Tevgera Goranê, Yekgirtiya Îslamî ya Kurdistanê û Komela Îslamî ya Kurdistanê îro di civîneke rojnamegeriyê de, Projeya Reforma Siyasî li Herêma Kurdistanê ragihand.

Îro di civîneke hevbeş de ku li baregeha zimanhalê Tevgera Goranê Rojnameyê li Silêmaniyê hate sazkirin, nûnerê Goran û du endamên polîtbûroyên Yekgirtî û Komel, Projeya Reforma Siyasî li Herêma Kurdistanê ya ragihand ku ji 22 xalan pêk tê.

Projeya Reforma Siyasî li Herêma Kurdistanê pêşkêşî Serokê Herêma Kurdistanê, Serokatiya Parlamento û Hikûmeta Herêma Kurdistanê hatiye kirin.

Her weha nisxeyeke wê jî bo polîtbûroyên Partiya Demokrat a Kurdistanê û Yekîtiya Niştîmanî ya Kurdistanê hatiye şandin.

Projeya Reforma Siyasî li Herêma Kurdistanê ya 22 xalî ev e:

1-Bi armanca pêdaçûn û pesendkirina wê bi lihevkirina di navbera grûpên parlamentoya Kurdistanê de(dijbere û Kurdistanî), vegerandina reşnivîsa destûrê bo parlamentoya Kurdistanê,

2-Pêkanîna komîsyona bilind a hilbijartinên herêmê ji kesên bêalî,

3-Pêkanîna desteya nehiştina gendeliyê ji kesên serbixwe û pêkanîna lêpirsînê digel gendelkaran,

4-Derxistina yasayeke taybet bi nehiştina gendeliyê,

5-Guhertin û serastkirina peyrewa navxwe ya parlamentoyê bi lihevkirina di navbera partiyên dijber û Lîsteya Kurdistanî,

6-Guhertin û serastkirina yasaya xwepêşandana bi lehevkirina di navbera partiyên dijber û Lîsteya Kurdistanî,

7-Yekxistin û bipîşeyîkirina herdu dezgehên asayîşê bi curek ku desthilata bicihanînê nemîne û vegerin ser wezareta navxwe,

8-Yekxistina û bipîşeyîkirina dezgehên asayîşa navxwe (wezareta navxwe),

9-Yekxistin û bipîşeyîkirina hêza pêşmerge ya Kurdistanê,

10-Bicihkirina bêlayenî û serbixweyiya desthilata dadwerî û pêkanîna pêdaçûnê di pêkhateya niha ya civata bilind a dadwerî û dadgeha temîzê de,

11-Aktîvkirna dezgeha dawakariya giştî û cihêkirina wê ji wezareta dadê û girêdana wê bi civata bilind a dadweriyê,

12-Vegerandina mal û mulkên giştî yên ku partî û aliyên siyasî dest bi ser de girtine,

13-Guherîna pêkhateya hizbî ya dezgehên Zanyarî, Parastin û Dijîterorê bo pêkhateyeke asayîşa neteweyî ya ser hikûmetê li ser bingeha pîşeyî û bêaliya serbixwe,

14-Rêxistina têkiliyên di navbera partî û hikûmetê bi curek ku hemû desttêwerdanên hizbî yên bo karûbarê hikûmet û desthilatên destûrî
nehêle,

15-Guherîna wezîr û wekîl û wezîrên pêşmerge, navxwe, darayî û samanên sirûştî û li şûna wan danîna kesên serbixwe û teknokrat,

16-Desteberkirina serbixweyiya zanîngehan û navendekirina xwendina bilind û nehiştina hemû cure desttêwerdanên hizbî,

17-Aşkerekirina hemû jêderên dahat û dabeşkirina dahatê bi awayekî adîlane, aşkere û şefaf di budceyê de,

18-Ji bo destpêka îdareyên mehelî, guhertin û serastkirina yasaya civata parêzgehan û pêdana desthilateke bêtir bi civata parêzgehan,

19- Di nav dam û dezgehên wezaretên pêşmerge û navxwe de, qedexekirina karê hizbî,

20- Birîna alîkariya darayî ya dam û dezgehên ragihandinê yên partiyên desthilatdar û medyaya sîber û hemû rêxistinên ku li jêr navê civaka sivîl samanê giştî heba dikin.

21- Piştî ragihandina vê projeyê, bila di maweya mehekê de yasa û biryarên taybet bi her yek ji van xalên jorê bê derxistin û di maweya du mehan de jî bên bicihanîn.

22- Di haleta bicihnebûna van xalên jorê di maweya diyarkirî de ku di xala 21ê de hatiye, bila serokê herêmê biryara hilbijartina pêşwext rabigihîne û hikûmeteke yekîtiya niştîmanî serperiştiya wê qonaxê û hilbijartinan bike.

(AKnews)