ماوریسیۆ بیلگرینۆی راهێنەری نوێی یانەی ڤالنسیای ئیسپانی گوتی تیپەكەی هەوڵدەدات ركابەری لەگەڵ هەموو یانەكانی لالیگادا بكات و تەنیا خۆی بە ركابەری ریال مەدرید وبەرشەلۆنە نازانێت.
لە یەكەمین دەركەوتنیدا لە بەرامبەر دەزگاكانی راگەیاندن دوای وەرگرتنی پۆستی راهێنانی یانەی ڤالنسیا، بیلگرینۆ گوتی یاری یەكەممان بەرامبەر ریال مەدرید وەك هەر یارییەكی تر وایە و بریتییە لە بوونی 22 یاریزان بەرامبەر یەكتری، كێشەمان هەمان كێشەی هەموو تیپێكی تۆپی پێیە لە یاریگادا. پێویستە بزانین چۆن هێرش دەكەین و چۆن گۆڵمان دەپارێزین.
هەروەها گوتی ئێمە ركابەری هەمووان دەكەین، تەنیا بەرشەلۆن و ریال مەدرید نا، كاتێك تۆ دەڵێی ئێمە ركابەری دوو یان سێ تیپ دەكەین، ئەوە كەمكردنەوەیە لە ئاستی تیپەكانی تر و بێڕێزییە بەرامبەریان، گرنگ بۆ ئێمە گۆڵكردن و بردنەوەیە.