یەكێتیی تۆپی پێی فەرەنسی بڕیاری راگرتنی سەمیر نەسری یاریزانی هەڵبژاردەی فەرەنسای بۆ 3 یاری نێودەوڵەتی راگەیاند.
نەسری تۆمەتباركرا بە قسەگوتن و بێڕێزی بەرامبەر رۆژنامەنووسان لە دوای یاری هەڵبژاردەی فەرەنسا بەرامبەر ئیسپانیا كە بە 2-0 كۆتایی هات و یارییەكە لە قۆناخی چارەكی كۆتایی جامی نەتەوەكانی ئەوروپای 2012 بەڕێوەچوو.
بەهۆی ئەو تۆمەتەوەی ئاراستەی كراوە، یەكێتیی تۆپی پێی فەرەنسی بڕیاریدا نەسڕی لە 3 یاری نێودەوڵەتی رابگرێت و لە هەمان چوارچێوەدا بڕیاری راگرتنی جیریمی مینێزی هێرشبەری یانەی پاریس سانجێرمانی دا بە راگرتنی بۆ یەك یاری، بەهۆی دەمەقاڵەكردنی لەگەڵ ناوبژیوانی هەمان یاریدا.
هەرچی یان مفیلا و حاتم بن عەرەفەیە هیچ سزایەك نەدران و تەنیا هۆشدارییان درایە.
هەڵبژاردەی فەرەنسا لە یۆرۆی 2012 ئاستێكی خراپی پێشكەشكرد و لە قۆناخی چارەكی كۆتاییدا كرایە دەرەوە و دواتر لۆران بلانتی راهێنەری هەڵبژاردەكە لە پۆستەكەی دوورخرایەوە.