مومتاز حەیدەری لەبواری رۆژنامەگەری و رۆشنبیری و راگەیاندن بەگشتی خاوەن قەڵەمێكی بەئەزموونە، بۆ یەكەم جار لە ساڵی 1960 وەكو پەیامنێرێك لە رۆژنامەی (ئاڵای ئازادی) دەستی بەكاركردووە و لەهەموو كاتەكاندا هەوڵیداوە لە بواری كاری رۆژنامەگەری دانەبڕێت تا بۆتە خاوەن ئەزموونێك ، لەدوای ڕاپەرین لە دوو خولدا بووەتە سكرتێری سەندیكای رۆژنامەنووسانی كوردستان و لەو ماوەیەی كە سەرنووسەری گۆڤاری رۆژنامەوانی بووە (7) ژمارەی لێ دەرچووە، ماوەیەك لە وەزارەتی رۆشنبیری راوێژكار بووە، لەپاشان هەستی بەوەكردووە ئەو رۆژنامە و گۆڤارانەی لەكوردستان دەردەچن لایەنی (مێژوویی- بەڵگەنامەیی و لێكۆڵینەوەی سیاسی و كۆمەڵایەتی) تێدا نییە یان كەمە بۆیە گۆڤاری(k21) كوردستان لە سەدەی بیست و یەكی دەركرد، بۆ پتر خستنەڕووی هۆكارەكانی دەركردنی ئەم گۆڤارە و پەیامەكەی چەند پرسیارێكمان لێ كرد و لە پوختەی وەڵامەكاندا ئەم راپۆرتە دەخەینەڕوو.

لەسەرەتادا دەربارەی هۆكار و پێویستی دەرچوونی ئەو گۆڤارەكە وتی:
هەستم كرد ئەو رۆژنامە و گۆڤارانەی لە كوردستان دەردەچن لایەنی مێژووی و بەڵگەنامەی و لێكۆڵینەوەی سیاسی و كۆمەڵایەتی و هۆكارەكانی شكست هێنانی جووڵانەوەی كوردایەتیمان چییە تیایاندا نییە، راستە كۆمەڵێك رۆژنامە هەبوون بەتایبەتی گۆڤاری سەنتەری برایەتی، ئایندە، سەردەم، رێبازی نوێ لەم بوارانە كاریان دەكرد، بەڵام تێڕوانینی من ئەوە بوو كە گۆڤارێكی تر دەربكەم لەمانە جیاوازبێت جیاوازیەكەشی لەوەدایە خۆم خاوەن كتێبخانەیەكی گەورەم و كۆمەڵێك كتێب و سەرچاوەی باشم هەیە و لە ماوەی (50-60) ساڵدا ژمارەیەكی زۆر دیكۆمێنتی نهێنیم پەیداكردووە و لەلام پارێزراون و بڵاونەكراونەتەوە، لەلایەكی تر پانتایی لێكۆڵینەوی سیاسی، كوردایەكی، مێژوویی بۆ زانكۆ و سەنتەرەكانی لێكۆڵینەوە پێویستە و قوتابیان و گەنجان پێویستیان بەسەرچاوەی باش و باوەڕپێكراو هەیە، بەتایبەتی بەسەرچاوەی زمانی كوردی هەیە، چونكە زمانی عەرەبی باش نازانن بۆیە بڕیارمدا ئەو گۆڤار بەم شێوەیە دەربكەم كە ناوی لێنرا(k21) واتە كوردستان سەدەی بیست و یەك بۆیەش ئەم ناوەم هەڵبژارد بەراوبۆچوونی خۆم لە سەدەی(19 و 20) زۆر دەرفەتمان لە دەستچووە و ئومێدەوارم جووڵانەوەی كوردایەتیمان لەسەدەی (21) زیاتر بەخۆیدابچێتەوە و پێش بكەوێت و بچێتە قۆناغێكی بەرجەستەبوون بۆ سەربەخۆیی كۆماری كوردستان منیش وەكو تاكێكی كورد و خاوەن قەڵەمێك گۆڤارەكەم ناو لێ ناوە(k21) و هیوادارم بتوانم ئەو توانا و هەستەی هەمە خزمەتی رەوشی كورد و كوردستانی پێ بكەم، گۆڤاری(k21)، گۆڤارێكی كەلتوری، زانستی، مێژوویی، بەڵگەنامەیی، نەتەوەیی، وەرزی ئازادە.
سەبارەت بە پەیامی گۆڤارەكەش وتی:
دوو پەیامم لەو گۆڤارەدا هەیە:
یەكەمیان :گۆڕانی عەقڵیەتی ئێستای كورد بۆ عەقڵیەتێكی پێشكەوتووتر و مۆدێرن.
دووەم: دروستكردنی و پەرەپێدان بەهزری دەوڵەتی كوردی لە ناو عەقڵ و هەست و هزری میللەتی كورد تاوەكو ببێتە هێزێكی گەورە لەلامان، دەمانەوێت بزانین بۆچی تا ئێستا كە دەوڵەتی كوردی دانەمەزراوە و هۆكار و فاكتەرەكانی كۆمەڵایەتی و سیاسی و ئابووری دروست نەبوونی دەوڵەتی كوردی چییە و چی بكرێت بۆ ئەوەی دروست بێت تا ئێستا(9) ژمارە لە گۆڤاری(k21) دەرچووە لەم ژمارانەدا ژمارەیەكی زۆر دیكۆمێنت بۆیە لەمجارە بڵاوكراوەتەوە واتە نوسخەی ئەسڵیە بەرز كراوەتەوە و لە گۆڤارەكەدا هەوڵدەدین بابەتی وا بڵاوبكرێتەوە كە رۆحی كوردایەتی زیاد بكات و ئەو راستیە بزانین ئێمە نەتەوە و دەوڵەتێكی جیاوازین لە عێراق و عەرەب و تورك و فارس بە پلان و بەرنامە و دوژمنكارانە دابەشی سەر ئەو وڵاتانە كراوین و لەلای ناتوانین داوای سەربەخۆیی بكەین، لە كاتێكدا بچووكترین میللەت لە دنیادا(سۆرینا) بوو لە ئەمەریكای لاتین مەلیكەی بەریتانیا بە دەستی خۆی ئاڵاكەی بۆ هەڵدان خۆم و لەناو گۆڤارەكەش وشەی هەرێمم قەدەغە كردووە، چونكە كە دەڵێن هەرێمی كوردستان وەكو ئەوە وایە عێراقی بین و بڵێین هەرێمی بەسرا، نەخێر ئێمە خاك و نیشتمان و نەتەوە و كەلتور و مێژووی خۆمان هەیە و جیاوازە لە عێراق و عەرەب و دەوڵەتەكانی تریش، من دەمەوێت بەخەڵك و گەنجی ئێستای كورد بڵێم ئێمە جیاوازین لە عێراق و دوو دەوڵەتین بەزۆر لێكنراوین بە عێراقەوە، گەرچی ، لەلایەكی تر پێم سەیرە كە ئێمە سەیری باشووری سوودان و كۆسۆڤۆ بكەین لە راستیدا دەبووایە ئەوان سەیری ئێمەیان بكردبووایە و چاویان لە ئێمە بكردایە، چونكە پتر لە (100) ساڵە شۆڕشی رزگاریخوازمان دەست پێكردووە و میللەتێكی(40) ملیۆن كەسین و زۆر لەم میللەت و شوێنانەش پێشكەوتووترین.
سەبارەت بە بیرۆكە و دەركردنی گۆڤاری (لەیلا قاسم- لەیلا زانا) مومتاز حەیدەری وتی:
هەستم بەوە كرد كە كەلێنێكی تر هەیە پێویستی بە كاری زیاتر و خزمەتی پترە ئەویش ئافرەتانە بۆیە گۆڤارێك بۆ ژنان دەردەكەم، (13-14) رێكخراوی مەدەنی ئافرەتان و ژنان هەیە ئەو گۆڤار و رۆژنامە و بڵاوكراوانەی دەری دەكەن بابەتی كرچ و كاڵی تێدایە بۆیە پێم باش بوو گۆڤارێكی تایبەت بە ژنان دەربكەم كە (كەلتووری- مێژووی- زانستی- كۆمەڵایەتی- هەمە لایەنی ئافرەتان وەرزی ئازاد )بێت و ناوی گۆڤارەكەشم لێناوە(لەیلا قاسم- لەیلا زانا) بۆیەش ئەو ناوەم داناوە، چونكە هەردوو لەیلا نیشانەی كوردایەتی و شۆڕشگێری و بەرخودانی میللەتەكەمانن هەر یەكەش لە كات و قۆناغێكمان بووە، لەیلا قاسم نموونەی قارەمانیەتییەكی كەموێنەی كوردستانە كە لە ساڵی 1974 وەكو كچە شۆڕشگێڕێكی نەتەوەیەكی بندەست لە سێدارەدرا و هەردەم نموونەی شۆڕشگێرییە و ناوی لە دڵی هەموومان دایە و ناوی لەیلا زاناش هەر لە بەر رۆشنایی تێكڕایی ناوەڕۆكی پەیامی گۆڤارەكەیە، چونكە ناوێكی تری درەوشاوەی خەباتی كوردایەتیمانە، ئەو كچەیە كە دەوڵەتێكی زەبەلاحی رۆژهەڵاتی ناوەڕاست لێی دەترسێت و نیشانەی بەرخۆدان و دیموكراتی و ئاشتییە و گۆڤاری لەیلا قاسم- لەیلا زانا ژمارەیەكی بە بەرگێكی جوان و تێروتەسەلی زانستی لە دوو تۆیی(320) لاپەرەی دەرچووە و چەندین بابەت و لێكۆڵینەوەی گرنگ لەخۆ دەگرێت لەسەرلایەنی ژنان هەر لە ژن سالاری تا دەگاتە پیاوسالاری و ئەو توندوتیژییەی ئێستا كە بەناهەق دەرهەق بە ژنان هەیە، ئەو دوو گۆڤارەی كە(k21) و لەیلا قاسم- لەیلا زانا) كە دەری دەكەم لە هەوڵ و ئومێدی ئەوەدام پرۆژەكەم ببێتە دەزگایەكی لێكۆڵینەوە یان سەنتەرێكی ستراتیژی لێكۆڵینەوە و دارایی بۆ دابین بكرێت تاوەكو كۆمەڵێك شارەزا و پسپۆڕ و ئەكادیمی تێدا كار بكەن و توێژینەوە و لێكوڵینەوە هەمە لایەنەكان لەم رێگایەوە بگەێنینە نەتەوە و گەنجانی كوردمان ....