سەرچاوە رۆژنامەوانییەكان ئاشكرایان كرد یانەی بەرشەلۆنەی ئیسپانی ئامادەیە بڕی 42 ملیۆن یۆرۆ بۆ گرێبەستكردن لەگەڵ داڤید لویسی بەرگریكەری یانەی چێڵسی بدات.
رۆژنامەی ئاسی ئیسپانی ئاشكرای كرد لویس رازی دەبێت بە چوونە یانەی بەرشەلۆنە ئەگەر یانەی چێڵسی لە وەرزی داهاتوودا نەگاتە خولی یانە پاڵەوانەكانی ئەوروپا و ئێستا چێڵسی 5 خاڵ لە دوا پلەی سەركەوتن بۆ خولی یانە پاڵەوانەكانی ئەوروپاوە دوورە.
یانەی بەرشەلۆنە دەیەوێ ریزی بەرگری خۆی بەهێز بكات لە ماوەی داهاتوودا، ئەمەش دوای دەستهەڵگرتنی لە ماكسویلی بەرگریكەری بەرازیلی و دووركەوتنەوەی ئیریك ئەبیدال بۆ ماوەیەك لە یاریكردن بەهۆی چاندنی گورچیلەوە و دابەزینی ئاستی جیرارد پیكێی بەرگریكەری یانەكە.
دیڤید لویس دەچێتە پاڵ تیاگۆ سیلڤای بەرگریكەری بەرازیلی كە یانەی بەرشەلۆنە هەوڵی كڕینیان دەدات لە هاوینی داهاتوودا و سەرچاوەكان دەڵێن تیاگۆ بڕی 32 ملیۆن یۆرۆ لەسەر بەرشەلۆنە دەكەوێت.