خانەقین بەو جۆرە نییە كە دڵمان پێی خۆش بێت، شنگال لەوانیش خراپترە، بۆیە دەبێت ئێمە جەخت لەسەر جێبەجێكردنی دەستوور و ماددەی 140 بكەینەوە، هەروەها دەبێت جەخت لەسەر ئەوە بكەینەوەكە ئەو ناوچانە لەلایەن پێكهاتەكانی خۆیەوە بەڕێوەببرێت، بۆیە پێداگرتن لەسەر جێبەجێكردنی دەستوور دەبێت لە پێش هەموو شتێكی دیكەوە بێت.
* ئاشكرایە هەرێمی كوردستان لەدوای ئۆكتۆبەری 2017 لە بارودۆخێكی نائاساییدایە، لەگەڵ ئەوەی لە ساڵی 2018-2019 بۆ پێكهێنانی كابینەی تازەی حكومەتی عێراق (كابینەكەی د.عادل عەبدولمەهدی) جۆرە رێككەوتنێك لەنێوان هەرێمی كوردستان و لایەنە شیعەكان بەتایبەتی (هاوپەیمانیەتی بنا) دروست بووە، بەڵام دیسان بەهۆی هەڵبژاردنەكانی كوردستان و بوونی حكومەتی هەرێم بە حكوومەتی كاربەڕێكەر، نەتوانراوە میكانیزمێكی سەقامگیر بۆ چارەسەركردنی كێشەكانی نێوان هەولێر و بەغدا دابنرێت و خەڵك هەمووی چاوەڕێی ئەوەیە كە كابینەی نۆیەمی حكومەتی هەرێمی كوردستان دەست بەكار بێت، پرسیار لێرەدا ئەوەیە ئایا پێكهێنانی كابینەی نۆیەمی حكومەتی هەرێمی كوردستان چ كاریگەرییەكی لەسەر پەیوەندییەكانی نێوان هەرێم و بەغدا دەبێت؟
- پێكهێنانی كابینەی تازەی حكومەتی هەرێمی كوردستان بۆ پرسی چارەسەركردنی كێشەكانی نێوان هەرێم و بەغدا زۆر گرنگە. لێرەدا ئەم دیدرارە بە فرسەت دەزانم كە داوای سەركەوتن بۆ برای بەڕێز كاك مسرور بارزانی بكەم. بێگومان سەرۆكی هەرێمی كوردستان و حكومەتی هەرێمی كوردستان رۆڵێكی دیار و كاریگەریان لەسەر چارەنووسی ناوچە كێشە لەسەرەكان دەبێت، هەروەها رۆڵێكی كاریگەریان دەبێت لەسەر پەیوەندیەكانی نێوان هەرێم و بەغدا، ئەمەش لەبەر ئەوەیە دەبێت ئەم پرسانە لە چوارچێوەی دەسەڵاتی حزب بێنە دەرەوە و بكەوێتە دەستی حكومەت كە نوێنەری هەموو حزبەكانی تێدایە و هیچ پێویست نییە حزبێكی سیاسی بڕوات لە پشت حكومەتەوە كارێك بكات كە لە بنەڕەتدا ئەوە كاری حكومەتە و كاری حزبی سیاسی نییە. هەر بۆیە پێكهێنانی حكومەت كە پشتیوان بە خوا زۆری نەماوە، زۆر گرنگە، لێرەدا گرنگە ئاماژە بە رۆڵی كاك نێچیرڤان بارزانی بكرێت كە ئەوكات سەرۆك وەزیرانی كوردستان بوو، هەر لەدوای كارەساتی 16ی ئۆكتۆبەرەوە هەوڵی داوە پەیوەندییەكانی نێوان هەرێم و بەغدا رێكبخاتەوە، ئێستاش كە سەرۆكی هەرێمی كوردستانە هەر بەردەوامە، بۆیە من دڵنیام كاك مسرور بارزانی-یش بە هەمان شێوە هەنگاو هەڵدەگرێت، پرسی رێكخستنەوەی پەیوەندییەكانی نێوان هەرێم و بەغدا كێشەی ناوچە كێشە لەسەرەكان لە ئەولەوییەتی بەرنامەی كاری دەبێت، گرنگە حكومەتی ئێمە بە هێزەوە بچێت بۆ بەغدا، بۆ ئەوەی بتوانێت ئەو كێشانە چارەسەر بكات بە كێشەی ناوچە كێشە لەسەرەكانیشەوە كە ئەمڕۆ ئەو ناوچانانە لە بارودۆخێكی زۆر خراپدان.
* ئێوە ئەزموونی كاركردنتان لەگەڵ حكومەتی هەرێمی كوردستان هەیە، بەتایبەتی دوای ئەوەی وەك پارێزگای كەركووك رێككەوتنتان ئیمزا كرد بۆ هەناردەكردنی نەوتی كەركووك بە رێگەی بۆرییە نەوتەكانی كوردستان و پشكی پترۆدۆلار بۆ كەركووك، پێشبینیتان بۆ چوار ساڵی داهاتووی هەرێمی كوردستان چییە؟ ئایا تا چەند سەرۆكایەتیی هەرێم و كابینەی داهاتوو كاریگەرییان دەبێت بۆ رێكخستنەوەی ماڵە شێواوەكەی هەرێمی كوردستان و بەهێزكردنی پەیوەندییەكانی هەرێم لەگەڵ بەغدا و دەوربەر و وڵاتانی جیهاندا؟
- ئەو كاتەی ئێمە وەك پارێزگای كەركووك ئەو رێككەوتنەمان لەگەڵ حكومەتی هەرێمی كوردستان ئیمزا كرد، كاك نێچیرڤان بارزانی سەرۆكی ئەنجومەنی وەزیران بوو، جەنابی كاك مسعود بارزانی سەرۆكی هەرێمی كوردستان بوو، بۆیە هەمووان پشتیوان بوون بۆ ئەو رێككەوتنەی كە لەنێوان كەركووك و هەرێم ئێمزا كرا، ئەم رێككەوتنەش بووە هۆكاری ئەوەی بەشێكی زۆری پرۆژەكانی كەركووك بكەونە كار، ئەمە لە كاتێكدا كۆی پرۆژەكان لە سەرانسەری راوەستابوون، خەڵكی كەركووك شاهیدن بۆ ئەو پرۆژانەی كە بەردەوامییان پێ دراو رانەگیران. سەبارەت بە كاك نێچیرڤان بارزانی و رۆڵی لە چوار ساڵی داهاتوودا وەك سەرۆكی هەرێمی كوردستان، من دڵنیام بە هەمان جۆش و خرۆشەوە كار بۆ پێشخستنی كوردستان لە هەموو روویەكەوە دەكات، هەروەها پشتیوانییەكی زۆر بەهێز دەبێت بۆ سەركەوتنی كابینەكەی كاك مسرور بارزانی، من گومانم لەوە نییە كە ئەوان پێكەوە وەك یەك تیم و بەناوی خەڵك و حكومەتی هەرێمی كوردستانەوە كارەكانیان دەكەن، بۆیە دەبێت هەموو كوردێك و هاووڵاتییەكی ئەم نیشتمانە بە هاووڵاتیانی ناوچە كێشەلەسەرەكانیشەوە پشتیوانیان لێ بكەین بۆ سەرخستنی ئەو بەرنامەیەی كە هەیانە و ئامانج لێی خزمەتی وڵاتەكەمانە.

* لەگەڵ ئەوەی لە سەر ئاستی ناوخۆی كوردستان ئەو یەكڕیزییە پێویستە نییە كە خەڵكی ئومێدی بۆ دەخوازێت، بەڵام حكومەتی هەرێمی كوردستان توانیویەتی تا راددەیەك خزمەتگوزاری پێشكەش بكات، ئایا تاچەند نەبوونی یەكڕیزیی پێویست دەبێتە ئاستەنگ بۆ رێكخستنەوەی پەیوەندییەكانی نێوان هەرێم و بەغدا؟
- پێشتریش من ئاماژەم پێكرد، دەبێت حكومەتی هەرێمی كوردستان بۆ رێكخستنەوەی پەیوەندییەكان و چارەسەركردنی كێشەكان لەگەڵ بەغدا نوێنەرایەتی كوردستان بكات و نوینەری هەموو حزبەكانیش بەشدارن، ئەوجا ئەگەر لە روویەكی دیكەوە سەیر بكەین و بە ویژدانەوە سەیری بارودۆخەكە بكەین و هەرێمی كوردستان بە عێراق بەرارود بكەین، ئەوا وێڕای ئەو كەموكووڕییانەشی كە هەمانە، لەگەڵ ئەو بارودۆخەی بە هۆی بڕینی بودجە و پاشانیش دوای 16ی ئۆكتۆبەر ئەو گەمارۆیانەی خرانە سەر كوردستان، ئەوا كوردستان لەگەڵ هەر بەشێكی عێراق بەراورد بكەیت، ئەوا هەرێمی كوردستان زۆر پێشكەوتووترە، هەر سەیری بارودۆخی شارەكانی هەولێر و دهۆك و سلێمانی بكەین، دەزانین بە راستی لە رووی پاك و تەمیزی و پێشكەوتن و دابینكردنی خزمەتگوزارییەوە لە عێراق ناچێت. بۆیە زۆر گرنگە ئێمە هەوڵ بدەین زیاتر خزمەتگوزاری پێشكەش بكەین و جیاوازییەكە لەم رووەوە فروانتر بكەین، بۆ ئەوەی خەڵكانی دیكەی عێراق بیبینن و ئەوانیش داوا لە حكومەتی فیدڕاڵی و حكومەتە خۆجێیەكانی پارێزگاكانیان بكەن، وەك كوردستان خزمەتگوزارییان بۆ دابین بكەن. سەبارەت بە كێشەكانیشمان لەگەڵ بەغدا كە بە راستی هەندێ كێشەیان زۆر سەرەكین، وەك كێشەی ناوچە كێشە لەسەرەكان و جێبەجێكردنی ماددەی 140، پرسی یاسای نەوت و گاز، مووچەی پێشمەرگە، ئەمانە دەبێت زۆر بە راشكاوی گفتوگۆیان لەسەر بكەین و چارەسەریان بۆ بدۆزینەوە.
* پێش ئەوەی بگەڕێیتەوە بۆ كوردستان و ببیتە پارێزگاری هەولێر، ئاگادارین لە ئەمریكا كارێكی زۆر باشتان بۆ دۆزی كوردستان دەكرد، بەڵام ئێستا هەست دەكەین بڕیارت داوە لە كوردستان بمێنیتەوە، ئایا بەنیازن هەر لە كوردستان بمێننەوە و خزمەت بكەن؟

- ئێمە لەسەر هەر دوو ئاستی دەرەوە و ناوخۆ پێویستمان بە كاری جددی هەیە، بۆ ئەوەی خزمەتی دۆزەكەمان بكەین. من ساڵانێكی زۆر كارم كردووە، بەڵام چوارچێوەی كارا، كەم بۆ هەر چوار پارچەی كوردستان بووە، هەر بۆ ئەم مەبەستەش كۆنگرەی نەتەوەیی كوردمان لە باكووری ئەمریكا دامەزراند و ماوەی زیاتر لە هەشت ساڵیش من سەرۆكی ئەو كۆنگرەیە بووم، لەمەش زیاتر یەكەمین پەیوەندیی ئاشكرای نێوان كورد و ئەمریكا لە مانگی نیسانی 1991 بە رێگەی من بووە و لەسەر داوای ئێمە شاندی بەرەی كوردستانی سەردانی وەزارەتی دەرەوەی ئەمریكایان كرد و تەنانەت ناوی ئەندامانی شاندەكەش من پێشكەشی وەزارەتی دەرەوەی ئەمریكام كرد. بەڵام وەك كوردستانییەك كە لە شاری كەركووك لەدایك بووم، هەموو كاتێك ئەو ئاواتەم هەبووە رۆژێك بگەڕێمەوە كوردستان و خزمەتی نیشتمانەكەم بكەم، یان بگەڕێمەوە بۆ كەركووك و خزمەتی شارەكەم بكەم، لەگەڵ هەموو ئەمانەشدا من ئێستاش كارەكانم لە دەرەوەی كوردستان هەر بەردەوامە و ئەنیستیوتی كورد كە لە ساڵی 1996 خۆم دامەزرێنەر و سەرۆكی بووم، بەردەوامە و كار بۆ هەر چوار پارچەی كوردستان دەكات. لێرەدا گرنگە ئەوە بۆ خوێنەرانتان روون بكەمەوە، من دوای خیانەتی 16ی ئۆكتۆبەر زۆر بە ئاسانی دەمتوانی بگەڕێمەوە بۆ ئەمریكا و بەبێ سەرئێشە لەوێ دەست بەكارەكانی خۆم بكەمەوە، بێگومان كارەكانم لەوێ هەر بەردەوام دەبێت، بەڵام لای من زۆر قورسە كە خەڵكی كەركووك لەم نەهامەتییەدا بن و خەڵكی دوز دەردەكرێن و خانووەكانیان دەسووتێندرێت و لە خانەقین كورد شكۆی شكاوە و لە شنگال هەوڵی گۆڕینی دیمۆگرافییەكەی دەدرێت، من تا نزیكتر بم لە كەركووك وەك نموونەیەك بۆ هەموو ناوچە كێشەلەسەرەكان كە غەدریان لێكراوە، زیاتر ئاسوودە دەبم، هەروەها دەخوازم ئەوە بڵێم، ئێمە هەموو كات بە ئومێدەوە سەیری ئایندە دەكەین و پێمان وایە ئەگەر رەفتارەكانی رژێمی بەعس لە ئەنفال و بەعەرەبكردن خەڵكی كەركووكی نائومێد نەكردبێت، ئەوا ئەم كارەساتەی ئێستاش نائومێدیان ناكات و بارودۆخەكە گۆڕانكاری بەسەردا دێت.
* بڕیارە لە ساڵی داهاتوو هەڵبژاردنی پارێزگاكانی عێراق ئەنجام بدرێت بە كەركووكیشەوە، ئایا نەجمەدین كەریم بەشداریی ئەو هەڵبژاردنە دەكات؟
- بێگومان، ئێمە لیستێكمان دەبێت بەناوی (لیستی سەربەخۆی كەركووك) بۆ هەڵبژاردنی داهاتووی ئەنجومەنی پارێزگای كەركووك، ئەم لیستە نوێنەری هەموو پێكهاتەكان و لایەنە سیاسییەكانی تێدا دەبێت و خۆیشم تێیدا بەشدار دەبم.