دیڤید بێكهامی ئەستێرەی پێشووی مانچستەر یونایتد و ریال مەدرید سەرووی لیستی پڕ داهاتترین یاریزانانی تۆپی پێی لە جیهاندا گرت.
بەپێی دوا پۆلێنكاری گۆڤاری فۆربسی ئەمەریكی، لە ساڵی رابردوودا بێكهامی 36 ساڵ كە ئێستا یاری بۆ یانەی لۆس ئەنجلۆس گالاكسی ئەمەریكی دەكات، بڕی 46 ملیۆن دۆلاری لە مووچە و پاداشت و گرێبەستی رێكلامدا بەدەست هێناوە.
لە پلەی دووەمدا كریستیانۆ رۆناڵدۆی ئەستێرەی یانەی ریال مەدرید دێت كە لە ماوەی ساڵی رابردوودا 42 ملیۆن دۆلاری بەدەست هێناوە و دوای ئەویش لیۆنێل میسی ئەرجەنتینی دێت كە داهاتەكەی 39 ملیۆن دۆلار بووە و لە دوای ئەو واین روونی لە مانچستەر یونایتد و ریكاردۆ كاكای بەرازیلی دێن.
لیستەكە بەم شێوەیەیە: بێكهام 46 ملیۆن دۆلار، رۆناڵدۆ 42 ملیۆن دۆلار، میسی 39 ملیۆن دۆلار، واین روونی 24 ملیۆن دۆلار، كاكا 21 ملیۆن دۆلار، جۆن تێری 18 ملیۆن دۆلار، یایا تۆرێ 18 ملیۆن دۆلار، فرناندۆ تۆرێس 17 ملیۆن دۆلار، فرانك لامپارد 16 ملیۆن دۆلار، ستیڤن جیرارد 16 ملیۆن دۆلار.