ئایینی پیرۆزی ئیسلام یەكێكە لە سیما جوانەكانی كوردستان و گەلەكەی كە بەشی زۆریان موسڵمانن، هەروەها ئەم ئایینە پیرۆزە بەدرێژایی سەدان ساڵ جیاواز لە ناوچەكانی دیكەی جیهان هەوێنی خۆشەویستی و پێكەوە ژیانی نێوان پێكهاتە جیاوازەكانی گەلی كوردستان و هەوێنی فرەیی ئایینی بووە لەكوردستان، بۆ قسەكردن لەسەر بایەخی ئەم ئایینە پیرۆزە و بەدیارخستنی ئەو هەوڵانەی كە هەندێك حزبی سیاسیی ئیسلامی ، دەیانەوێت ئەم سیما جوانە بشێوێنن، چەند پرسیارێكمان ئاراستەی بەڕێز د.محەمەد شاكر پسپۆر لەبواری زانستی ئیسلامی كرد، كە ئەمە دەقی وەڵامەكانیەتی:

حزبە ئیسلامیەكان وا تەماشای سیاسەت دەكەن كە یەكێكە لە بنەما نەگۆڕاوەكانی ئایین
• هەموو ئایینەكان باس لە ئاشتی و لێبوردەیی دەكەن، بەڵام كاتێك هەر یەك لەم ئایینانە دەكرێنە بەرنامەی سیاسیی، دەبێتە سەرچاوەی توندوتیژی، پرسیار لێرەدا ئەوەیە بۆچی كاتێك بە ئایین سیاسەت دەكرێت لێبوردەیی دەگۆڕێت بۆ توندوتیژی؟
- پێوەندی ئایین بەسیاسەت بابەتێكی ئاڵۆزە و بۆچوونی جیاجیا لەمبارەیەوە هەیە، دەتوانین بڵێین بەشێوەیەكی گشتی ئایینی ئیسلام هێڵی پانی بۆ سیاسەت داناوە، بەڵام ئەگەر تەماشای قورئانی پیرۆز و فەرموودەكانی پێغەمبەر (د. خ) بكەین، دەبینین وردەكارییەكانی سیاسەت و تەفاسیلەكەی بۆ خەڵك بەجێ هێڵدراون، خەڵك بەپێی كات و سات تەماشای بارودۆخی خۆی دەكات و تەماشای هاوكێشەی نێودەوڵەتییەكان دەكات، لەم روانگەیەوە چارەسەر و یاسایەك هەڵدەبژێرێت كە گونجاو بێت لەگەڵ سەردەمەكە، بەمەرجێك لەگەڵ ئەو هێڵە پانانەی كە ئیسلام دایناوە پێچەوانە نەبێتەوە، هەربۆیە پێموایە ئیسلام سیاسەتی تێدایە، بەڵام ئەو سیاسەتە تەنیا پرەنسیپی گشتییە كە تێیدا هەندێك بیروباوەڕی ئەخلاقی داناوە لەوانە كە لە قورئانی پیرۆز دەبینین (دادپەروەری- (واذا حكمتم بین الناس ان تحكموا بالعدل) یا (وامرهم شوری بینهم)- راوێژكاری بەخەڵك بۆ حوكم كردن كە ئێستا دەتوانین بڵێین هەڵبژاردن یەكێكە لە جێبەجێكردنی بنەماكانی شورا) هەروەها گوێرایەڵی وەلی ئەمر- (اطیعوا الله و اطیعوا رسول وأولي الأمر منكم) هەروەها رەچاوكردنی بەرژەوەندی خەڵك (عەدل و ئیحسان) ئەمانە بنەمای گشتی سیاسەتن لە ئیسلام، بەڵام وردەكاریی سیاسەت و تەفاسیلی سیاسەت وەكو هەندێك لە حزبە ئیسلامیەكان وا بۆی دەچن كە ئایینی ئیسلام هەموو وردەكارییەكانی سیاسەتی دیاریكردووە و لەسەر ئەو بنەمایەش ناوی خۆیان دەنێن بە حزبی ئیسلامی ( ئیسلامی سیاسی) ئەمە دوورە لە راستی.
گرفتەكە لێرەدا ئەوەیە ئەو حزبە ئیسلامیانە وا تەماشای سیاسەت دەكەن كە یەكێكە لە بنەما نەگۆڕاوەكانی ئایین، ئێمە لە ئایین بنەمای نەگۆڕاومان هەیە و ئەركانی ئیمانمان هەیە كە موسڵمانی ئاسایی دەزانێت ئەركانی ئیسلام چییە و ئەركانی ئیمان چییە، بەڵام ئەركانی ئیسلام و ئیمان، نە لەدوور نە لە نزیك باسی سیاسەتی نەكردووە، هەربۆیە دەكرێت مرۆڤێك دوور لە جیهانی سیاسەت مرۆڤێكی ئیماندار بێت و موسڵمانێكی باوەڕپێكراو بێت، لەسەرەتاشەوە ئایینی ئیسلامیش هەر وای وتووە، بەڵام بەبۆچوونی حزبە سیاسییە ئیسلامییەكان، مرۆڤ گەر بەشداری لە ژیانی سیاسەت نەكات، ئەوا ئیمانەكەی تەواو نییە، ئەمە شتێكە نەلە قورئانی پیرۆز وادەڵێت نەلە فەرموودەكانی پێغەمبەر (د.خ) وا دەڵێت. بۆیە دەبینین ئەوانەی بە ئایین سیاسەت دەكەن بەتەواوەتی لە ئایینەكە تێنەگەیشتوون.
وەكو هەموومان دەزانین سیاسەت واتا فرەیی هەر حزبێك داخڵ بە پرۆسەی سیاسی بێت، پێویستە بڕوای بە فرەیی و دیالۆگ و دەستاودەست كردنی دەسەڵات هەبێت، بەڵام حزبە ئیسلامیەكان چونكە دروستبوونیان وەك بیروباوەڕێكی جێگیرو نەگۆڕە، ئەوان ئەوەی خۆیان پێ راست و واجبە بەپێچەوانەوە هی خەڵكی تریان پێ هەڵەیەو حەرامە، یان فیكری سیاسیی بكەیتە ئەوەی، ئەوەی لەگەڵت بێ ئەوە لەگەڵ ئایینە و ئەوەی لە دژت بێ دژی ئایینە، یان ئەوەی لەگەڵت نەبێت بە كافری لە قەڵەم بدەیت، ئاشكراشە گەر ئەمجۆرە بیروبۆچوونە هەڵەیە لە كۆمەڵگە بوونی هەبێت، بەتەئكید لە ئەنجامی ئەو بۆچوونانە تەكفیر و كوشتن و توندوتیژی دەكەوێتەوە، هەروەكو چۆن ئەو حزبانەی حوكمڕانییان كردووە روویان لە تەكفیر و كوشتن كردووە، كێشەكە لێرەدا لە بنەڕەتدا كێشەیەكی فیكرییەو توندڕەویی و توندوتیژی لێدەكەوێتەوە.

زۆربەی حزبە ئیسلامیەكان
پسپۆرایەتی وردیان لە شەریعەتی ئیسلام نییە، بۆیە ئیسلام ناشرین دەكەن
• وەك سەلماندنێك بەوەی هیچ ئایینێك پێوەندی بە توندتیژیەوە نییە، بێگومان ئاگادارن هەتا لە ئەوروپا دەسەڵات بەدەست كەنیسەوە بوو، خەڵك لە ئایینی مەسیحی بێزار بوو، بەڵام كاتێك مەسیحیەت لە دەسەڵات جیاكرایەوە، دەبینین ئایینی مەسیحی جارێكی دیكە لای خەڵك رێزی لێگیرایەوە، ئایا بۆچی دەسەڵات و سیاسەت دەبێتە هۆكاری ناشرین كردنی ئایین لای خەڵكی؟
- ئایینی ئیسلام بەرییە لەو حزبە ئیسلامیە توندڕەوانە و ئیسلام بەوانە ناشرین نابێت، كاتێك ئیسلام بۆ مەبەست و مەرامی سیاسی بەكار دەهێنرێت زیان لە ئایینی ئیسلام دەگەیەنێت، چونكە ئایینی ئیسلام لەگەڵ ئەو بیروباوەڕە توندڕەوە نییە، نابێت ئایینی ئیسلام ئیستغلال بكرێت، كاتی خۆی لەسەردەمی دەسەڵاتی مەسیحییەكان كۆمەڵگای ئەوروپی بێزار بوون و تەنانەت بوو بوونە كۆمەڵگەیەكی دواكەوتوو، بەڵام كە سەردەمی رۆشنگەری دەستی پێكرد، خەڵكی رووناكبیر لەدژی دەسەڵاتی كەنیسە راوەستانەوە، دەركەوت ئەو كەسانەی بەناوی ئایینی مەسیحییەوە دەسەڵاتی كەنیسەیان بەكاردەهێنا نوێنەری ئایینی مەسیحیان نەدەكرد، كاتێك ئایین جیاكرایەوە لە سیاسەت، ئەوا ئایین بەرێڕەوی خۆیدا دەڕوات و سیاسەتیش بە ڕێڕەوی خۆی دەڕوات، خوای گەورە سیستەمێكی دیاریكراوی كامڵی دانەناوە بۆ سیاسەت، ئێستا كە تەماشای مەسائیلی خواپەرستی بكەیت بەتەفاسیلی وردەوە، موسڵمان دەزانێت چۆن نوێژو عیبادەت دەكات، لە قورئانی پیرۆزدا كە شەش هەزار ئایەتە، تەنیا 100 ئایەتمان هەیە كە باس لە یاساكانی میرات و باری كەسێتی و یاساكانی مەدەنی و تاد. دەكات، دنیای سیاسەت زۆر فراوانەو بە 100 ئایەت چارەسەر ناكرێت و كەلێنی دەستووری زۆر گەورە بەجێ دەمێنێت. هەروەها هیچ حزبێك نایەتە گۆڕەپانی سیاسەت و بڵێت من بیروباوەڕو پەیامم زوڵم و ستەمە، واتا ئەو بیروباوەڕ و بنەما سەرەكیانەی سیاسەت كە قورئان باسی كردووە، هەموو حزبە سیاسییەكان لەسەری كۆكن، بەڵام كاتێك ئایین تێكەڵ بەسیاسەت دەكرێت و ئایین وەكو خۆی پیادە ناكەن لەبەر هەندێك مەرامی سیاسی ئیجتیهاداتی شەخسی تێكەڵ دەكەن هەر بۆیە ئایین ناشرین دەكەن، بۆ نموونە دەربارەی بابەتی جیهاد كە ئەمە شتێكە لە ناشرینكردنی ئایین، واتا ئەگەر دەقەكانی قورئانی پیرۆز وەكو خۆی بخوێنیتەوە كەباس لە جیهاد دەكات بۆ حاڵەتێكە بەرگری لەخۆت بكەی(وقاتلوا في سبیل اللە الذین یقاتلونكم)، حزبە سیاسییەكان هەڵساون هەموو دەقەكان بەپچڕاوی باس دەكەن وەكو(وقاتلوا في سبیل اللە ...) كە دەقە پیرۆزەكە تەواو ناكەن و مەرامیان لەمەدا هەیە بەهەڵە بۆخەڵكی باس دەكەن و وردەكاری و گشتییەكانی دەقەكانی قورئانی پیرۆز بۆ یەك ناگەڕێننەوە، هۆكارەكەشی بۆ ئەوە دەگەڕێتەوە كە زۆربەی حزبە ئیسلامیەكان پسپۆرایەتی وردیان لە شەریعەتی ئیسلام نییە، بۆیە ئیسلام ناشرین دەكەن. واتا شارەزایی تەواویان لەسەر ئایین نییە كەچی خۆیان بە نوێنەرایەتی ئایین دەزانن و بەناوی ئایینەوە قسە دەكەن. ئەگەر تەماشای ئەیمن زەواهری بكەین پزیشكی نەشتەرگەرییە و ئوسامە بن لادن بكەین دەبینین كەسێكە كارگێڕی بیزنسی تەواو كردووە، هەروەها عەبدولسەلام فەرەج زەعیمی كۆمەڵی ئیسلامی لەمیسر، ئەندازیاری كارەباییە، ئەحمەد شوكری موستەفا سەركردەی كۆمەڵی تەكفیر و هیجرە دەرچووی كۆلێژی كشتوكاڵە، ئەمانە كە بەناوی ئایین قسە دەكەن و لە دەقەكانی قورئانی پیرۆز و ئایین بەتەواوەتی تێناگەن و شارەزا نیین، وادەكەن مەسەلەكان دەشێوێنن و لەدەرئەنجامدا سورەتەكانی ئایین لەلایەن خەڵكەوە دەشێوێنن.
رەنگە ئەو لایەنگر و ئەندامانەی حزبە ئیسلامیە سیاسییەكان موسڵمانی دروست و بەبڕوا بن، بەڵام بۆی هەیە لەمەرامی ئەو حزبانە نەگەن و لەحەقیقەتی ئایینیش نەزانن
• لەدوای سەرهەڵدانی رێكخراوی ئەلقاعیدە و بزووتنەوەی تاڵیبان، تیرۆر بووە روویەكی ئایینی ئیسلام، ئەمە لەكاتێكدا ئیسلام دژی تیرۆرە، ئایا ئەو هۆكارانە چین كە رێكخراوە تیرۆریستیەكان ئایینی پێ ناشرین دەكەن؟
- ئەو رێكخراوە تیرۆريستیانەی كە بەناوی ئایینی ئیسلامەوە سیاسەت دەكەن، لەسەر بنەمایەكی هەڵە دامەزراون، ئایین نابێت تێكەڵ بەسیاسەت بكرێت، بەسیاسەتكردنی ئایین شتێكی هەڵەیە، واتا گەر بتەوێت پۆستی سیاسەت بەدەستبهێنیت یا بكەیتە قۆناغێكی دیاریكراو لە سیاسەت لەژێر چەتری ئایین یا بەناوی ئایین ئەمە شتێكی هەڵەیە، تەنانەت خۆیانیش ناشرین دەكەن.
تۆ سەیری رێكخراوی قاعیدە بكە كە ناویان دەهێنرێت لە دنیاو لەلای خەڵك واتای تیرۆر و كوشتن و سەربڕین دەگەیەنێت، هەیە وەكو خۆی لە راستییەكان تێناگات، هەشە بۆ نموونە وەكو سەرانی حزبە ئیسلامیەكان لەحەقیقەتی ئایین تێگەیشتوون و دەزانن، بەڵام بۆ مەرامی خۆیان وەكو ئامانجی سیاسی بەكاری دەهێنن، بەڵام ئایین بەریئە لەبیروبۆچوونەكانی ئەوان، چونكە ئایینی ئیسلام ئایینێكی پیرۆزە. ئێستا لە كوردستاندا خەڵكانێك لایەنگر و ئەندامی حزبە ئیسلامیەكانە، بەڵام لە راستیدا نازانێت دروستبوونی ئەو حزبە ئیسلامیە سیاسییانە لەسەر بنەمایەكی هەڵەیە، رەنگە ئەو لایەنگر و ئەندامانەی حزبە ئیسلامیە سیاسییەكان موسڵمانی دروست و بەبڕوا بن، بەڵام لەمەرامی حزبەكان نەگەن و لەحەقیقەتی ئایینیش نەزانن.

بزووتنەوەی حەماس ..ئیخوان موسلمین بوو
بەڵام كاتێك هاتە دەسەڵات بەرامبەر خەڵك توند بوو
• ئەو حزبە ئیسلامیانەی خۆیان بە میانرۆ دەزانن وەك گروپەكانی ئیخوانی موسلمین، هەر لەسەرەتاوە لەسەر بنەمای توندوتیژی دامەزراون و بڕوایان بە تیرۆرو توندتیژی هەبووە، ئایا چۆن ئێستا ئەم گروپە داوای دیموكراتی دەكەن؟
- ئەوەی بەناوی حزبی ئیسلامی داخڵی دنیای سیاسەت بێت، حزبی میانڕەوی تێدا نییە، ئەوانەی خۆیان بە میانڕەو نیشاندەدەن بیروباوەڕێكیان هەیە كە پێی دەڵێن: (عهد استضعاف)واتا كە ئێستا ئێمە لەسەر دەسەڵات نین بۆمان هەیە هەندێك شت بكەین و بەنەرمی مامەڵە لەگەڵ خەڵك بكەین، خەڵكیش بە كافر لەقەڵەم نەدەین تا دەگەینە سەر دەسەڵات، واتا پێی دەڵێن سەردەمی مەكی، ئەو كاتەی موسڵمانەكان كاتی خۆی لەمەكە كەمینە بوون بەشێوەیەك مامەڵەیان دەكرد نەیاندەتوانی هەموو جۆرە هەڵسوكەوت و قەناعەتێكی خۆیان دەرببڕن، ئێستاكەش پێیانوایە كە دەسەڵاتی تەواویان نییەو هەندێك نەرمی دەنوێنن، بەڵام لەقەناعەتەوەو لەراستیدا بڕوایان بە تەعەدودیەت و دەستاودەستكردنی دەسەڵات نییە، ئەوانەی دژی ئەوانیشن وا دەزانن دژی ئایینن، ئەوانەی نەرمونیانن گەر بێنە سەر دەسەڵات بەتەئكید ئەو نەرمونیانە نامێنێت، نموونەشمان هەیە، بزووتنەوەی حەماس كە لقێكە لە ئیخوان موسلمین بەحساب حزبێكی میانڕەوە، بەڵام هەموومان بینیمان كاتێك هاتنە سەر دەسەڵات چۆن دەكوژن و تووندڕەون و مامەڵەیان لەگەڵ خەڵك چەند توندە.

ئەندامی كۆمەڵەی تەكفیر و هیجرە هەبووە
دایكی خۆی بە مێرد داوەو باوكیشی لەژیاندا بووە
• لەهەموو جیهانی ئیسلامیدا تەنيا دوو نموونەی دەسەڵاتی حزبە ئیسلامیەكان تا ئێستا هەن، ئەویش نموونەی ئیمارەتی تاڵیبان لە ئەفغانستان و رێكخراوی حەماس لەناوچەكانی فەلەستین، لێرەدا ئەگەر تاڵیبان رێكخراوێكی توندڕەو بێت، ئەوا بەحساب رێكخراوی حەماس سەر بە گروپی ئیخوان موسلمینە و بەرێگەی هەڵبژاردن هاتنە دەسەڵات، ئایا بۆچی حزبە ئیسلامیەكان كە بەهەڵبژاردنیش بچنە دەسەڵات دژی دیموكراتی رادەوەستنەوە؟
- وەك باسمكرد حزبە ئیسلامیەكان هەموویان وەكو قەناعەت كە ناوی ئیسلامی لە خۆیان دەنێن، بەرامبەر بەكافر دەزانن. ناولێنانی حزبی ئیسلامی بۆ ئامانجی گەیشتنە بەدەسەڵات هەروەكو بزووتنەوەی حەماس، هەروەها نموونەی تریشمان هەیە وەكو ئیخوان موسلمین كە بەحساب حزبێكی میانڕەوە، بەڵام كۆمەڵەی تەكفیر و هجرە كە لەقاعیدە توندڕەوتر بوون یا بەهاوشێوەی رێكخراوی قاعیدە بوون، ئەم كۆمەڵەیە هەموو كۆمەڵگەی میسری و بگرە موسڵمانەكانیشیان بەكافر ناو دەبردو دەیانوت نابێت لەناو ئەو كۆمەڵگایە بژین و دەبێت هیجرەت بكەین و لە چیا بژین و دوور لە وان هەر بۆیە ناوی لێنان جەماعەتی تەكفیر و هجرە هەر فرسەتێكیان دەستكەوێت خەڵك دەكوژن. هەر بۆ نموونە سالم بەهنەساوی لە كتێبە میسرییەكان باس دەكات و دەڵێت: گەنج هەبووە دایكی خۆی بردووەو قەناعەتی بۆ دروستكردووە لەسەر بیروباوەڕی خۆی بەمێردی داوە لەكاتێكدا باوكی لە ژیاندا ماوەو ساخ و سەلامەت بووە تەڵاقیشی نەداوەو تەنانەت باوكی بەكافر لەقەڵەم داوە. حزبە ئیسلامیە توندڕەوەكان كە لەدنیادا هەیە هەموویان لەدایكبووی ئیخوان موسلمینن. ئیسلام بڕوای بە سیاسەتێكی مەدەنی هەیە وەكو ئەوەی ئێستا لەكۆمەڵگەی كوردستانی لەناو خەڵك جێبەجێ دەكرێت، بەڵام دەكرێت سیاسەتی كۆمەڵگە گونجاو بێت لەگەڵ ئیسلام


حزبە ئیسلامیەكان
بەرامبەر دیموكراسییەت وەكو یەك بیر ناكەنەوە
• دوای گۆڕانكارییەكانی میسر ئێستا هەست دەكەین گرووپی ئیخوان موسلیمین خۆیان بۆ هەڵبژاردن ئامادە دەكەن، هەندێك پێیانوایە ئیخوان موسلمین لەوانە حكومەتی داهاتووی میسر پێكبهێنن، ئایا تاچەند مەترسی ئەوە هەیە هەمان ئەزموونی حەماس لە فەلەستین، لەمیسریش دووبارە بێتەوە؟
- پێشتر واچاوەڕواندەكرا ئیخوان موسلمین لە میسر خەڵكێكی زۆریان لەگەڵ بێت، ئەوەی لەم دواییە دەركەوتووە ژمارەیان بەو شێوەیە نییە، بەڵام ئەگەر دەسەڵات بگرنە دەست لە میسر، ئەوا من زۆر رەشبین دەبم، لەبەرئەوەی كاتێك دێنە دەسەڵات بڕوایان بە فرەلایەنی سیاسی نییەو حزبەكانی تر دەسڕنەوەو خۆیان بەتەنیا بەئیسلام و راست دەزانن، كاتێك ئیخوان موسلمین لە میسر بێنە سەر كورسی وەكو حەماس ئامادە نابن كورسییەكە چۆڵ بكەن، پێیانوایە ئەگەر كورسی چۆڵ بكەن، ئەوا سەرپێچیان كردووە و كارێكی غەیری شەرعییان كردووە. هەربۆیە زۆربەی حزبە ئیسلامیەكان وەكو یەك بیر لەدیموكراسی ناكەنەوەو تەنانەت لە ناو ئەندامانی یەك حزبی ئیسلامیش، ئەم جیاوازییە لە بیركردنەوەیان هەیە، حزبە ئیسلامیەكانی كوردستانیش بەهەمانشێوە وەكو یەك بەرامبەر دیموكراسییەت بیر ناكەنەوە، هەیانە كراوەترەو وا بۆی دەچێت دەڵێت ئەو دیموكراسییەتەی جێبەجێ دەكرێت رۆحی ئیسلامە، واتا دیموكراسییەت و ئیسلام یەك شتە، بەداخەوە ئەم جۆرە كەسانە لەناویاندا زۆر كەمە، زۆربەی هەرە زۆریان دەڵێن دیموكراسیەت دژی ئایینە، هەشیانە دەڵێن دیموكراسییەت شتی باشی تێدایەو خراپیشی تێدایە، بەگشتی زۆربەیان دژی دیموكراسیەتن و تەنیا ئەو وردەكارییەی كە خۆیان مەبەستیانە جێبەجێی بكەن. گەرچی دەزانین لە راستیدا ئیسلام لەگەڵ دیموكراسییەت و كۆمەڵگەی مەدەنییە، لەگەڵ ئەوەدا نییە كەسێك بێت و بەناوی ئایین حوكم بكات و بڵێت ئەمەی من راستەو ئەوەی ئێوە دەڵێن هەڵەیە. هەروەها ئیسلام لەگەڵ ئیجتیهاداتەو سیاسەت شتێكی دونیەویە و پێغەمبەر ( د.خ)فەرموویەتی:( انتم اعلموا بامور دنیاكم) واتا ئێوا كاروباری دنیای خۆتان باشتر دەزانن، ئایا سیاسەت داخڵی كاروباری خانەی دونیەوییە یا داخڵی خانەی كاروباری ئوخرەوییە؟ ئایا سیاسەت لە زەوابتە وەكو عەقیدەو خواپەرستی یا لە موتەغەیراتە لەو شتانەی كە دەكرێت بگۆڕدرێت بەپێی كات و سات. گەورەیی ئیسلام لەوەدایە دەتوانرێت لەگەڵ هەموو كات و ساتێك بگونجێت، بەمەش ئیسلام دەتوانێت لەگەڵ هەموو سەردەمێكدا مواكبە بكات.

حزبە كوردستانیەكان كەمتەرخەمن
• لایەنێكی دیكە لە بەسیاسیكردنی ئایین گۆڕینی كۆمەڵگەیە بۆ كۆمەڵگەیەكی داخرا و سەپاندنی هەندێك یاسا بەناوی یاسای ئیلاهیەوە، ئایا چۆن رێگە لە دروستبوونی كۆمەڵگەی داخراو دەگیرێت؟
- حزبە ئیسلامیەكان ئەگەر بگەنە دەسەڵات بەتەئكید كۆمەڵگەی داخراو دروست دەبێت، چونكە ئەوان بڕوایان بە تەعەدودییەت و دەستاودەستكردنی دەسەڵات و دیالۆگ نییە، بۆ هەرێمی كوردستان باش نییە حزبی ئیسلامی بێنە سەر دەسەڵات، چونكە لەلایەك زیان بەئایین دەگەیەنن و لەلایەكی تر زیان بەپرۆسەی سیاسی و نیشتمانی و دیموكراسی هەرێمی كوردستان دەگەیەنن، بۆیە پێویستە پێوەندی نێوان ئایینی ئیسلام بە سیاسەت شیبكرێتەوە، بەداخەوە ئێستا من دەبینم ئەو لایەنە زۆر لەلایەن مامۆستایانی ئایینی ئیهمال كراوە و ئەو حزبە ئیسلامییانەش سوودیان لەو كەلێنە وەرگرتووە. لەلایەكی ترەوە حزبە نەتەوەییەكان و كوردییەكان بەرامبەر ناساندنی پێوەندی ئیسلام بەسیاسەتەوە كەمتەرخەمن، لەمەشدا كەمتەرخەمییەكە بۆ كەناڵەكانی راگەیاندنیان دەگەڕێتەوە، لەكاتێكدا راگەیاندنەكانی ئەو حزبە ئیسلامییانە زۆر بەفراوانی و چڕی كار لەسەر بیروباوەڕو مەبەستی خۆیان دەكەن. ئەمەش زەمینەی دروست بوونی كۆمەڵگەی داخراو دروست دەكات، كاتێكیش كۆمەڵگەیەكی داخراو دروست بوو دیالۆگ نامێنێت لە نێوان شارستانییەكان، چونكە لەكۆمەڵگەی داخراو شارستانییەتیش لەناودەچێت. ئیسلام لەبنەڕەتدا لەگەڵ دیالۆگی شارستانییەتدایە ،بەڵام حزبە ئیسلامیە سیاسییەكان لەگەڵ پێكدادانی شارستانییەتەكاندان.