ڤیسنتی دیل بۆسكی راهێنەری هەڵبژاردەی ئیسپانیا گوتی رووبەڕووبوونەوەی پورتوگال گرنگترین یارییە لە ژیانی یاریزانانی هەڵبژاردەی ئیسپانیادا.
هەردوو هەڵبژاردەی ئیسپانیا و پورتوگال ئەمشەو لە یاری پێش كۆتایی یۆرۆی 2012 بەرامبەر یەك دەبنەوە.
دیل بۆسكی گوتی هەڵبژاردەی پورتوگال بە شێوازی بەرگری یاری ناكات لە یارییەكەدا، ئەگەر واش بكات ئەوان باشترین بەرگریكەرانیان هەیە كە پیپێ و برۆنۆ ئەلڤێشن، لەبەرئەوە تیپێكی هاوسەنگن و بە هەر شێوازێك یاری بكەن مەترسی خۆیان هەیە.
راهێنەری ئیسپانیا گوتی ئێمە هەر بە شێوازی خۆمان یاری دەكەین و هەوڵدەدەین لە كاتی یارییەكەدا پەرە بە بیركردنەوە و شێوازی یاریكردنی خۆمان بدەین.
هەروەها گوتی پورتوگالییەكان بەهۆی یارییەكەی ئەمشەوەوە دەتوانن مەزنترین رووداو لە مێژووی خۆیاندا تۆمار بكەن، لەبەرئەوە ئێمەش یارییەكە بە گرنگترین یاری ژیانی یاریزانەكانمان دەزانین و دەبێ هەوڵێكی زۆر بدەین بۆ بردنەوەی ئەو یارییە.