تۆماس مۆلەری هێرشبەری یانەی بایرن میونشنی ئەڵمانی دووپاتی كردەوە كە یاری نێوان یانەكەی و یانەی برووسیا دۆرتمۆندی پێشەنگی خولی ئەڵمانی، چارەنووسی وەرزی ئەمساڵی نازناوەكە یەكلادەكاتەوە.
هەردوو یانە هەفتەی داهاتوو لەسەر یاریگای سیگناڵ ئیدۆنا پارك بەیەك دەگەن.
دوای ئەوەی یاریزانانی بایرن میونشن دیارییەكانی یانەی شتوتگارتیان وەرگرت كاتێك لەگەڵ برووسیا دۆرتمۆند یەكسان بوو و توانییان جیاوازی خاڵەكانیان لەگەڵ ئەو یانەیە بۆ 3 خاڵ كەم بكەنەوە، تۆماس مۆلەر گوتی بایرن دەتوانێ نازناوەكە بباتەوە ئەگەر لە یارییە چارەنووسسازەكەی بەرامبەر دۆرتمۆنددا سەركەوتن بەدەست بێنێت.
مۆلەر گوتی دوای چەند رۆژێكی تر یارییەكی چارەنووسساز لەسەر نازناوەكە بەرامبەر دۆرتمۆند دەكەین، لە چەند ساڵی رابردوودا خۆمان لەسەر ئەوە راهێناوە ئەگەر یارییەكی چارەنووسسازمان هەبێت، هیچ رێگرییەك لە بەردەمی خۆماندا نابینینەوە بۆ بردنەوەی یارییەكە و ئەمساڵیش هەوڵ دەدەین 3 نازناو ببەینەوە.
مۆلەر هەروەها گوتی بردنەوە لە دۆرتمۆند زیاتر لە خەونی 3 نازناوەكەی ئەمساڵمان نزیك دەكاتەوە، لەبەرئەوە بە هیچ شێوەیەك كەمتەرخەمی بۆ ئەو یارییە ناكەین.