16ی تشرینی یەكەم/ ئۆكتۆبەر (گوڵان میدیا)- ئه‌مرِۆ شاندێكی رێكخراوی (ئینگڵش یوو كه‌ی) به‌هاورِییه‌تی نوێنه‌ری ( 15 ) زانكۆی به‌ریتانی سه‌ردانی وه‌زاره‌تی خوێندنی باڵاو توێژینه‌وه‌ی زانستی حكومه‌تی هه‌رێمی كوردستانیان كرد. له‌كۆبونه‌وه‌یه‌كدا تاوتوێ بارودۆخی خوێندنی باڵاو به‌رنامه‌ی توانسازی و ئاستی زمانی ئینگلیزی له‌كوردستان كرا، بۆ ئه‌م به‌سته‌ش د. عه‌لی سه‌عید وه‌زیری خوێندنی باڵاو توێژینه‌وه‌ی زانستی كورته‌یه‌كی له‌باره‌ی كارنامه‌ی حكومه‌ت و وه‌زاره‌ته‌كه‌ی سه‌باره‌ت به‌ چۆنێتی په‌ره‌پێدانی خوێندنی باڵاو گه‌شه‌پێدانی توانا مرۆییه‌كان و زمانی ئینگلیزی خسته‌روو، پاشان له‌نێوان وه‌زیری خوێندنی باڵاو شانده‌كه‌ رێكه‌وتننامه‌یه‌كی لێكگه‌یشتنی له‌گه‌ڵ (TONY MILLNS) سه‌رۆكی رِێكخراوی (ئینگڵش یوو كه‌ی) به‌ریتانی ئیمزا كرا.
خوێندنی باڵاو توێژینه‌وه‌ی زانستی راگه‌یاند: رِێكخراوی (ئینگڵش یوو كه‌ی) گه‌وره‌ترین رِێكخراوه‌ له‌سه‌ر ئاستی جیهان، كه‌ له‌ (460) زانكۆ و سه‌نته‌ری زمان پێك هاتووه‌، ئاشكراشیكرد به‌پێی ئه‌و گرێبه‌سته‌ رێكخراوه‌كه‌ هه‌ماهه‌نگی و پشتگیری وه‌زاره‌تی خوێندنی باڵاو توێژینه‌وه‌ی زانستی حكومه‌تی هه‌رێمی كوردستان ده‌كات بۆ دابینكردنی كۆرسی زمان، به‌تایبه‌ت بۆ كاندیداكانی به‌رنامه‌ی تواناسازی، د.عه‌لی سه‌عید جه‌ختی له‌سه‌ر ئه‌وه‌ش كرده‌وه‌ كه‌ ئیمزاكردنی ئه‌و رِێكه‌وتننامه‌یه‌ ده‌بێته‌ ده‌سكه‌وتێكی دیكه‌ی وه‌زاره‌تی خوێندنی باڵاو توێژینه‌وه‌ی زانستی بۆ كاندیداكانی به‌رنامه‌ی تواناسازی و ده‌چێته‌ پاڵ ئه‌و خزمه‌تانه‌ی دیكه‌ی وه‌زاره‌ت كه‌ له‌ ماوه‌ی رِابردوو پێشكه‌شی ئه‌و كاندیدانه‌ی كردوه‌ و ده‌كات.