رۆبەرتۆ مانچینی راهێنەری یانەی مانچستەر ستی ئینگلیزی سنووری بۆ ئەو لێدوان و دەنگۆ زۆرانە دانا كە لە هاوینی ئەمساڵدا لەبارەی ناتوانایی یانەكەیەوە بۆ كڕینی یاریزانان دەكرێن.
مانچینی راهێنەری پاڵەوانی ئینگلتەرا دووپاتی كردەوە لە دوو هەفتەی داهاتوودا هەموو كارەكانی خۆمان لە بازاڕی گواستنەوەدا كۆتایی پێدێنین و گرێبەست لەگەڵ چەند یاریزانێكی نوێدا دەكەین.
لەبارەی هۆكاری بێدەنگیی یانەكەیەوە تا ئێستا ئەو راهێنەرە ئیتاڵییە گوتی وەرزی گواستنەوەی یاریزانانی ئەمساڵ و بازاڕی فرۆشتنی یاریزانان، بازاڕێكی زۆر قورسە.
مانچینی هەروەها ئاشكرای كرد كە ئێستا دانووستانی لەگەڵ چەند یاریزانێكدا هەیە و روونیكردەوە كە نایەوێ هیچ شتێك بڵێت تا ئەو كاتەی رێكەوتنی تەواو لەگەڵ ئەو یاریزانانەدا دەكات.
سەبارەی بە جۆری ئەو یاریزانانەی دەیانكڕێت، ئەو راهێنەرە گوتی یاریزان بۆ ئەو شوێنانە دەكڕین كە وەرزی رابردوو كێشەیان بۆ دروست كردین.