بەشداری نەكردنی لویس نانی لە یاری داهاتووی یانەكەی بەرامبەر لیڤەرپوول لە قۆناخی چواری جامی یەكێتیی ئینگلتەرا یەكلابووەوە دوای ئەوەی پزیشكەكانی یانەكە ئاشكرایان كرد نانی توانای بەشداری لە یاری داهاتوودا نییە بەهۆی ئەو پێكانەی لە یاری یانەكەی بەرامبەر ئەرسناڵ دووچاری هات.
سەرچاوەكان گوتیان لانی كەم نانی 2 هەفتە یاری ناكات و ئەگەر هەیە ماوەی دابڕانەكەی درێژتریش ببێتەوە.
لەلایەكی ترەوە گومان هەیە لەوەی ریۆ فێردیناندی بەرگریكەری قاڵی یانەكە بتوانێ بەشداری یاری داهاتوو بكات بەهۆی بوونی پێكان لە پشتیدا، ئەمە هەمان كێشەیە كە مایكڵ كاریكیكیش بەدەستییەوە دەناڵێنێت و واین روونی هێرشبەریش لە ئەژنۆیدا كێشەی هەیە و هەست بە ئازار دەكات.
هەرچی هەواڵی خۆشە بۆ هاندەرانی مانچستەر بریتییە لە ئەگەری یاریكردنی فیل جۆنزی بەرگریكەری یانەكە كە بە هەمان شێوە لە بەرامبەر ئەرسناڵ هەستی بە ئازار دەكرد، بەڵام دوایی روون بوەوە كە دەتوانێ بەشداری یاری داهاتووی یانەكەی بكات.