یانەی شالكەی ئەڵمانی ئاشكرای كرد كلاس یان هۆنتلاری هێرشبەری هۆڵەندی یانەكە ژمارەی پێوانەیی گۆڵكەرانی تیپەكەی لە یەك وەرزدا شكاند كە ماوەی 71 ساڵە نەشكنێراوە، ئەمەش لە یاری یانەكە بەرامبەر یانەی هانۆڤەرلە سەرەتای ئەم هەفتەیەدا كە 3-0 تەواو بوو.
هۆنتلاری یاریزانی پێشووی ریال مەردیدی ئیسپانی ژمارەی گۆڵەكانی لە وەرزی ئەمساڵدا لەگەڵ یانەی شالكە بۆ 43 گۆڵ بەرزكردەوە لە 42 یاریدا دوای ئەو گۆڵەی لە خولەكی 63 لە یارییەكەی هانۆڤەردا تۆماری كرد و بەوەش هۆنتلار بە گۆڵێك پێش هێرمان ئابینهۆڤ كەوت كە لە وەرزی 1941-1942 توانی لە یەك وەرزدا 42 گۆڵ تۆمار بكات.
هۆنتلار كە ئەستێرەیەكی درەوشاوەی هەڵبژاردەی هۆڵەنداشە، لە وەرزی ئەمساڵدا تا ئێستا 24 گۆڵی بۆ یانەی شالكە لە خولی ئەڵمانیدا تۆمار كردووە و تەنیا یەك گۆڵ لە پاش ماریۆ گۆمێزی هێرشبەری بایرن میونشنەوە دێت كە 25 گۆڵی هەیە و پێشەنگی گۆڵكەرانی خولەكەیە.