ئەندرێس ئینێستای یاریزانی ناوەڕاستی یانەی بەرشەلۆنە گوتی تیپەكەی لە وەرزی داهاتوودا دەگەڕێتەوە و ركابەری لەسەر سەرجەم نازناوەكان دەكات.
بەرشەلۆنە دوێنێ شەو لەسەردەستی یانەی چێڵسی كە بە 10 یاریزانەوە یاری دەكرد، ماڵئاوایی لە خولی یانە پاڵەوانەكانی ئەوروپا كرد دوای ئەوەی 2-2 لەگەڵ ئەو یانەیە یەكسان بوو. ئەم دەركردنە دوای ئەوە هات كە یانەكە لەسەرەتای ئەم هەفتەیەدا لە كلاسیكۆدا بە ریال مەدرید دۆڕا لە نێو یاریگای خۆی 2-1 و تاڕادەیەكی زۆر نازناوی خولی ئیسپانی لەدەست دا.
ئەو یاریزانە دوای یارییەكە گوتی وەرزی داهاتوو بۆ ركابەریكردن لەسەر هەموو نازناوەكان دەگەڕێینەوە، ئێمە دڵگرانین بە چونە دەرەوە لە پاڵەوانیەتییەكە، بە تایبەت كە لە یارییەكەدا هەلی زۆری بردنەوەمان هەبوو، بە پێچەوانەی چێڵسییەوە كە لە هەردوو یاریدا 3 هەلی هەبوو و توانی 3 گۆڵ تۆمار بكات.
ئینێستا گوتی ئێمە بەرشەلۆنەین و نوێنەرایەتی زۆر شت دەكەین، هەوڵی بردنەوەی ئەو یارییانەمان دەدەین كە لە خولی ئیسپانی ماومانە، بە هەموو شێوەیەك خۆمان بۆ یاری كۆتایی جامی شا بەرامبەر ئەتلەتیك بلباو ئامادە دەكەین.