هەرچەندە هاوینی رابردوو بڕی 30 ملیۆن یۆرۆی پێدراوە، بەڵام فابیۆ كۆینتراوی یاریزانی یانەی ریال مەدریدی ئیسپانی بووەتە سەرەخۆرە و سەرئێشەیەكی زۆر بۆ یانەكەی.
كۆینتراو لە یاری شەوی پێشووی یانەی ریال مەدرید وەك یاریزانی سەرەكی یاری كرد لەو یارییەدا كە یانەكەی بەرامبەر بایرن میونشنی ئەڵمانی لە خولی یانە پاڵەوانەكانی ئەوروپا دۆڕاندی 2-1.
رۆژنامەی ئاسی ئیسپانی لە راپۆرتێكدا ئاماژەی بەوەداوە كە هەرچەند كۆینتراو یاریزانی سەرەكی بێت لە پێكهاتەی یانەكەیدا، ئەو یانەیە دووچاری دۆڕان دەبێت و وەك رۆژنامەكە دەڵێ ئەمە لە هەر 5 دۆڕانەكەی ئەمساڵی ریال مەدریدا رووی داوە.
راپۆرتەكە دەڵێ لە 3 یاری بەرامبەر بەرشەلۆنەدا لە لیگا و جام و سوپەری ئیسپانیدا كۆینتراو یاریزانی سەرەكی بووە و ریال مەدرید هەر سێ یارییەكەی دۆڕاندووە، هەروەها لە بەرامبەر لیڤانتی و بایرنیش یاریزانی سەرەكی بووە و یانەكەی ئەو دوو یارییەشی دۆڕاندووە.
راپۆرتەكە دەڵێ لە یارییە گەورەكاندا مۆرینۆ زیاتر پشت بە كۆینتراو دەبەستێت لە شوێنی مارسیلۆ و فابیۆ لە 11 یاری گەورەدا بەشداری كردووە و مارسیلۆ تەنیا لە 5 یاری گەورەدا یاری كردووە.