تیتۆ ڤیلانۆڤای راهێنەری یانەی بەرشەلۆنەی ئیسپانی ئاشكرای كرد ئیبراهیم ئەفیلای یاریزانی هۆڵەندی لەگەڵ بەرشەلۆنە بەردەوام دەبێت.
دوای ئەوەی چەندین سەرچاوەی نزیك لە یانەی بەرشەلۆنەوە دووپاتیان كردەوە كە یانەكە بڕیاریداوە دەستبەرداری ئیبراهیم ئەفیلای یاریزانی ناوەڕاستی یانەكە بێت، راهێنەری یانەكە ئەو هەواڵانەی رەتكردەوە.
ڤیلانۆڤا كە دوێنێ یەكەم یاری دۆستانەی خۆی لەگەڵ بەرشەلۆنە وەك راهێنەر ئەنجامدا و توانی 2-1 لە یانەی شتوتگارتی ئەڵمانی بباتەوە، دەنگۆی رۆیشتنی ئەفیلای بەدرۆخستەوە.
تیتۆ گوتی ئەفیلای یاریزانێكی نایابە و هەموو ئەو مەرجانەی تێدایە كە ئێمە دەمانەوێت، لەبەرئەوە وەرزی نوێ لەگەڵ ئێمەدا دەست پێدەكات و ناچێتە هیچ یانەیەكی تر.
سەرچاوەكان ئاشكرایان كردبوو كە ئەفیلای نزیكە لە چوونە یانەكانی ئینتەرمیلانی ئیتاڵی یان تۆتنهامی ئینگلیزی.