رۆژی هەینی داهاتوو لە شاری لەندەن یارییەكانی ئۆلۆمپیادی لەندەن 2012 دەست پێدەكات بە بەشداری زیاتر لە 12 هەزار وەرزشوان لە 204 وڵات ، یەكێك لە یارییەكانی ئەم ئۆلۆمپیادە یاری تۆپی پێیە كە یاریزانەكانی بەشداربوو لە ژێر تەمەنی 23 ساڵیدان لەگەڵ بەشداریكردنی سێ یاریزانی ئەستێرە سەرووی 23 ساڵ، هەرچەندە بەرازیل خاوەن مێژووێكی پڕشنگدارە لە جامی جیهانی و پاڵەوانەتییەكانی دیكەدا بەڵام تا ئێستا نەیتوانیووە میدالیای زێڕی ئۆلۆمپی بەدەست بهێنێت ، ئەمجارەیان بەرازیلییەكان گەشبینن بە پێكهاتەی هەڵبژاردەكەیان چونكە ئەم پێكهاتەیە بە رێژەیەكی زۆر هەمان ئەو پێكهاتەیە كە بەشداری لە جامی جیهانی 2014 لە وڵاتی بەرازیل دەكەن .
دیاردەی تۆپی پێی بەرازیلی رۆنالدۆ كە لەگەڵ هەڵبژاردەی بەرازیل جامی جیهانی 2002 و میدالیای برونزی ئۆلۆمپیادی ئەتلانتای 1996 ی بەدەست هێناوە گەشبینی خۆی دەربڕی بە هەڵبژاردەی وڵاتەكەی كە دەتوانێت ئەمجارە میدالیای زێڕی ئۆلۆمپیادی لەندەن بباتەوە ، رۆنالدۆ لە لێدوانێكدا بۆ ئاژانسی رۆیتەرز گوتی : هیچ پاساوێك نییە كە ئەمجارەش بەرازیل شكست بهێنێت لە یارییەكانی ئۆلۆمپیدا ، پێویستە بە جیدی مامەڵە لەگەڵ بارودۆخەكە بكەین .
هەروەها رۆنالدۆی گەورە گوتی : كاتی ئەوە هاتووە بەرازیل ببێتە پاڵەوانی ئۆلۆمپیاد ، ئێستا ئەم ئۆلۆمپیادە بۆ ئێمە زۆر باشە چونكە ئەرژەنتین هەڵگری نازناوی هەردوو ئۆلۆمپیادی 2004 و 2008 لە پاڵاوتن سەرنەكەوت بۆیە ئەو كاتە بۆ بەرازیل گونجاوە میدالیای زێڕ بەدەست بهێنێت .
شایانی باسە هەڵبژاردەی بەرازیل لە گروپی سێیەم یاری دەكات لەگەڵ هەڵبژاردەكانی بیلاروسیا و میسر و نیوزیلەندا .