ئارسن ڤینگەری راهێنەری فەرەنسی بەڵێنیدا یانەكەی لە هاوینی ئەمساڵدا 40 ملیۆن پاوەند بۆ كڕینی یاریزانان خەرج بكات.
ڤینگەری راهێنەری یانەی ئەرسناڵ پێشتر دەستەوارەیەكی پێشكەشی یانەی مەلەگەی ئیسپانی كردبوو بۆ كڕینی سانتی كازۆرلا بە بڕی 16 ملیۆن پاوەند، بەڵام یانە ئیسپانییەكە رازی نەبوو ئەو یاریزانە بفرۆشێت.
ڤینگەر هەوڵێكی زۆر دەدات بۆ ئەوەی رۆبن ڤان پێرسی لە ریزەكانی خۆیدا بهێڵێتەوە، هەرچەندە ئەو یاریزانە ویستی خۆی بۆ رۆیشتن ئاشكرا كردووە و یانەكانی مانچستەر ستی و یونایتد و یۆڤنتۆس دەستەوارەی رەسمییان بۆ كڕینی ئەو یاریزانە پێشكەشكردووە.
ئەو راهێنەرە لە لێدوانی بۆ رۆژنامەی سەنی ئینگلیزی گوتی كارگێڕیی یانەكە بەڵێنیان داوە لە ماوەی گواستنەوەی هاوینەی ئەمساڵدا 40 ملیۆن یۆرۆمان بۆ خەرج بكەن بۆ ئەوەی یاریزانی نوێی پێ بكڕین، بە چاوپۆشین لەوەی ڤان پێرسی دەڕوات یان نا.