رۆژنامەی ئای بی سی ئیسپانی ئاشكرای كرد ئیریك ئەبیدالی بەرگریكەری یانەی بەرشەلۆنەی ئیسپانی لە چەند رۆژی داهاتوودا نەشتەرگەرییەكی گورچیلە دەكات، دوای ئەوەی یەكێك لە هاوڕێكانی سەردەمی منداڵی رازی بوو گورچیلەی خۆی بەو یاریزانە ببەخشێت.
رۆژنامەكە ئاشكرای كرد ئەبیدال دەمێك بوو پێویستی بە نەشتەرگەری هەبوو و كاتێك هاوڕێكەی بڕیاری دا گورچیلەی خۆی پێ ببەخشێت، بڕیاری دا نەشتەرگەری بكات و پێدەچێ ئەو نەشتەرگەرییە بەر لە كۆتایی ئەم مانگە ئەنجام بدرێت و ماوەی نەشتەرگەرییەكە تەنیا رادەوەستێت لەسەر ئەوەی رێوشوێنی گواستنەوەی گورچیلەكە چەندی دەوێت.
رۆژنامەكە دووپاتی كردووەتەوە كە هاوڕێكەی ئەبیدال هەمان گرووپی خوێنی ئەبیدالی هەیە و لە رووی جەستەییشەوە زۆر لە تواناكانی ئەوەوە نزیكە و ئەوەش یارمەتیدەرە بۆ كارەكە و لە بەرامبەردا دەسەڵاتدارانی فەرەنسا دەیانەوێ لە رێگەی لێكۆڵینەوەوە دڵنیابن لەوەی كە هاوڕێ گورچیلە بەخشەكە ئەو كارەی تەنیا وەك كارێكی مرۆڤانە كردووە و قازانجی ماڵی و دارایی لە رێگەی بەخشینی ئەو گورچیلەیەوە دەست ناكەوێت.