Di bin çavdêriya serokê hikûmeta herêma kurdistanê de û bi amadebûna çend wezîr û berpirsên hikûmetê, konferensa sala gazê û petrolê li hotela Rotana ya li bajêrê Hewlêrê hat sazdan. Serokê dîwana serokatiya herêma kurdistanê Fu`ad Huseyn û wezîrê samanên suriştiyên herêma kurdistanê Aştî Hewramî jî amade bûn.

Di vê konferensê de ya ku doh hat sazdan, serokê hikûmeta herêma kurdistanê Berhem Salih gotarek pêşkêş kir û tê de, behsa pêşkevtina biwarê samanên gazê û petrolê kir.

Serokê hikûmeta herêma kurdistanê daxwaz ji kompanyayên biyanî kir, ku ew çalakiyên xwe yên di biwarê gazê û petrolê de li herêma kurdistanê geştir û xurttir bikin û wan dilhêsayî jî kir, ku rewşa herêmê baş e.

Serokê hikûmeta herêma kurdistanê di vê gotara xwe de tekez û dupat û dubare kir, ku gas û petrola herêma kurdistanê ya hemû Iraqiyan e û da xuyakirin, ku êdî pirs û arêşeyên navbera hikûmeta Iraqê û hikûmeta herêma kurdistanê yên di vê bareyê de, hatine çareserkirin.

Di vê konferensê de nûnerên kompanyayên biyanî jî gotarên xwe pêşkêş kirin û di vê konferensê de, salnameyeka gazê û petrolê ya wezareta samanên suriştiyên herêma kurdistanê jî hat belavkirin.
PNA