یەكێتیی تۆپی پێی ئیسپانیا ئاشكرای كرد یاری كۆتایی جامی شای ئیسپانیا لە نێوان هەردوو یانەی بەرشەلۆنە و ئەتلەتیك بلباو لە شاری مەدرید دەبێت، بەڵام لە یاریگای ڤیسنتی كالدیرۆن نەك یاریگای سانتیاگۆ برنابیۆی تایبەت بە یانەی ریال مەدرید.
یارییەكە 25ی مانگی ئایاری داهاتوو ئەنجام دەدرێت و یەكێتییەكە لە كۆبوونەوەی دوێنێی خۆیدا شوێنی ئەنجامدانی یارییەكەی یەكلا كردەوە.
دوای رەتكردنەوەی یانەی ریال مەدرید لە میوانداریكردنی ئەو یارییە، بەرپرسانی هەردوو یانەی بەشداری لە یارییەكە بۆچونی جیاوازیان هەبوو و یانەی بەرشەلۆنە داوای دەكرد لەسەر یاریگای ڤیسنتی كالدیرۆن بێت و بەرپرسانی ئەتلەتیك بلباویش یاریگای لاكارتوخایان لە شاری سڤیلیە بۆ ئەو یارییە دەست نیشانكردبوو.
سیزیری ئەنرۆیكۆی سەرۆكی یانەی ئەتلەتیكۆ مەدرید بۆخۆی داوای لە بەرپرسانی هەردوو یانە و یەكێتیی تۆپی پێی ئیسپانی كرد یاریگای یانەكەی بۆ ئەنجامدانی ئەو یارییە دەست نیشان بكەن.