جیرڤینیۆی ئەستێرەی هێرشبەری یانەی ئەرسناڵی ئینگلیزی ئاشكرای كرد درەوشانەوەی ئاستی لە ماوەی رابردوودا بۆ تێگەیشتنی زیاتر لە شێوازی یاریكردنی یانەی ئەرسناڵ دەگەڕێتەوە.
جیرڤینیۆی كامیرۆنی گوتی زۆر دڵخۆشم لە ئەرسناڵ و ئەو ئاستەی پێشكەشی دەكەم، بە تایبەت دوای ئەوەی لە جامی نەتەوەكانی ئەفەریقای 2012 گەڕامەوە و تا ئەوكات پێویستیم بە كاتی زیاتر هەبوو بۆ گونجان لەگەڵ كەشی لەندەن و شێوازی یاریكردنی یانەكەدا.
یاریزانە نێودەوڵەتییەكە لە لێدوانی بۆ ماڵپەری ئەرسناڵ روونی كردەوە كە لە دوای گەڕانەوەی لە جامی ئەفەریقا قسەی لەگەڵ راهێنەری یانەكەدا كردووە و ئەو زانیویەتی كە پێویستی بە پشوو هەیە چونكە ماندووە و ئێستا دۆخێكی نموونەیی و نایابی هەیە.
هەروەها گوتی دەمەوێ لە كۆتایی وەرزی ئەمساڵدا لە دۆخێكی باشدا بم و ببمە یاریزانێكی سەرەكی تیپەكە و یانەكە بگەیەنینە دۆخێكی زۆر باش لە ریزبەندی خولەكەدا.
هەروەها گوتی بەڵێن بە جەماوەری یانەكە دەدەم كە هەموو شتێك بكەم بۆ یارمەتیدانی تیپەكە و سەرخستنی و گەیاندنی بە یەك لە 3 پلەكەی یەكەمی ریزبەندی.