یانەی چێڵسی بەفەرمی ڕایگەیاند بۆندێكی لەگەڵ یاریزانی هێڵی بەرگری هەڵبژاردەی ئینگلتەرا و یانەی بۆلتن واندەرز گاری كاهیل مۆر كردووە دوای 16 ڕۆژ وتووێژكردن لەنێوان هەردوو یانە، ماڵپەڕی فەرمی یانەی چێڵسی سەركەوتوویی مۆركردنی بۆندەكەی ڕاگەیاند بەرامبەر بە7 ملیۆن پاوەند دوای ئەوەی یاریزانی ناوبراو پشكنینی پزیشكی ئەنجامدا.
یاریزان كاهیل ژمارە 24ی وەرگرت و دواتر لەلێدوانێكیدا بۆ ماڵپەری فەرمی یانەی چێڵسی گوتی: چێڵسی تیپێكی گەورەیە و هەردەم بۆ بەدەستهێنانی نازناوەكان هەوڵ دەدات كە ئەوەش ئاوات و ئامانجی منە لەیاریكردن بۆ یانەی بلوز، هەلێكی زێڕینم لەپێشە بۆ ئەوەی ببم بەبەشێك لەمێژووی یانەی چێڵسی. جێگای ئاماژە پێكردنە كاهیل 130 یاری بۆ یانەی بۆلتن ئەنجام داوە و 10 گۆڵی بۆ یانەی ناوبراو تۆمار كردووە.