دوای دۆڕانی یاری كلاسیكۆ بەرامبەر ریال مەدرید و دووركەوتنەوەی ئەو یانەیە بە 7 خاڵ و نزیكبوونەوەی ریال مەدرید لە نازناوی وەرزی ئەمساڵی خولی ئیسپانی، هاندەران پێشبینی كۆتایی هاتنی سەردەمی زێڕینی یانەی بەرشەلۆنە دەكەن.
شەمەی رابردوو بەرشەلۆنە لە نێو یاریگای خۆیدا بە ریال مەدرید دۆڕا 2-1 و بەوەش ئومێدێكی زۆر كەمی بە بردنەوەی نازناوی وەرزی ئەمساڵی خولی لیگا ماوە.
رۆژنامەی ماركای ئیسپانی راپرسییەكی لە نێو خوێنەرانیدا كردووە لەبارەی ئەوەی ئایا ئەنجامی كلاسیكۆ كاریگەری لەسەر ئەنجامی یاری یانەكە بەرامبەر چێڵسی لە خولی یانە پاڵەوانەكانی ئەوروپا دەبێت یان نا؟
لە راپرسییەكەدا 200 هەزار كەس بەشدارییان كردووە و 70 لەسەدی ئەوانەی رای خۆیان لەو بارەیەوە داوە پێشبینی دەكەن كە بەرشەلۆنە لەسەر دەستی چێڵسی لە خولی یانە پاڵەوانەكانی ئەوروپا بكرێتە دەرەوە.
بەرشەلۆنە یاری چوونی 1-0 دۆڕاندووە و ئەم چوارشەمەیە لە نێو یاریگای خۆیدا رووبەڕووی چێڵسی دەبێتەوە.
دۆڕاندنی 2 یاری لەسەر یەك فشارێكی زۆری لەسەر بەرشەلۆنە دروستكردووە.