دیمیتار برباتۆڤی هێرشبەری یانەی مانچستەر یونایتدی ئینگلیزی ئاشكرای كرد سێر ئەلێكس فێرگسۆنی راهێنەری یانەكە دەیەوێ ئەو بە 5 ملیۆن پاوەند كە دەكاتە نزیكەی 7 ملیۆن دۆلار بفرۆشێت.
برباتۆڤ بە 48 گۆڵ گۆڵكەری مێژوویی هەڵبژاردەی بولگاریایە و شوێنی خۆی لە پێكهاتەی سەرەكی یانەی مانچستەر یونایتد لە وەرزی رابردوودا لەدەستدا هەرچەندە بۆ ماوەی ساڵێك گرێبەستەكەی لەگەڵ ئەو یانەیەدا نوێكردەوە.
برباتۆڤ ساڵی 2008 بەرامبەر بە 30 ملیۆن پاوەند لە یانەی تۆتنهامەوە پەیوەندی بە مانچستەر یونایتدەوە كرد.
برباتۆڤ لە پەیجی تایبەتی خۆی لە تۆڕی كۆمەڵایەتی فەیسبووك گوتی لە رۆژنامەكان دەخوێنمەوە دەڵێن نرخی من 10 ملیۆن پاوەندە، دواتر قسە لەگەڵ فێرگسۆندا دەكەم دەڵێ ئێمە داوای 5 ملیۆن پاوەندمان كردووە.
هەروەها گوتی ئێستا باوەڕ بە كێ بكەم، من سوودم بۆ هیچ كەسێك نابێت ئەگەر یاری نەكەم، ئەم یانەیەم خۆشدەوێ و دەمەوێ یاری بكەم، ئەگەر یاری نەكەم بۆچی لێرە بم.