لە چوارچێوەی یارییەکانی هەفتەی 18یەمی قۆناغی یەکەمی خولی بژاردەی عێراق بۆ تۆپی پێی، رۆژی سێشەممە لە یاریگەی فرەنسۆ هەریری لە شاری هەولێر کاتژمێر 4.30 خولەکی ئێوارە یانەی هەولێر میوانداری یانەی حەدود دەکات.
ئەم یارییە هەریەکە لە ناوبژیوانان سەباح عەبود ناوبژیوانی ناوەڕاست و یوسف عومران یاریدەدەری یەکەم و سەمیر یوخنا یاریدەدەری دووەم و ناجی حەسەن ناوبژیوانی چوارەم یارییەکە بەرێوە دەبن و سوبحی رەحیم سەرپەرشتیاری ناوبژیوانانە و ئیبراهیم قاسم سەرپەرشتیاری یارییە.
لەم یارییە یانەی هەولێر بە بێ پێنج یاریزانی سەرەکی یاری ناکات، کاتێک هەریەکە لە یاریزانان لوئەی سەڵاح و مەهدی کەریم و سەعد عەبدولئەمیر و ئەحمەد ئیبراهیم بەهۆی پەیوەندی کردنیان بە ریزی هەڵبژاردەی عێراق بەشداری لەم یارییە ناکەن و یاریزان هەڵگورد مەلا محەمەد بەهۆی پێکان ناتوانێت بەشداری لەم یارییە بکات.
یانەی هەولێر لە خولی بژاردەی عێراق لە پلەی یەکەم دێت بە کۆکردنەوەی 39 خاڵ و یانەی حەدود بە کۆکردنەوەی 7 خاڵ لە ریزبەندی کۆتایی خولەکە دێت.
جێگەی باسە هاتنە ژوورەوە بۆ جەماوەر بە خۆراییە.
رێبین رەمزی – راگەیاندنی یانەی هەولێر