رافایل نادالی ئیسپانی دووەمی ریزبەندی تێنسزانانی جیهان، توانی گرێی بەختی خۆی لە بەرامبەر نۆڤاك جۆكۆڤیجی سربیدا بكاتەوە و لێی بباتەوە.
دوێنێ شەو لە یاری كۆتایی پاڵەوانیەتیی مۆنتی كارلۆی كراوەدا نادال توانی لە جۆكۆڤیجی یەكەمی تێنسزانانی جیهان بباتەوە و بەوەش كۆتایی بە نزیكەی ساڵێك لە دۆڕانی بەردەوام بەرامبەر ئەو یاریزانە بێنێت كە لە یاری كۆتایی پاڵەوانیەتیی ئوسترالیای كراوەی وەرزی رابردووەوە دەستی پێكرد.
نادال سەلماندی كە ئەو شای یاریگا خۆڵییەكانە دوای ئەوەی توانی یارییەكە لە جۆكۆڤیج بە دوو كۆمەڵەی بێبەرامبەر 6-3 و 6-1 بباتەوە لە یارییەكدا كە كاژێرێك و 19 خولەكی خایاند و ئەوەش هەشتەمین جارە ماتادۆرە ئیسپانییەكە لەسەر یەك نازناوی ئەو پاڵەوانیەتییە دەباتەوە و بەوەش گەیشتە ژمارەیەكی پێوانەیی ئەو پاڵەوانیەتییە و شكاندنی ئاسان نابێت.
بە درێژایی ساڵی رابردوو نادال دووچاری كێشەیەكی زۆر هات لە بەرامبەر جۆكۆڤیجدا كە توانی پلەی یەكەمی ریزبەندی یاریزانانی تێنسی لێوەربگرێت.