یانەی بەرشلۆنە بەفەرمی ڕایگەیاند یاریزانی هەڵبژاردەی فەرەنسا ئەریك ئەبیدال بۆندەكەی بۆ ماوەی یەك ساڵ لەگەڵ یانەی بلوگرانا تازە كردەوە لەگەڵ ئەگەری درێژكردنەوەی بۆندەكەی بۆ ماوەی ساڵێكی دیكە، ماڵپەڕی یانەی بەرشلۆنە دووپاتیكردەوە كە یانەكەی هەرێمی كەتالۆنیا لەدوای ئەم دوو ساڵە مافی ئەوەی هەیە بۆ ساڵی سێیەم درێژە بەبۆندەكەی ئەبیدال بدات، ئەوەش مانای ئەوەیە كە ئەبیدال دەتوانێت تا ساڵ2015 یاری بۆ یانەی بەرشلۆنە بكات.
بەتازەكردنەوەی بۆندی ئەبیدال یانەی بەرشلۆنە ڕێگای لەهەموو یانەكانی ئەوروپا گرت كە چاویان لەسەر ئەم یاریزانە دانابوو بەتایبەتی كە ئەبیدال بۆندەكەی لەكۆتایی ئەم وەرزە تەواو دەبوو ئەو كات دەیتوانی بەخۆڕایی بۆند لەگەڵ هەر یانەیەك مۆر بكات.
شایانی باسە یاریزان ئەبیدال لەساڵی 2007 هاتە ڕیزی یانەی بەرشلۆنە لەیانەی لیۆنی فەرنسییەوە و لەساڵی ڕابردوو تووشی شێرپەنجەی جگەر هات و دواتر چارسەر كرا و گەڕایەوە یاریكردن و لەیاری كۆتایی خولی یانەكانی ئەوروپا 2011 لەنێوان بەرشلۆنە و مان یونایتد وەك ڕێزلێنانێك یانەی بەرشلۆنە وەك كاپتنی تیپ دەست نیشانی كرد و جامی چامپیۆنز لیگی بەرزكردەوە.