ئارسن ڤینگەر ڕاهێنەری یانەی ئەرسنال داوای لەیاریزانەكانی كرد لەخەو بەئاگا بێن و لەیارییەكانی داهاتوویان سەركەوتن تۆمار بكەن، بەتایبەتی دوای دوو دۆڕاندن بەرامبەر یانەكانی فولهام بەئەنجامی (2-1)گۆڵ و بەرامبەر سوانزی سیتی بەئەنجامی (3-2) گۆڵ، بەم دوو دۆڕاندنە هەلی یانەی ئەرسنال لەململانێ لەسەر نازناوی پریمەر لیگ هەروەها زامنكردنی پلەیەك بۆ بەشداریكردن لەخولی یانەكانی ئەوروپا لەوەرزی داهاتوو یەكجار كەم بۆوە، ڤینگەر لەلێدوانێكیدا بۆ ماڵپەری یانەی ئەرسنال گوتی: دۆڕاندنی دوو یاری لەسەریەك كارێكی باش نەبوو بەتایبەتی كە ئێمە لەهەردوو یاری لەپێشەوە بووین، بەڵام بێباكی یاریزانان وایكرد 6 خاڵ لەدەست بدەین، پێویستە یاریزانەكان بەئاگابێنەوە بۆ گەڕانەوە بۆ ڕێڕەوی سەركەوتنەكان بەتایبەتی لەگەڵ یانە گەورەكان. ڤینگەر ئەوەشی ڕاگەیاند كە هێشتا هەل لەپێش یانەی ئەرسنالە بۆئەوەی ململانێ لەسەر پلەكانی پێشەوە بكات ئەگەر نازناوەكەش نەبێت، شایانی باسە یانەی ئەرسنال تا ئێستا 7 یاری دۆڕاوە ئەوەش ڕێژەیەكی یەكجار بەرزە بە بەراورد كردن لەگەڵ وەرزەكانی پێشوودا.