خافێر پاستۆری ئەستێرەی ناوەڕاستی یانەی پاریس سانجێرمانی فەرەنسی هیوای خواست گۆنزالۆ هیگواینی هێرشبەری ئەرجەنتینی پەیوەندی بە یانەكەی ئەوەوە بكات.
پاستۆری كە هاوینی رابردوو بە 42 ملیۆن یۆرۆ لە پالێرمۆی ئیتاڵییەوە پەیوەندی بە یانەی پاریس سانجێرمانەوە كرد گوتی ئەگەر بەدەست من بێت هەر ئێستا هیگواین دەهێنمە پاریس.
ئەو یاریزانە سەرسامی خۆی بە تواناكانی هیگواینی هێرشبەری ریال مەدریدی ئیسپانی دەربڕی و گوتی هیوادارم هیگواین بێتە تیپەكەمانەوە، ئەو یاریزانێكی زۆر گرنگە بۆ ئێمە و ئەگەر بێت جیاوازییەكی گەورە لە تیپەكەدا دروست دەكات.
هەروەها گوتی پەیوەندییەكی بەهێزم لەگەڵیدا هەیە، بەڵام لەوبارەیەوە قسەم لەگەڵدا نەكردووە، چونكە ئەو لە تیپێكی گەورەی وەك ریال مەدرید یاری دەكات.
لێدوانی پاستۆری لە نێو دەنگۆی زۆری رۆژنامەكانی ئەوروپادا دێت كە دووپاتی ئەوە دەكەنەوە پاریس سانجێرمان هاوینی داهاتوو هیگواین و كاكا لە ریال مەدرید دەكڕێت.