لە یارییەكی تۆپی پێدا لە سۆماڵ، تەقینەوەیەك بووە هۆی كوژرانی 2 كەس و برینداربوونی 5ی تر
شایەتحاڵەكان بە سەرچاوە رۆژنامەوانییەكانیان راگەیاند تەقینەوەكە لە كاتێكدا رووی داوە كە یاریی كۆتایی پاڵەوانیەتییەكی ناوخۆیی لەسەر ئەو یاریگایە ئەنجام دەدرا و ژمارەیەكی بەرچاوی هاندەران ئامادەی یارییەكە بوون،
عەبدوڵا باری یەك لە ئەفسەرانی پۆلیسی مەقەدیشۆ گوتی تەقینەوەكە بووەتە هۆی كوژرانی 2 گەنج و برینداربوونی 5 كەسی تر كە ئەوانیش گەنج و منداڵن.
بەپێی سەرچاوە رۆژنامەوانییەكانی سۆماڵ بۆمبەكە لە نێو تابلۆیەكی رێكلامدا لە یاریگای میناشیبیۆ دانرابووەوە.
پۆلیس لێكۆڵینەوەی لە رووداوەكە دەست پێكردووە، بەڵام هیچ لایەنێك بەرپرسیاریەتی خۆی رانەگەیاندووە.
سۆماڵ وڵاتێكی بێ ئاسایشە و كێشە و شەڕێكی قورس لە نێوان حكوومەتی ئەو وڵاتە و چەكدارە ئیسلامییەكان بەخۆیەوە دەبینێت كە دەیانەوێ حكوومەتێكی سەلەفی لەو وڵاتەدا دروست بكەن.
