پێلێی ئەفسانەی تۆپی پێی بەرازیلی گوتی من لە پێناوی تۆپی پێدا دروست بووم، وەك چۆن بتهۆڤن بۆ مۆزیك دروست بووە.
پێلێ لە چاوپێكەوتنی ماڵپەری فیفادا گوتی باوكم هەردەم پێی دەگوتم من بۆ تۆپی پێ لەدایكبووم و بەهرەیەكی راستەقینەم هەیە، بەڵام ئەو بەهرەیە تەنیا بە مەشق و كاری بەردەوام دەردەكەوێت، باوكم راستی دەكرد.
پێلێ رەتی كردەوە ئەو نەوەیەی ئێستای یانەی بەرشەلۆنەی ئیسپانی بە باشترین تیپی مێژوو دابنرێت و گوتی ئەوان ئێستا لە سەردەمی زێڕینی خۆیاندا دەژین، بەڵام پێشتر یانەكانی سانتۆسی بەرازیلی و بەنفیكای پورتوگالی و ئەیاكسی هۆڵەندی و ریال مەدریدی ئیسپانی و میلانی ئیتاڵیش هەمان سەردەمی زێڕینی خۆیان هەبووە كە بوونەتە جێگەی سەرنجی هەموو جیهان و نازناوەكانیان بردووەتەوە.
هەروەها گوتی سەركەوتنی یانەكان رەنگدانەوەی لەسەر ئاستی هەڵبژاردەكانیش دەبێت، ئەوەی هەڵبژاردەی ئیسپانیا دەیكات رەنگدانەوەی ئاستی بەرشەلۆنەیە و پێشتر ئاستی ئایندهۆڤنیش رەنگدانەوەی لەسەر هەڵبژاردەی هۆڵەندا هەبوو، بۆ یانەی سانتۆس و هەڵبژاردەی بەرازیلیس هەمان شت راستە.
ئەفسانە بەرازیلییەكە گوتی هەڵبژاردەی بەرازیل توانای ئەوەی هەیە نازناوی مۆندیالی 2014 لە نێو خاك و جەماوەری خۆیدا بەدەست بێنێت، بەو مەرجەی بگاتە ئاستی پاڵەوانیەتییەكە.