گاتایانۆ پاولیلۆی بەڕێوەبەری كارەكانی ریكاردۆ كاكای یاریزانی یانەی ریال مەدریدی ئیسپانی ئاشكرای كرد دانووستانی لەگەڵ بەرپرسانی میلان بۆ گەڕانەوەی كاكا بۆ یانەكەی پێشووی دەست پێكردووە.
پاولیلۆ گوتی نرخی كاكا لە كاتی چوونە دەرەوەی لە یانەی ریال مەدرید لە 20 ملیۆن یۆرۆ كەمتر نابێت.
لێدوانی ئەو بەڕێوەبەرە دوای كۆبوونەوەی لەگەڵ ئەدریانۆ گالیانی جێگری سەرۆكی یانەی میلان هات و ئەو لە دوای هاتنە دەرەوەی لە كۆبوونەوەكە گوتی بەڵێ كۆبووینەوە بۆ ئەوەی باسی چارەنووسی كاكا بكەین، بەڵام هیچ زانیارییەكی ترتان نادەمێ.
سەرچاوەكان ئاشكرایان كردووە كە مۆرینۆی راهێنەری ریال مەدرید، ئامۆژگاری كاكای كردووە یانەیەكی تر بۆخۆی بدۆزێتەوە، ئێستا هەوڵی زۆر هەیە بۆ ئەوەی كاكا بگەڕێتەوە میلان.
سەرچاوەكانی نێو یانەی ریال مەدرید ئاشكرایان كردووە كە یانەی میلان ئامادەیە 10 ملیۆن یۆرۆ بدات بۆ كڕینەوەی كاكا، بەڵام ریال مەدرید داوای 20 ملیۆن یۆرۆ دەكات.
كاكا بەر لە سێ ساڵ بە 56 ملیۆن یۆرۆ لە میلانەوە چووە ریال مەدرید و مووچەی ساڵانەی 9 ملیۆن یۆرۆیە.