Gates: Amerîka bi çavekî dostane berê xwe dide Herêma Kurdistanê
Di civînekê de Wezîrê Parastinê yê Amerîka Robert Gates, spasiya rol û serkirdayetiya Serok Barzanî di pêkanîna hikûmeta Îraqê de kir û piştgîriya xwe bo biserxistina prosesa siyasî ya Iraqê û dagirtina postên vala yên wezaretên ewlekarîyê pêşan da.
Ji aliyekî din ve peywendiyên Iraqê û Amerîka yên piştî vekişîna hêzên Emerîka bi giştî û peywendiyên Amerîka û Herêma Kurdistanê bi taybetî hatin gotûbêjkirin û di vê derbarê de Gates careke din tekez kir ku Amerîka bi wan hemû peyamanan ve girêdayî ye ku ligel Iraqê îmze kiriye.
Derbarê peywendiyên li gel Herêma Kurdistanê jî Robert Gates got: ''Peywendiyên me peywendiyên dostane ne û Amerîka bi çavekî dostane berê xwe dide Herêma Kurdistanê. Di çarçoveya İraqeke federal û demokratîk de, peywendiyeke taybet herdû alî bi hev ve girêdane û emê li ser bipêşxistina wan peywendiyan jî berdewam bin.''
Serokê Herêma Kurdistanê Mesûd Barzanî jî spasiyên xwe û gelê Kurdistanê pêşkêşî Amerîka kirin bo wan qurbaniyên ku di rizgarkirina gelên Iraqê de ji dîktatoriyetê dane. Barzanî bal kişand ser peyvendiyên Hikûmeta Herêma Kurdistanê û Hikûmeta Federal û tekez kir, hikûmeta herêmê bi wan hemû peymanan ve girêdayî ye ku ligel hikûmeta federal îmze kiriye.
Derbarê pirsên hilawestî yên di navbera Bexda û Hewlêrê de jî Barzanî diyar kir ku heta niha hinek pirsgirêk bêyî bên çareser kirin di navbera herdû aliyan de mane wek: pirsa encamdana serjimêriya giştî, madeya 140ê ya Destûra Iraqê, bûdçeya Hêzên Pêşmerge û yasaya petrol û gazê ku pêwîst e di çarçoweya destûra bingehîn ya Iraqê de bên çareser kirin.
Li ser dosya deverên veqetiyayî yên Kurdistanê jî Barzanî keyfxweşiya xwe li hember parastina rewşa îro ku ji aliyê hêzên hevbeş ên Pêşmerge, Artêşa Iraqê û Hêzên Emerîka ve tê parastin anî ziman û wiha axifî: ''Damezrandina hêzeke hevbeş li wan deveran dibe sedemeke girîng ji bo baştirbûna rewşa ewlekariya wan deveran.''
Di heman civînê de Serokê Herêma Kurdistanê Mesûd Barzanî behsa serdana vê dawiyê ya Serokwezîrê Tirkiyê Recep Tayyîp Erdogan bo Herêma Kurdistanê kir û da xwiyakirin ku ew serdan dibe sedema pêşdeçûna peywendiyên navbera Herêma Kurdistan û Tirkiyê.
Barzanî, herwiha li ser rewşa navxwe ya İraqê jî rawestiya û got: ''Ligel hinek metirsiyan jî, İraq ber bi demokratîkbûnê ve diçe û pêngavên cidî jî bo çespandina sîstema demokratîk avêtine. Hîç tehdîdeke stratejîk li ser sîstema demokratîk li İraqê nîne, herçiqas hinek pirsgirêkên siyasî hene, lê belê bo aramiyê nabin tehdît û îradeyeke bihêz a çarserkirina wan heye.''
Rûdaw
